Fálase

A plataforma Sanidade Galega con Palestina chama a cidadanía a deixar de mercar medicamentos da farmacéutica TEVA e as súas filiais Ratio, Ratiopharm, Davur, Belmac e Tevagen. O persoal sanitario mobilizado neste colectivo asegura que é a súa obriga deontolóxica "contribuír a aliviar o sufrimento humano da poboación palestina" e salienta que a marca TEVA "financia directamente o xenocidio palestino ao ser a maior empresa de Israel e ter doado centos de millóns ao seu exército dende 2023". "Cada vez que mercamos un destes fármacos, contribuímos á maquinaria de guerra israelí", denuncian dende a plataforma.

• Nace a plataforma 'Sanidade Galega con Palestina' para denunciar o xenocidio israelí en Gaza

O ex-tenente coronel Antonio Tejero, protagonista do golpe de Estado do 23-F, en estado grave segundo informa Antena 3. Inicialmente, a partir dun adianto informativo de El Mundo do que tamén se fixo eco Praza.gal, foi difundida a información errónea da súa morte aos aos 93 anos na súa casa de Valencia. Expulsado da Garda Civil, foi condenado por rebelión militar a 30 anos pero cumpriu a metade e foi posto en liberdade en 1996.

• 40 anos do 23-F: a noite que a democracia cambaleou

Ledicia Costas, David Uclés e Lídia Jorge gañan o premio XXIX Premio San Clemente de Novela con Pel de cordeiro, La península de las casas vacías e Misericordia nas categorías de galego, castelán e outras linguas, respectivamente. O galardón está organizado polo instituto Rosalía de Castro de Santiago e o seu xurado está conformado por alumnado do centro xunto a estudantes doutros institutos de Galicia e do exterior, desta volta do Losada Díeguez da Estrada; o 12 de Outubro de Ourense; o Isaac Díaz Pardo de Sada; o Sanxillao de Lugo; o Antonio Fraguas de Santiago; o Ramiro de Maeztu de Madrid; o Lycée Saint François Xavier de Vannes (Francia), o Grimmelshausen Gymnasium de Gelnhausen (Alemaña) e o Hockerill Anglo European College (Reino Unido). Na imaxe, estudantes do xurado canda o secretario xeral da Lingua e outros cargos, no anuncio do resultado deste ano.

🟪🟧🟦EN VINTE
🥁 🪗💃 Vinte de Foliada. Un novo podcast amosa que a tradición é agora  

🎧Nos próximos días sairá á luz a serie podcast Vinte de Foliada, un proxecto co que a revista VINTE se achega á tradición máis viva
👀 Aquí, máis detalles e un petisco do primeiro episodio
🤝 Co apoio da Secretaría Xeral da Lingua

O persoal contra incendios manifestarase o xoves 30 de outubro en Compostela "por un servizo público, digno e con garantías laborais". Traballadores do Servizo de Prevención e Defensa contra Incendios Forestais (SPIF), convocados pola CIG, sairán ás 11 da Consellería de Medio Rural para rematar diante do complexo da Xunta en San Caetano. 

Antía Yáñez gaña o XIX premio Raíña Lupa de Literatura Infantil e Xuvenil con Bragakadabra. A escritora de Burela recibe este recoñecemento convocado pola Deputación da Coruña na modalidade infantil, dotado con 6.500 euros e a publicación da obra premiada. O xurado declarou deserto o galardón na categoría xuvenil e valorou que a obra de Yáñez destaca polo "humor, imaxinación, fantasía e tenrura con que a autora traballa a historia, unha narración fresca e chea de personalidade". [📸 © @stillpablou]

• ENTREVISTA | Antía Yáñez: "Se as protagonistas desta novela tivesen saúde mental non habería vinganza"

O Goberno de España e RTVE impulsan o primeiro mapa audiovisual das exhumacións do franquismo. El país de las 6.000 fosas conta coa colaboración da canle pública e da Secretaría de Estado de Memoria Democrática. 

• Os fondos estatais de Memoria Democrática permiten intervir en oito fosas galegas dos golpistas en 2025

Adif interrompe a circulación ferroviaria entre Santiago e Ordes pola aparición dun corpo nas vías. O traslado de viaxeiros afectados estase a realizar por estrada. 

Pedro Sánchez anuncia que o Goberno de España proporá á UE deixar de cambiar a hora dúas veces ao ano dende 2026. "Apenas axuda a aforrar enerxía e ten impacto negativo na saúde e na vida da xente", sinala nun vídeo divulgado este luns, a seis días dun novo cambio horario estacional, no que lembra que hai xa seis anos que o Parlamento Europeo apoiou esta medida.

• AMPLIAMOS 👉 O longo camiño da eliminación do cambio de hora, medida apoiada por uns e detestada por outros
• HEMEROTECA | "A crítica ao cambio de hora é un terraplanismo. Moitos non entenden que significa que a Terra sexa redonda"
• HEMEROTECA | Unha hora menos en Galicia (e agora tamén en todo o Estado) 
• HEMEROTECA | Rajoy propón cambiar o fuso horario do Estado tras ridiculizalo o PP cando o pediu o BNG

Israel suspende a entrada de axuda humanitaria en Gaza e bombardea o sur e o centro da franxa. O goberno de Netanyahu acusa a Hamas de violar o cesamento do fogo, algo que a milicia nega. Imaxe: UNRWA