Fálase

A Igrexa dá en admitir que rexistrou ao seu nome un milleiro de bens que non eran seus ao abeiro dunha reforma do Goberno de Aznar e, tras negociar co actual Goberno de España, declárase disposta a devolvelos. Coas controvertidas inmatriculacións, a institución católica inscribira case 35.000 bens, uns 7.000 deles en Galicia dos que máis da metade eran terreos e edificios de uso non relixioso. Na imaxe, Pedro Sánchez este luns co presidente da Conferencia Episcopal Española, Juan José Omella. Tras a xuntanza, emitiron un comunicado conxunto ao respecto.

• HEMEROTECA | A Igrexa rexistrou 7.131 bens en Galicia entre 1998 e 2015, máis da metade terreos e edificios de uso non relixioso

O Obradoiro gaña ao Breogán no derbi da ACB por 100-83. [Imaxe: @OBRADOIROCAB]

A militancia do PSdeG de Ourense reelixe como secretario provincial a Rafael Rodríguez Villarino, portavoz municipal na capital. Impúxose co 57% dos votos fronte ao 42% de Alfredo García, alcalde de Valdeorras. Tras os acordos acadados entre as candidaturas presentadas en Pontevedra e Lugo para que nesas provincias sexan David Regades e José Tomé os responsables provinciais, resta por coñecerse a secretaría na Coruña, onde as primarias son o próximo domingo e compiten as candidaturas de Bernardo Fernández e Noa Díaz.

• HEMEROTECA | Dúas opcións por provincia nas primarias territoriais do PSdeG

Feijóo reivindica “a política que leva aos Parlamentos os problemas da xente” poucos días despois de presentar o PP iniciativas sobre as declaracións do ministro Garzón ou o independentismo en Galicia. O presidente critica nunha reunión dos populares galegos no Parlamento, o Congreso, o Senado e a Eurocámara a quen queira “trasladar á rúa a crispación dalgúns partidos”.

Ana Pontón reclama a Feijóo que  "deixe de propagar bulos, facendo seguidismo da extrema dereita" e "poña en marcha solucións eficaces para garantir prezos xustos á produción de carne" en Galicia. A portavoz nacional do BNG afirmouno durante unha visita a unha explotación gandeira extensiva en Rois, que sinalou como "exemplo dun modelo sustentable, que preserva o territorio, que ofrece unha carne de primeira calidade" e que "precisa que a Xunta se implique" para paliar os baixos prezos.

• Unha ducia de exemplos dun rural produtivo sen macrogranxas
• O Sindicato Labrego advirte de que "as macrogranxas son incompatibles cun rural vivo" e reclama a fin da "frivolidade" ao respecto 

Feijóo confirma que o próximo martes 25 de xaneiro comeza a vacinación coa dose de reforzo ás persoas de 29 anos ou menos -de xeito progresivo e decrecente ata os 18 anos- que recibisen a anterior dose hai máis de cinco meses.

Este xoves culmina o apagado das cubas de Alcoa na Mariña en aplicación do plan que contempla o peche da planta de aluminio de San Cibrao por dous anos a cambio de manter os empregos.

• +INFO 👉 As cubas de Alcoa en San Cibrao xa hibernan e os gobernos prometen vía rápida aos eólicos que a empresa liga á reactivación

Pacto para unha candidatura única no congreso provincial do PSdeG na provincia de Pontevedra, onde David Regades continuará como secretario xeral tras pechar un acordo coa outra aspirante nas primarias, a deputada Paloma Castro. O pacto chega apenas dous días despois de que José Tomé e Xosé María Arias tamén integrasen nunha soa as súas candidaturas ás primarias en Lugo, onde o presidente da Deputación será o novo secretario provincial. [Imaxe: PSdeG]

• Formoso encomenda á nova dirección do PSdeG no Parlamento centrarse en "construír un proxecto socialdemócrata para Galicia"

Estragan con cortes boa parte dos paneis da exposición Galiza, un pobo, unha selección instalada fronte á Deputación de Lugo, na rúa de San Marcos da capital lucense. O responsable de Deportes da Deputación, Efrén Castro, condena "uns actos inxustificables" que, ao seu xuízo, "amosan o que traen os discursos de odio,  que non toleran o diferente e responden con violencia a calquera actividade ou opinión distinta á súa". A exposición está promovida pola plataforma Vía Galega co apoio da institución provincial [Imaxe: Deputación de Lugo]

• VÍDEO | Figuras do deporte amosan nun vídeo o seu apoio ás seleccións galegas

O Burela Futbol Sala, elixido mellor equipo do mundo por segundo ano consecutivo nos Futsalplanet Awards. As xogadoras laranxa gañaron o mes pasado o torneo máis importante a nivel europeo, o Futsal Women's European Champions, un triunfo que se uniu ao seu dominio nas dúas últimas ligas españolas, as tres últimas Copas da Raíña e as dúas últimas Supercopas. Ademais do recoñecemento para o equipo, o seu ex-adestrador Julio Delgado foi escollido como o mellor do mundo e Peque foi votada como a segunda mellor xogadora do planeta.