Fálase

Edís de Alternativa dos Veciños, PP e PSdeG presentan unha moción de censura contra o alcalde de Sada, Benito Portela (Sadamaioría). De ter éxito, a voceira de Alternativa dos Veciños, María Nogareda, actual concelleira de Educación, converteríase na nova alcaldesa a seis meses das eleccións municipais, despois de sinalar hai unhas semanas que daba por "roto" o actual acordo de Goberno con Sadamaioría e BNG. A presentación da moción de censura fíxose sen o coñecemento das direccións de Alternativa dos Veciños e PSdeG, segundo informa La Opinión.

O BNG reclama que "con carácter inmediato" PP, PSOE e Alternativa dos Veciños declaren "tránsfugas" aos seus representantes como "único xeito verificábel de constatar a súa oposición á moción de censura" anunciada en Sada. Pola súa banda, o PSOE provincial da Coruña desautoriza dita moción de censura e anuncia que tomará "medidas disciplinarias" contra os edís que a subscriban, "unhas medidas que suporían a súa expulsión do Partido Socialista".

Defende a Galega celebra o seu venres negro 233 coa vista posta na manifestación que este domingo reclamará “rescatar” a CRTVG e poñela ao servizo da cidadanía.

• Persoal, sindicatos e oposición chaman a unha gran marcha para "rescatar" a CRTVG do "secuestro da Xunta"

A catedrática de Historia Moderna na Facultade de Xeografía e Historia da Universidade de Santiago de Compostela Ofelia Rey Castelao (Arnois, A Estrada, 1956) recibe o Premio Nacional de Historia de España 2022, outorgado polo Ministerio de Cultura e Deporte, pola obra El vuelo corto. Mujeres y migraciones en la Edad Moderna (editada pola USC). 

O xurado destacou este traballo "por ser unha investigación rigorosa con diversidade de fontes históricas que ofrece unha visión integral das migracións das mulleres na Idade Moderna: as intrapeninsulares, as transoceánicas, as de quen o fixeron como persoas libres, semilibres ou cativas ou como exiliadas...".

A Xunta activa a alerta laranxa polo temporal costeiro no noroeste da Coruña e na provincia de Lugo. A Dirección xeral de Emerxencias e Interior da Vicepresidencia Segunda do Goberno galego lembra a importancia de manterse afastado de praias, paseos marítimos, rompentes ou diques; evitar navegar, nadar ou practicar deportes acuáticos; non deterse a sacar fotografías; e aseguar as embarcación. Segundo a AEMET, a peor parte do temporal chegará ao noroeste da provincia da Coruña e á Mariña lucense nas últimas horas deste xoves con ondas de ata seis metros.

Case o 60% da poboación galega de 18 anos solicitou o Bono Cultural de 400 euros que ofrece o Estado para a mocidade desta idade. Foron un total de 12.706 solicitudes, o que supón o 56,05% do total das persoas que podían pedilo, uns dous puntos por baixo da media estatal, segundo datos divulgados pola Delegación do Goberno de España en Galicia. As condicións do bono fixan que se poidan gastar ata 100 euros en produtos culturais físicos como libros ou discos, outros 100 en produtos dixitais como prensa, servizos de podcast ou videoxogos  e os restantes 200, en artes escénicas e musicais ou museos.

• Esgotado o Bono Cultura da Xunta menos dunha hora despois de abrir o prazo para pedilo
• HEMEROTECA | Feijóo defende que o bono cultural do Estado pretende comprar votos e o da Xunta non

PARO REXISTRADO | As inscricións nas oficinas de emprego descenderon un -0,27% en Galicia (389 menos) en outubro e quedan en 143.720. Son 10.325 menos que un ano antes (-6,70%). Na media estatal caen un -0,92% (-27.027, o mellor dato da serie neste mes) e o descenso interanual é do -10,51%. No mesmo mes, a afiliación media á Seguridade Social descendeu un -0,06% (646 menos) e queda en 1,048 millóns de persoas ocupadas, un 1,55% máis que hai un ano, mentres que na media estatal a afiliación aumenta un 0,51% mensual e un 3,01% interanual. 

• AMPLIAMOS 👉 Galicia súmase pola mínima á inusual baixada do paro rexistrado en outubro e o emprego cae mentres sobe na media estatal
• EPA | Galicia encabeza a suba interanual do paro malia caer no verán mentres sobe na media estatal

Iberdrola programou o web da súa tarifa regulada de luz e gas para que fose imposible atopala en Google. Cóntao elDiario.es ao fío do achado do avogado experto en tecnoloxía Samuel Parra, que o divulgou na súa conta de Twitter. Tras a forte repercusión da denuncia pública, a compañía eléctrica corrixiu o código do web para que si apareza nos buscadores.

• HEMEROTECA | O presidente de Iberdrola cualifica de "parvos" á poboación que ten a tarifa regulada da luz
• HEMEROTECA | A Audiencia Nacional procesa a Iberdrola por manipular as súas centrais no Sil para inflar os prezos da electricidade

Ana Pontón retoma este venres axenda internacional en Dublín cun encontro coa líder do Sinn Féin, Mary Lou McDonald, cadrando co congreso da formación irlandesa. Segundo resalta o BNG; "ambas comparten ser líderes das súas formacións, lograren os mellores resultados electorais da historia das súas forzas e aspiran a presidir os gobernos dos seus países na próxima cita coas urnas". A formación soberanista liga este encontro cos recentes contactos mantidos pola súa portavoz nacional en Colombia, Chile ou Uruguai, entre outros.

• HEMEROTECA | "O cambio de ciclo político xa empezou e a alternativa con vocación maioritaria é o BNG"
• HEMEROTECA | A tese política da asemblea do BNG bosquexa o plan co que procurará "prepararse para gobernar"

Esgotado o Bono Cultura da Xunta pouco despois de abrir o prazo para solicitalo, a pasada medianoite. Testemuños de solicitantes que tentaron acceder a el despois da 1 da pasada madrugada apuntan a que xa non o lograron, polo que a que axuda de 50 euros para adquirir produtos e servizos culturais ficou esgotada en apenas unha hora, segundo confirma a propia Xunta. O Goberno galego ofrecía 20.000 destes vales para a iniciativa, á que ata este 1 de novembro xa se adheriran unhas 400 empresas, segundo datos da Consellería. As bases do bono fixan que a súa concesión está rexido por un sistema de concorrencia non competitiva, o que implica que se adxudican por orde de solicitude.

• HEMEROTECA | Feijóo defende que o bono cultural do Estado pretende comprar votos e o da Xunta non

Unha decena de colexios profesionais de xornalistas súmase aos chamamentos a participar na mobilización Por unha CRTVG ao servizo do pobo convocada polo comité intercentros dos medios públicos e medio cento de colectivos para o vindeiro 6 de novembro en Santiago. O Colexio Profesional de Xornalistas de Galicia e os seus homólogos noutras nove autonomías sinalan que a manifestación persegue obxectivos longamente reivindicados por estas entidades profesionais, tales como que os medios públicos ofrezan "información libre e ao servizo dos valores democrático" e non sometida "aos intereses políticos de quenda". Na imaxe, presentación da mobilización do 6 de novembro.

• O comité da CRTVG acusa a dirección de "represalias" por convocar a manifestación "en rescate dos medios públicos"
• Persoal, sindicatos e oposición chaman a unha gran marcha para "rescatar" a CRTVG do "secuestro da Xunta"