Iberdrola programou o web da súa tarifa regulada de luz e gas para que fose imposible atopala en Google. Cóntao elDiario.es ao fío do achado do avogado experto en tecnoloxía Samuel Parra, que o divulgou na súa conta de Twitter. Tras a forte repercusión da denuncia pública, a compañía eléctrica corrixiu o código do web para que si apareza nos buscadores.
Ana Pontón retoma este venres axenda internacional en Dublín cun encontro coa líder do Sinn Féin, Mary Lou McDonald, cadrando co congreso da formación irlandesa. Segundo resalta o BNG; "ambas comparten ser líderes das súas formacións, lograren os mellores resultados electorais da historia das súas forzas e aspiran a presidir os gobernos dos seus países na próxima cita coas urnas". A formación soberanista liga este encontro cos recentes contactos mantidos pola súa portavoz nacional en Colombia, Chile ou Uruguai, entre outros.
Esgotado o Bono Cultura da Xunta pouco despois de abrir o prazo para solicitalo, a pasada medianoite. Testemuños de solicitantes que tentaron acceder a el despois da 1 da pasada madrugada apuntan a que xa non o lograron, polo que a que axuda de 50 euros para adquirir produtos e servizos culturais ficou esgotada en apenas unha hora, segundo confirma a propia Xunta. O Goberno galego ofrecía 20.000 destes vales para a iniciativa, á que ata este 1 de novembro xa se adheriran unhas 400 empresas, segundo datos da Consellería. As bases do bono fixan que a súa concesión está rexido por un sistema de concorrencia non competitiva, o que implica que se adxudican por orde de solicitude.
Unha decena de colexios profesionais de xornalistas súmase aos chamamentos a participar na mobilización Por unha CRTVG ao servizo do pobo convocada polo comité intercentros dos medios públicos e medio cento de colectivos para o vindeiro 6 de novembro en Santiago. O Colexio Profesional de Xornalistas de Galicia e os seus homólogos noutras nove autonomías sinalan que a manifestación persegue obxectivos longamente reivindicados por estas entidades profesionais, tales como que os medios públicos ofrezan "información libre e ao servizo dos valores democrático" e non sometida "aos intereses políticos de quenda". Na imaxe, presentación da mobilización do 6 de novembro.
Greenpeace sinala Pontevedra como "exemplo a seguir" co gallo do Día das Cidades e demanda "urbes a medida das persoas e non dos coches" na presentación do documental 'REinventando Pontevedra', no que fai fincapé na redución a cero dos atropelos mortais, a redución da contaminación e as facilidades para realizar desprazamentos a pé. A entidade pide ao resto de cidades aplicar medidas semellantes aproveitando a posta en marcha das Zonas de Baixas Emisións
Lula da Silva volverá ser presidente do Brasil tras impoñerse ao ultradereitista Jair Bolsonaro na segunda volta das eleccións presidenciais polo 50,9% dos votos. Na fin do escrutinio, Lula logra 60,3 millóns de sufraxios fronte a 58,2 millóns obtidos polo ata agora presidente brasileiro.
Treixadura chora a morte de Antón Cabaleiro, integrante do grupo. "Non hai palabras que reconforten a alma", sinalan na nota na que confirmaron o seu pasamento. "Quédanos darlle grazas á vida por ternos ofrecido a compaña dun home tan entrañable, por ternos permitido gozar de tantas horas de viaxes, de anécdotas e da túa calor. Sentímonos orgullosos de ti, que es parte dos bos e xenerosos", engaden. As mostras de condolencia polo falecemento de quen tamén fora integrante d'A Roda chegaron dende diversas voces da música e da cultura galega e tamén por parte do PSdeG, formación pola que fora concelleiro en Redondela [Imaxe: © Treixadura]
As pementeiras de Padrón, a gandeira e sindicalista María Isabel Liñares, a maxistrada Paz Filgueira e a xornalista e xefa de informativos de Radio Galicia - Cadena SER, Aida Pena, foron galardoadas este sábado pola Federación de Asociacións de Mulleres Rurais de Galicia (Fademur - Galicia) dentro dos seus actos para celebraren o Día da Muller Rural, que se conmemora cada 15 de outubro. "O avellentamento, a falla de relevo xeracional no sector primario e as carencias en servicios do rural" centraron o acto, celebrado no Palacio de Congresos de Galicia, en Santiago.
O Concello de Viveiro celebrou este sábado o nomeamento do atleta Adrián Ben como fillo predilecto en recoñecemento "aos seus valores humanos e profesionais" como "figura do atletismo", "demostra o seu sexto posto no Mundial de Doha en 2019 e a histórica quinta praza que acadou nos Xogos Olímpicos de Tokio en 2021 na modalidade de 800 metros lisos". A alcaldesa viveirense, María Loureiro, sinala que "a participación de Adrián Ben nos Xogos Olímpicos foi unha luz ao final do túnel que encheu de ilusión as nosas rúas e os nosos fogares" tras o peor da pandemia. [Imaxe: © Concello de Viveiro]
Este sábado desenvólvese na Coruña a segunda xornada do XXI Simposio da Rede Renda básica. As sesións desenvólvense no paraninfo da Universidade da Coruña e pódense seguir tamén ao vivo a través de internet. Dúas delas están moderadas por María Yáñez, directora de VINTE (Renda Básica e cultura como proxecto de vida), e mais por David Lombao, director de Praza.gal (A renda ou a vida: conversa sobre Renda Básica). Praza colabora coa organización deste simposio.