Fálase

O buque Ártabro da empresa ACSM, enviado a augas de Terranova para inspeccionar os restos do Villa de Pitanxo, toma as primeiras imaxes tras localizalo moi preto das coordenadas nas que afundiu, como avanza Faro de Vigo. [Imaxe dos servizos de rescate canadenses á procura dos tripulantes do Villa de Pitanxo tras o naufraxio © JRCC Halifax]

• HEMEROTECA | A Audiencia Nacional envía a Marín a causa sobre o 'Villa de Pitanxo' e ve indicios de 21 delitos de homicidio
• HEMEROTECA | Canadá suspende a busca dos desaparecidos do Villa de Pitanxo con doce tripulantes desaparecidos
• REPORTAXE | Trinta anos no mar de Terranova: "Non podemos ir a porto faga o tempo que faga; é moi malo cando máis peixe hai"

Outra formación postúlase para formar goberno en Sada. Unidos por Sada, na que se integran sete dos nove concelleiros que provocaron a moción de censura a Sadamaioría no concello, propón un acordo para un goberno de "xestión honesta e clara". A única edil do PSdeG non apoia a Sadamaioría, que precisa de socialistas e BNG, e segue propoñéndose como candidata. 

•  ENTREVISTA | Benito Portela: "O segredo do éxito de Sadamaioría está no traballo de proximidade e en saber recoñecer os erros"

Investigan o asasinato dunha muller dun disparo na tarde deste sábado no camping 'O Muiño' de Mougás, no concello de Oia, como un crime machista. A Subdelegación do Goberno en Pontevedra confirma que o asasino é un varón que xa foi identificado e está en busca e captura por parte das forzas e corpos de seguridade. O 112 recibiu un aviso a primeira hora da tarde e mobilizou a Garda Civil e axentes da Policía Autonómica ata o lugar dos feitos [na imaxe, CC-BY-SA Turismo de Galicia].

• +INFO | Asasinada unha muller en Oia pola súa ex-parella Garda Civil, que tiña unha orde de afastamento da vítima
• DATOS | As denuncias por violencia machista seguen en máximos en Galicia tras pechar 2022 con máis de 7.000
• "A orde de afastamento sen pulseira non vale": a vida das 151 mulleres no seguimento por violencia machista en Galicia

O presidente da Xunta, Alfonso Rueda, asistiu este sábado á celebración eucarística na que tomou posesión como arcebispo de Santiago o ourensán Francisco José Prieto, que substitúe a Julián Bario. [Foto © Conchi Paz/Xunta]

• HEMEROTECA | O ourensán Francisco Prieto, novo arcebispo de Santiago de Compostela

Esgótase o orzamento de 2,5 millóns de euros do Bono Activa Comercio da Xunta. Os bonos levaban tres semanas activos e, segundo o Goberno galego, contribuíron a "mobilizar preto de 12,5 millóns de euros en vendas nos máis de 7.000 establecementos" adheridos nesta edición, que como novidade non limitou o número de usuarios que podían descargar os bonos, senón que desactiva a súa validez unha vez esgotado o importe total dos descontos. 

• Concorrencia non competitiva: cando a axuda pública a leva quen máis corre

O coordinador nacional de Podemos Galicia, Borja San Ramón, traslada que a líder estatal de Podemos, Ione Belarra, conta coa súa "confianza" para artellar "unha candidatura ampla que interpele a máxima cantidade de xente posible" cara ás eleccións do 23 de xullo. "Poñemos en marcha a maquinaria a disposición do que vén", afirmou tras a celebración do Consello Cidadán Galego para analizar os resultados do 28M. 

• As 'mareas' afunden nas cidades mentres resisten nas vilas

28M | Goretti Sanmartín despexa a súa investidura como nova alcaldesa de Santiago tras confirmar Compostela Aberta (2 edís) que tamén dará o seu "si" á elección da candidata do BNG (6 edís), despois de que no inicio das negociacións o PSdeG (6 edís) tamén avanzase o seu voto afirmativo. Na primeira xuntanza entre ambas forzas -na imaxe-, a formación municipalista que encabeza María Rozas resaltou que a súa asemblea abordará a vindeira semana a posibilidade de negociar ser parte do novo goberno local. "A intención é que entren a formar parte do goberno local, que queremos que sexa amplo, estábel, unido e sólido, para comezar a traballar o máis rápido posíbel", resalta Sanmartín.

• Principia a negociación en Santiago: o PSdeG apoia investir a Sanmartín e pide tempo para decidir se entra no goberno
• O BNG adianta o PSdeG en Santiago e Goretti Sanmartín pode ser a primeira alcaldesa da cidade

A única edil do PSdeG en Sada deixa no aire o goberno de esquerda en Sada ao postularse para alcaldesa e non apoiar a Sadamaioría, a forza máis votada. Almudena Pena, candidata socialista, insiste en reclamar a alcaldía malia que é a representante no consistorio con menor apoio. 

• 👉 ENTREVISTA | Benito Portela: "O segredo do éxito de Sadamaioría está no traballo de proximidade e en saber recoñecer os erros"

PARO REXISTRADO | As inscricións nas oficinas de emprego diminuíron en 4.909 durante o mes de maio en Galicia (-3,52%, fronte ao -1,77% na media estatal) e quedan en 134.434, o que supoñen 11.686 menos que un ano antes (-8,00% en Galicia, -6,29% na media). A afiliación media á Seguridade Social aumentou no mesmo mes en 8.770 persoas (+0,84% e na media,+0,97%) e chega aos 1,06 millóns, a cifra máis alta dende novembro de 2008 e que supón 18.337 máis que no mesmo mes do ano anterior, un avance interanual en Galicia do 1,76%, por baixo da media estatal do 2,88%. 

• AMPLIAMOS 👉 Galicia pecha maio co paro máis baixo da serie histórica e a mellor cifra de emprego desde a crise de 2008

#28M Formoso remite aos resultados das negociacións co BNG a concreción dos pactos de goberno nos concellos e deputacións e tamén posibles acordos a respecto de Ourense, onde "o PSdeG non vai negociar nada con Jácome", mantén malia á postura da dirección provincial do partido. No marco da celebración da súa Comisión Executiva Nacional -na imaxe-, o secretario xeral do PSdeG ratifica que a súa intención é pechar un "acordo marco" co Bloque coas liñas xerais para os pactos nas institucións onde poden sumar maiorías e "tamén compartir reflexións con esta formación sobre o futuro de Ourense". 

• Rueda evita confirmar a Baltar como candidato á Deputación de Ourense
• Principia a negociación en Santiago: o PSdeG apoia investir a Sanmartín e pide tempo para decidir se entra no goberno
• 🔊 PODCAST | Fálase - As municipais foron galegas
• A esquerda volve ter o groso do poder nas principais institucións locais galegas malia ao pulo do PP