Fálase

O partido de Milei vence nas lexislativas da Arxentina con algo máis do 40% dos votos, case seis puntos por riba do peronismo, o que amplía a súa marxe para aplicar a axenda de extrema dereita que impulsa dende a presidencia do país. 

• HEMEROTECA | Milei responde con represión ás protestas contra os seus recortes: "Busca disciplinar o pobo que se mobilizou"
• HEMEROTECA | Emigración relativiza o impacto dos recortes de Milei nos galegos da Arxentina: "Levan décadas sufrindo populistas"
• HEMEROTECA | Honras da (extrema) dereita española a Milei

O Goberno municipal de Arzúa rexeita o "ataque fascista" cometido nas útimas horas contra a escultura de Juan Vidal, alcalde da localidade fusilado polos golpistas en 1936. O Executivo formado por BNG, A.A. e PSdeG traslada a súa "profunda preocupación" por este acto vandálico, "que pretende sementar o odio e borrar a nosa historia", contra o "patrimonio colectivo" e "a memoria democrática". "Desde o goberno municipal expresamos o noso apoio e solidariedade coa familia de Juan Vidal e coa de todas as persoas represaliadas en Arzúa, así como con todas as persoas que manteñen viva a memoria das vítimas da represión franquista", aseguran. O Concello avanza que restaurará a escultura e pedirá que as autoridades competentes investiguen os feitos. [📷 CC-BY-SA BNG Arzúa]

Medio Rural suspende durante 21 días todas as feiras, certames, poxas, mercados e concentración de gando en Galicia a partir deste luns 27 como medida preventiva ante o avance da dermatose nodular contaxiosa entre os animais. Segue vixente o período de vixilancia veterinaria oficial para todos os bovinos procedentes de explotacións localizadas fóra do noso país e prohibirase a entrada de animais procedentes de explotacións situadas nas zonas declaradas como restrinxidas á dermatose nodular contaxiosa. O gando vacún que cheguen a Galicia con destino a sacrificio poderá acceder sempre que sexa trasladado directamente aos matadoiros.

O Goberno de Uruguai denuncia o estaleiro vigués Cardama ante a Fiscalía do seu país, acúsao dunha "fraude" e dun "engano" en relación ás garantías presentadas para a construción de dúas patrulleiras que xa están en marcha nas instalacións da empresa en Bouzas [📷 © Cardama].

O conselleiro de Sanidade abandona o Consello Interterritorial de Saúde canda o resto de autonomías de gobernos do PP. Antonio Gómez Caamaño acusa a ministra Mónica García de "utilizar" este órgano para "o capricho político" e "atacar" as autonomías do PP ao fío da crise dos cribados de cancro en Andalucía. Os gobernos dos conservadores "estamos dispostos a dar eses datos", agrega o conselleiro tras a súa negativa a remitilos ao Ministerio, "e os primeiros en coñecelos van ser os pacientes", di nun contexto no que volve culpar o Goberno de España dos "problemas que persisten" coma o "déficit de médicos". 

O Ministerio, pola súa banda, reprocha a "deslealdade institucional" dos conselleiros do PP e mantén que a súa ausencia impediu votar o reparto de "dous millóns de euros para atención e vixilancia do cancro". "Onte estiveron na cea, pero hoxe no de traballar xa non tocaba", agrega o secretario de Estado de Sanidade, Javier Padilla.

• O Sergas non envía os datos de cribados de cancro ao Estado en liña do fixado no PP
• HEMEROTECA | O 66% dos tumores de mama detéctanse en estadios iniciais grazas ao cribado do Sergas

Alemaña e España abren unha negociación bilateral para abordar a oficialidade do galego, o catalán e o éuscaro na UE. O acordo chega nun momento de tensión entre o PSOE e Junts, que ameaza con romper o acordo con Sánchez. Foto: Pool Moncloa/Borja Puig de la Bellacasa e Pool UE. Bruxelas.

• A UE volve adiar a oficialidade do galego entre presións do PP para freala

A plataforma Sanidade Galega con Palestina chama a cidadanía a deixar de mercar medicamentos da farmacéutica TEVA e as súas filiais Ratio, Ratiopharm, Davur, Belmac e Tevagen. O persoal sanitario mobilizado neste colectivo asegura que é a súa obriga deontolóxica "contribuír a aliviar o sufrimento humano da poboación palestina" e salienta que a marca TEVA "financia directamente o xenocidio palestino ao ser a maior empresa de Israel e ter doado centos de millóns ao seu exército dende 2023". "Cada vez que mercamos un destes fármacos, contribuímos á maquinaria de guerra israelí", denuncian dende a plataforma.

• Nace a plataforma 'Sanidade Galega con Palestina' para denunciar o xenocidio israelí en Gaza

O ex-tenente coronel Antonio Tejero, protagonista do golpe de Estado do 23-F, en estado grave segundo informa Antena 3. Inicialmente, a partir dun adianto informativo de El Mundo do que tamén se fixo eco Praza.gal, foi difundida a información errónea da súa morte aos aos 93 anos na súa casa de Valencia. Expulsado da Garda Civil, foi condenado por rebelión militar a 30 anos pero cumpriu a metade e foi posto en liberdade en 1996.

• 40 anos do 23-F: a noite que a democracia cambaleou

Ledicia Costas, David Uclés e Lídia Jorge gañan o premio XXIX Premio San Clemente de Novela con Pel de cordeiro, La península de las casas vacías e Misericordia nas categorías de galego, castelán e outras linguas, respectivamente. O galardón está organizado polo instituto Rosalía de Castro de Santiago e o seu xurado está conformado por alumnado do centro xunto a estudantes doutros institutos de Galicia e do exterior, desta volta do Losada Díeguez da Estrada; o 12 de Outubro de Ourense; o Isaac Díaz Pardo de Sada; o Sanxillao de Lugo; o Antonio Fraguas de Santiago; o Ramiro de Maeztu de Madrid; o Lycée Saint François Xavier de Vannes (Francia), o Grimmelshausen Gymnasium de Gelnhausen (Alemaña) e o Hockerill Anglo European College (Reino Unido). Na imaxe, estudantes do xurado canda o secretario xeral da Lingua e outros cargos, no anuncio do resultado deste ano.

🟪🟧🟦EN VINTE
🥁 🪗💃 Vinte de Foliada. Un novo podcast amosa que a tradición é agora  

🎧Nos próximos días sairá á luz a serie podcast Vinte de Foliada, un proxecto co que a revista VINTE se achega á tradición máis viva
👀 Aquí, máis detalles e un petisco do primeiro episodio
🤝 Co apoio da Secretaría Xeral da Lingua