Fálase

Boa parte de Galicia volve estar este luns en aviso amarelo por treboadas. A alerta atinxe a toda a provincia de Ourense, a toda a de Lugo agás A Mariña e mais ao interior da provincia de Pontevedra. Este domingo as treboadas descargaron con forza no interior do país e a súa intensidade provocou múltiplas incidencias na cidade de Lugo, con asolagamentos en instalacións públicas coma o hospital Lucus Augusti ou a estación de autobuses, así como múltiples rúas e baixos de edificios privados por precipitacións que supuxeron máis de 30 litros por metro cadrado en apenas vinte minutos

O Celta gaña ao Barça en Balaídos e logra a salvación, seguirá a ser un equipo de primeira división na vindeira temporada. Dous goles de Gabri Veiga conseguen o obxectivo do equipo celeste na súa última oportunidade, coa afición do seu lado. [Fotografía de Balaídos este domingo ©RC Celta de Vigo]

Alerta laranxa por fortes choivas en Lugo e Ourense con acumulacións de ata 30mm nunha hora. A Axencia Estatal de Meteoroloxía informa dun fenómeno adverso de nivel laranxa que está a afectar á montaña, ao sur e ao centro de Lugo e á montaña e ao noroeste de Ourense. Na capital lucense houbo especiais problemas polas inundacións no hospital. 

Representantes das directivas do PSdeG e do BNG manterán este luns un encontro en Santiago para analizar o mapa político resultante das eleccións municipais do 28M e iniciar as negociacións que faciliten a formación de gobernos progresistas nos concellos, segundo informan ambas formacións políticas. 

O buque Ártabro da empresa ACSM, enviado a augas de Terranova para inspeccionar os restos do Villa de Pitanxo, toma as primeiras imaxes tras localizalo moi preto das coordenadas nas que afundiu, como avanza Faro de Vigo. [Imaxe dos servizos de rescate canadenses á procura dos tripulantes do Villa de Pitanxo tras o naufraxio © JRCC Halifax]

• HEMEROTECA | A Audiencia Nacional envía a Marín a causa sobre o 'Villa de Pitanxo' e ve indicios de 21 delitos de homicidio
• HEMEROTECA | Canadá suspende a busca dos desaparecidos do Villa de Pitanxo con doce tripulantes desaparecidos
• REPORTAXE | Trinta anos no mar de Terranova: "Non podemos ir a porto faga o tempo que faga; é moi malo cando máis peixe hai"

Outra formación postúlase para formar goberno en Sada. Unidos por Sada, na que se integran sete dos nove concelleiros que provocaron a moción de censura a Sadamaioría no concello, propón un acordo para un goberno de "xestión honesta e clara". A única edil do PSdeG non apoia a Sadamaioría, que precisa de socialistas e BNG, e segue propoñéndose como candidata. 

•  ENTREVISTA | Benito Portela: "O segredo do éxito de Sadamaioría está no traballo de proximidade e en saber recoñecer os erros"

Investigan o asasinato dunha muller dun disparo na tarde deste sábado no camping 'O Muiño' de Mougás, no concello de Oia, como un crime machista. A Subdelegación do Goberno en Pontevedra confirma que o asasino é un varón que xa foi identificado e está en busca e captura por parte das forzas e corpos de seguridade. O 112 recibiu un aviso a primeira hora da tarde e mobilizou a Garda Civil e axentes da Policía Autonómica ata o lugar dos feitos [na imaxe, CC-BY-SA Turismo de Galicia].

• +INFO | Asasinada unha muller en Oia pola súa ex-parella Garda Civil, que tiña unha orde de afastamento da vítima
• DATOS | As denuncias por violencia machista seguen en máximos en Galicia tras pechar 2022 con máis de 7.000
• "A orde de afastamento sen pulseira non vale": a vida das 151 mulleres no seguimento por violencia machista en Galicia

O presidente da Xunta, Alfonso Rueda, asistiu este sábado á celebración eucarística na que tomou posesión como arcebispo de Santiago o ourensán Francisco José Prieto, que substitúe a Julián Bario. [Foto © Conchi Paz/Xunta]

• HEMEROTECA | O ourensán Francisco Prieto, novo arcebispo de Santiago de Compostela

Esgótase o orzamento de 2,5 millóns de euros do Bono Activa Comercio da Xunta. Os bonos levaban tres semanas activos e, segundo o Goberno galego, contribuíron a "mobilizar preto de 12,5 millóns de euros en vendas nos máis de 7.000 establecementos" adheridos nesta edición, que como novidade non limitou o número de usuarios que podían descargar os bonos, senón que desactiva a súa validez unha vez esgotado o importe total dos descontos. 

• Concorrencia non competitiva: cando a axuda pública a leva quen máis corre

O coordinador nacional de Podemos Galicia, Borja San Ramón, traslada que a líder estatal de Podemos, Ione Belarra, conta coa súa "confianza" para artellar "unha candidatura ampla que interpele a máxima cantidade de xente posible" cara ás eleccións do 23 de xullo. "Poñemos en marcha a maquinaria a disposición do que vén", afirmou tras a celebración do Consello Cidadán Galego para analizar os resultados do 28M. 

• As 'mareas' afunden nas cidades mentres resisten nas vilas