Fálase

A Xunta admite, tras o conflito en Brión, que modificará a normativa dos comedores escolares para que poidan ser coidadoras "persoas alleas ás familias dos escolares". Avanzouno o conselleiro Román Rodríguez en declaracións á Radio Galega. Esta semana, tras a mobilización das familias, Educación accedeu a que un colexio brionés poida incorporar persoal contratado polo Concello para habilitar unha segunda quenda de comedor e así cumprir as medidas da COVID-19 sen deixar fóra do servizo a case 200 estudantes.

Que modelo de Estado prefire a poboación? Que valoración reciben o actual xefe do Estado e o seu pai? Mañá, ás 8 da mañá, os 16 medios impulsores da enquisa sobre a monarquía, entre eles Praza.gal, publicaremos os resultados do inquérito, financiado mediante micromecenado e elaborado polo Instituto 40dB para a Plataforma de Medios Independentes.

Lugo e Ferrol celebran o vixésimo aniversario do irmandamento coa recepción á corporación ferrolá no Concello lucense que é tradición nas festas do San Froilán, este ano convertidas en semana cultural por mor do coronavirus. Esta recepción celébrase en Ferrol polo San Xiao. Na imaxe, acto institucional celebrado este sábado, presidido pola alcaldesa lucense, Lara Méndez, e o rexedor ferrolán, Ángel Mato.

O luns día 12, ás 8 da mañá, os medios impulsores da enquisa sobre a monarquía, entre eles Praza.gal, publicaremos os resultados do inquérito, o maior ao respecto realizado ata o momento. O traballo demoscópico, financiado mediante micromecenado, foi elaborado polo instituto de opinión 40dB.

O Tribunal Superior de Xustiza de Galicia ratifica o confinamento perimetral de Ourense e Barbadás e as demais medidas restritivas da Xunta na contorna para frear os contaxios do coronavirus. Ampliamos a información neste espazo

O Goberno de España decreta o estado de alarma na Comunidad de Madrid para manter o confinamento perimetral a causa do coronavirus en nove municipios, incluíndo a cidade de Madrid. Na imaxe, a xuntanza extraordinaria do Consello de Ministros, presidido por Carmen Calvo en ausencia de Pedro Sánchez, de viaxe oficial en Barcelona.

Alcoa anuncia a aplicación do despedimento colectivo na planta de San Cibrao, que deixa na rúa a 524 traballadores. Ademais, levará a cabo a hibernación das cubas de electrólise da factoría. A multinacional defende que nos últimos meses "negociou de boa fe", a pesar de que persoal, sindicatos e administracións acusan a empresa de ter bloqueado unha posible venda da instalación. Ampliamos a información neste espazo

• Tema | Contra o peche de Alcoa

A Xunta intervén a residencia Os Gozos, da Fundación San Rosendo no Pereiro de Aguiar, onde o xoves foi confirmado un brote do coronavirus de máis dun cento de casos. As anteriores intervencións de Política Social en residencias privada foron na de El Pinar (Culleredo) e na DomusVi Outeiro de Rei, o pasado setembro, esta última tamén tras un surto de máis dun centenar de positivos. Máis información, hoxe en Praza.gal

Adiados os concertos de Sés na Coruña, O Rosal e Santiago tras dar positivo por coronavirus. "A cantareira atópase en bo estado e confinada no seu domicilio, e quere trasladar unha mensaxe de tranquilidade ao seu público, ao que agradece a confianza no seu traballo", sinala o seu equipo, que agrega que "as persoas con entrada para o Pazo da Ópera que desexen solicitar a devolución poderán facelo desde hoxe"

A nai de Déborah Fernández, a moza asasinada en Vigo no ano 2002, declara hoxe nos xulgados de Tui despois de que a familia lograse reabrir o caso ás portas da prescrición do crime, do que segue sen haber culpable coñecido malia ás múltiplas pistas que apuntan a unha morte violenta.

• REPORTAXE | O caso de Déborah Fernández: 17 anos á procura de xustiza