Fálase

A Xunta di que os descontos do 100% na viaxe de volta para familias numerosas nas dúas autoestradas autonómicas (AG-55 A Coruña-Carballo e AG-57 Vigo-Val Miñor), anunciados por Feijóo en 2019, estarán en vigor "a mediados de agosto" deste 2021. O Consello do Goberno galego aprobou este xoves un decreto coa medida e mais coa "extensión ás 24 horas posteriores á viaxe de ida do desconto do 25 % na volta, e do 50 % na segunda volta, aos usuarios recorrentes, que ata agora se aplicaba ás viaxes realizadas no mesmo día" e que rexe en días laborables. Para todas estas bonificacións cómpre dispoñer de telepeaxe. (Imaxe: CC BY-SA Xunta)

• Con telepeaxe e primando as viaxes recorrentes: así quedan as rebaixas da AP-9 a 27 anos da fin da concesión
• HEMEROTECA | A Xunta adía outra vez a promesa de rebaixas nas peaxes ás familias numerosas que lanzou Feijóo en setembro de 2019

EPA | A poboación ocupada aumentou en Galicia en 16.900 persoas en Galicia durante o segundo trimestre do ano e queda en 1,08 millóns, 26.300 máis que hai un ano, segundo os resultados da Enquisa de Poboación Activa que veñen de facerse públicos. No mesmo período, a poboación en situación de desemprego diminuíu en 5.900 persoas, ata as 152.400, isto é, aínda 9.900 máis que doce meses antes. 

• AMPLIAMOS 👉O impacto da COVID no emprego amaina pero deixa aínda 25.000 persoas sen emprego ou en ERTE

Suspendido o XV Encontro de Embarcacións Tradicionais, que se ía celebrar do 5 ao 8 de agosto en Moaña, por mor do incremento de restricións da Xunta pola COVID. "O cambio na situación epidemiolóxica de nivel medio a alto de restricións, e ante unha posible entrada no nivel máximo na vindeira semana, avaliamos que non se dan as circunstancias para desenvolver o encontro con plenas garantías", sinala o comité organizador.

A Xunta eleva outros 6 concellos a nivel máximo de restricións pola COVID (Muros, Baiona, Burela, Foz, Viveiro e Monterroso) e serán un total de 12 dende o sábado (seguen nel Boiro, O Barco, Cambados, Meaño, O Grove e Sanxenxo). Ademais, 48 municipios quedan en nivel alto, entre eles as sete principais cidades.

• AMPLIAMOS 👉 A Xunta estende a 60 concellos a obriga de test negativo da COVID ou vacina para entrar en bares, entre eles as sete cidades
• MAPA INTERACTIVO | Restricións da Xunta pola COVID dende o 31 de xullo

O DOG publica as leis galegas contra a violencia vicaria e a discriminación de científicas que sexan nais, que entran en vigor este xoves e, no caso das novas convocatorias da segunda norma, dentro de tres meses.

• HEMEROTECA | O Parlamento aproba a 'lei Ángeles Alvariño' para evitar a discriminación ás científicas que sexan nais
• HEMEROTECA | A violencia vicaria: á espera de medidas que protexan a crianzas e nais dos seus agresores

Os descontos da AP-9 estarán en vigor dende mañá, 29 de xullo. O BOE publica este mércores o Real Decreto que os regula, tras a súa aprobación no Consello de Ministros do martes. Estas rebaixas nas peaxes da Autoestrada do Atlántico foron parte do pacto do BNG co PSOE para a investidura de Pedro Sánchez.

• +INFO 👉 Con telepeaxe e primando as viaxes recorrentes: así quedan as rebaixas da AP-9 a 27 anos da fin da concesión
• +INFO 👉Transportes abre a porta a ampliar a AP-9 en Vigo pola conxestión que poden producir a gratuidade de Redondela e Vialia

O Consello de Ministros nomea á galega Isabel Pardo de Vera nova número 2 do Ministerio de Transportes. Pardo de Vera era desde hai tres anos presidenta de Adif e agora será secretaria de Estado da nova ministra, Raquel Sánchez.

O Consello de Ministros aproba a rebaixa de peaxes na AP-9 que este luns concretou na Coruña a ministra de Transportes. Agora ten que ser publicada no BOE e entrará en vigor ao día seguinte, previsiblemente de cara á fin de semana.

• 👉 Con telepeaxe e primando as viaxes recorrentes: así quedan as rebaixas da AP-9 a 27 anos da fin da concesión

O autor do recurso contra o cambio de nome da antiga avenida Xoán Carlos I de Pontevedra polo de Virxinia Pereira desiste do proceso. Os servizos xurídicos municipais constatan que, deste xeito, a mudanza que xa é efectiva dende o pasado abril vira definitiva. "Pontevedra ten a honra de ser a primeira cidade de quitar o Borbón do rueiro para poñer o nome dunha muller emblemática como Virxinia Pereira", destaca o goberno local pontevedrés tras constatar a fin do proceso.

• HEMEROTECA | As cartas de Virxinia Pereira amosan o seu compromiso ideolóxico e a defensa do legado de Castelao

Os Verto revisitan a Muiñeira de Chantada nun tema con vocación de ser a canción do verán 2021. Tamén dispoñible en Spotify

• 📺VÍDEO | VINTE almorzando con Verto