Fálase

28M | Goretti Sanmartín despexa a súa investidura como nova alcaldesa de Santiago tras confirmar Compostela Aberta (2 edís) que tamén dará o seu "si" á elección da candidata do BNG (6 edís), despois de que no inicio das negociacións o PSdeG (6 edís) tamén avanzase o seu voto afirmativo. Na primeira xuntanza entre ambas forzas -na imaxe-, a formación municipalista que encabeza María Rozas resaltou que a súa asemblea abordará a vindeira semana a posibilidade de negociar ser parte do novo goberno local. "A intención é que entren a formar parte do goberno local, que queremos que sexa amplo, estábel, unido e sólido, para comezar a traballar o máis rápido posíbel", resalta Sanmartín.

• Principia a negociación en Santiago: o PSdeG apoia investir a Sanmartín e pide tempo para decidir se entra no goberno
• O BNG adianta o PSdeG en Santiago e Goretti Sanmartín pode ser a primeira alcaldesa da cidade

A única edil do PSdeG en Sada deixa no aire o goberno de esquerda en Sada ao postularse para alcaldesa e non apoiar a Sadamaioría, a forza máis votada. Almudena Pena, candidata socialista, insiste en reclamar a alcaldía malia que é a representante no consistorio con menor apoio. 

• 👉 ENTREVISTA | Benito Portela: "O segredo do éxito de Sadamaioría está no traballo de proximidade e en saber recoñecer os erros"

PARO REXISTRADO | As inscricións nas oficinas de emprego diminuíron en 4.909 durante o mes de maio en Galicia (-3,52%, fronte ao -1,77% na media estatal) e quedan en 134.434, o que supoñen 11.686 menos que un ano antes (-8,00% en Galicia, -6,29% na media). A afiliación media á Seguridade Social aumentou no mesmo mes en 8.770 persoas (+0,84% e na media,+0,97%) e chega aos 1,06 millóns, a cifra máis alta dende novembro de 2008 e que supón 18.337 máis que no mesmo mes do ano anterior, un avance interanual en Galicia do 1,76%, por baixo da media estatal do 2,88%. 

• AMPLIAMOS 👉 Galicia pecha maio co paro máis baixo da serie histórica e a mellor cifra de emprego desde a crise de 2008

#28M Formoso remite aos resultados das negociacións co BNG a concreción dos pactos de goberno nos concellos e deputacións e tamén posibles acordos a respecto de Ourense, onde "o PSdeG non vai negociar nada con Jácome", mantén malia á postura da dirección provincial do partido. No marco da celebración da súa Comisión Executiva Nacional -na imaxe-, o secretario xeral do PSdeG ratifica que a súa intención é pechar un "acordo marco" co Bloque coas liñas xerais para os pactos nas institucións onde poden sumar maiorías e "tamén compartir reflexións con esta formación sobre o futuro de Ourense". 

• Rueda evita confirmar a Baltar como candidato á Deputación de Ourense
• Principia a negociación en Santiago: o PSdeG apoia investir a Sanmartín e pide tempo para decidir se entra no goberno
• 🔊 PODCAST | Fálase - As municipais foron galegas
• A esquerda volve ter o groso do poder nas principais institucións locais galegas malia ao pulo do PP 

O Parlamento reitera por unanimidade a solicitude para que o Goberno de España traspase a Galicia as competencias en materia de saúde penitenciaria. A Cámara insta a Xunta a que reclame esta transferencia para que as persoas reclusas nos centros penitenciarios galegos sexan atendidas polo Sergas. "Esta transferencia debe estar acompañada dos medios humanos, económicos e materiais necesarios, atendendo á suficiencia dinámica para a prestación do correspondente servizo", recolle a proposición a proposta do BNG aprobada este xoves.

• HEMEROTECA | Feijóo xa é o primeiro presidente da historia da Xunta en deixar o cargo sen sumar competencias
• HEMEROTECA | O "non" do Estado ás competencias do litoral axita o veto do PP á reforma do Estatuto tras 13 anos de autogoberno freado

A galega Marta Lois, presidenta de Sumar. A ex-concelleira de Compostela Aberta e profesora da USC figura como presidenta da plataforma impulsada por Yolanda Díaz, inscrita no rexistro de partidos políticos como Movimiento Sumar. 

• Yolanda Díaz lanza o seu proxecto para "ser a primeira presidenta de España" e rexeita as "tutelas"

Vólvese adiar o xuízo penal de Baltar por conducir un coche oficial a 215 por hora, desta volta pola folga do persoal da Xustiza. O presidente da Deputación de Ourense estaba citado este mércores ás 10 da mañá nun xulgado do Penal de Zamora acusado de delito contra a seguridade viaria tras lograr previamente adiar a vista a despois das eleccións do pasado domingo. Polo momento aínda non hai nova data.

• ANÁLISE | A hora máis escura dos Baltar
• Baltar logra non ser xulgado ata despois das eleccións por delito contra a seguridade viaria por ir a 215 km/h

A Executiva do PSdeG de Ourense aproba "facer todo o que estea na nosa man para garantir o cambio na Deputación", o que necesariamente implica un acordo con Democracia Ourensana que tamén precisaría dos votos do BNG. Tras as eleccións municipais do pasado 28M, o PP volveu quedar sen maioría absoluta na institución, con 12 escanos fronte a 7 socialistas, 3 do Bloque e 3 do partido de Jácome. A suma de todas as formacións diferentes do PP sería dabondo para evitar a reelección de José Manuel Baltar, poñendo así fin a tres décadas de dominio baltarista na Deputación. Un eventual pacto con DO non sería do agrado do PSdeG da cidade de Ourense, segundo vén manifestando. Máis información, este mércores en Praza.gal. Na imaxe, reunión da dirección provincial dos socialistas ourensáns, este martes.

• ANÁLISE | A hora máis escura dos Baltar
• A esquerda retén as deputacións da Coruña e Lugo e perde a de Pontevedra mentres Baltar queda sen absoluta en Ourense 

23X | Feijóo acusa a Pedro Sánchez de pretender que o electorado "elixa entre urnas ou vacacións" por sinalar as eleccións para o 23 de xullo tras convocar os seus derradeiros comicios como presidente da Xunta o 12 de xullo de 2020. Aqueles comicios foran sinalados inicialmente para o 5 de abril, secundando a decisión do lehendakari para Euskadi, despois adiáranse pola pandemia da COVID e a nova convocatoria, tamén en liña con Euskadi, quedara fixada para o 12 de xullo. A participación roldara o 58% e caera ata o 48% unha vez incorporados os datos do coñecido como voto emigrante. [Imaxe: © PP]

• Sánchez envorca o taboleiro político estatal cun adianto das xerais tras o pau do PSOE o 28M
• HEMEROTECA (2020) | A participación nas eleccións galegas cae por baixo do 50% tras o reconto definitivo

A xornalista Mar Mato gaña o XX Premio Afundación de Xornalismo Fernández del Riego polo seu artigo Réquiem por un sombreiro publicado no xornal Faro de Vigo. O presidente do xurado, Víctor Freixanes, destacou que "as xornalistas literarias engrandecen a nosa literatura" e a premiada agradeceu o apoio "ao xornalismo en galego" deste premio que leva o nome do homenaxeado este ano no Día das Letras.