Fálase

Treixadura chora a morte de Antón Cabaleiro, integrante do grupo. "Non hai palabras que reconforten a alma", sinalan na nota na que confirmaron o seu pasamento. "Quédanos darlle grazas á vida por ternos ofrecido a compaña dun home tan entrañable, por ternos permitido gozar de tantas horas de viaxes, de anécdotas e da túa calor. Sentímonos orgullosos de ti, que es parte dos bos e xenerosos", engaden. As mostras de condolencia polo falecemento de quen tamén fora integrante d'A Roda chegaron dende diversas voces da música e da cultura galega e tamén por parte do PSdeG, formación pola que fora concelleiro en Redondela [Imaxe: © Treixadura]

• HEMEROTECA | Treixadura celebra os seus 30 anos co libro-disco 'Camiño Longo'

As pementeiras de Padrón, a gandeira e sindicalista María Isabel Liñares, a maxistrada Paz Filgueira e a xornalista e xefa de informativos de Radio Galicia - Cadena SER, Aida Pena, foron galardoadas este sábado pola Federación de Asociacións de Mulleres Rurais de Galicia (Fademur - Galicia) dentro dos seus actos para celebraren o Día da Muller Rural, que se conmemora cada 15 de outubro. "O avellentamento, a falla de relevo xeracional no sector primario e as carencias en servicios do rural" centraron o acto, celebrado no Palacio de Congresos de Galicia, en Santiago.

• HEMEROTECA | "Semella que se acepta como natural a posición subsidiaria das mulleres no agro"
• HEMEROTECA | 'Nós, as Mulleres': a loita por derrubar as barreiras no acceso aos postos de dirección das cooperativas agrarias 

O Concello de Viveiro celebrou este sábado o nomeamento do atleta Adrián Ben como fillo predilecto en recoñecemento "aos seus valores humanos e profesionais" como "figura do atletismo", "demostra o seu sexto posto no Mundial de Doha en 2019 e a histórica quinta praza que acadou nos Xogos Olímpicos de Tokio en 2021 na modalidade de 800 metros lisos". A alcaldesa viveirense, María Loureiro, sinala que "a participación de Adrián Ben nos Xogos Olímpicos foi unha luz ao final do túnel que encheu de ilusión as nosas rúas e os nosos fogares" tras o peor da pandemia. [Imaxe: © Concello de Viveiro]

• HEMEROTECA | Da Mariña á historia: Adrián Ben acada o quinto posto nos 800 metros en Toquio
• EN VINTE (2020) | Adrián Ben: “O deporte é un entretemento, o importante agora é curar a pandemia para que axiña poidamos gozar del”

Este sábado desenvólvese na Coruña a segunda xornada do XXI Simposio da Rede Renda básica. As sesións desenvólvense no paraninfo da Universidade da Coruña e pódense seguir tamén ao vivo a través de internet. Dúas delas están moderadas por María Yáñez, directora de VINTE (Renda Básica e cultura como proxecto de vida), e mais por David Lombao, director de Praza.gal (A renda ou a vida: conversa sobre Renda Básica). Praza colabora coa organización deste simposio.

• ENTREVISTA | Sergi Raventós: "O plan piloto vai amosar se unha persoa que recibe renda básica acepta empregos ou condicións laborais non desexables"

A ponte de Todos os Santos principia este sábado en Galicia con avisos amarelos por chuvia e vento nas provincias da Coruña e Pontevedra e boa parte do litoral Atlántico, así como na Mariña e en áreas montañosas de Lugo e Ourense, segundo informa MeteoGalicia

A Xunta asegura que “nunca” apoiará “a supresión de servizos” ferroviarios en Galicia tras xustificar a que Rajoy aplicou en 2013. Hai unha década o Goberno de Feijóo considerou o peche de estacións e a desaparición de trens un “axuste” ou “racionalización” de servizos.

• HEMEROTECA (2013) | O PPdeG avala o recorte ao ferrocarril galego por "lóxico" e "responsable”
• HEMEROTECA (2019) | Renfe suprime a venda presencial de billetes en 8 estacións e a Xunta rexéitao tras xustificar en 2013 o peche de 22

A CIG volve denunciar, como xa fixera CSIF, a demora de máis de sete anos da Xunta en suprimir un ente paralelo, que está supoñer máis soldo para a conselleira de Infraestruturas, Ethel Vázquez.

• HEMEROTECA (2016) | A Xunta suprimiu un chiringuito pero mantén ao seu persoal soldos maiores que ao resto
• HEMEROTECA (2021) | A Xunta facilita a varios altos cargos manter soldos con trienios máis altos que o resto do persoal

O PP volve bloquear a renovación do Consello Xeral do Poder Xudicial, que leva catro anos con mandato caducado. A dirección de Feijóo alega que agora o fai porque o Goberno de España pretende diminuír as condenas por sedición e o PSOE coida que o ex-presidente da Xunta atende os ditados da "dereita máis reaccionaria" para manter o bloqueo deste poder do Estado. Coa actual normativa, a participación dos conservadores é imprescindible nesta renovación. Na imaxe, Pedro Sánchez recibe a Feijóo na Moncloa o pasado 10 de outubro para tratar a renovación do Poder Xudicial despois da dimisión do presidente do Consello, Carlos Lesmes. [© Pool Moncloa/Borja Puig de la Bellacasa]

• CRÓNICA | Pactar con Feijóo: do Estatuto bloqueado e os Valedores falidos ao Poder Xudicial do Estado

Rueda defende que o seu Goberno ten "moitas cousas en común" co de Madrid e afirma compartir con Isabel Díaz Ayuso un "modelo de xestión" baseado na "xestión seria e estable" e nas "rebaixas de impostos para paliar a incerteza". O presidente da Xunta afirmouno durante unha visita da presidenta da comunidade madrileña a Ordes, onde afirmou que estes principios se reflicten nos orzamentos de ambos gobernos para 2023, con "gran contido social". [Imaxe: CC BY-SA David Cabezón]

• CRÓNICA | Saír a Ordes con Ayuso
• A Xunta ingresará 650 millóns máis en 2023 polos impostos cos que o PP acusa a Pedro Sánchez de "forrarse"

O Banco Central Europeo volve incrementar os tipos de xuro, desta volta noutros 0,75 puntos e sitúaos no 2% tras mantelos máis de media década ao 0%. O BCE volve argumentar que o fai para tentar conter a inflación e avanza que aplicará novos incrementos, contribuíndo a continuar encarecendo moitas hipotecas e os préstamos para a cidadanía e as empresas, así como o financiamento para as institucións públicas. Na imaxe, Christine Lagarde e Luis de Guindos na comparecencia ante a prensa na que anunciaron a decisión [CC BY-NC-ND ECB]

• HEMEROTECA | Os falcóns do BCE impoñen unha suba histórica de tipos de xuro que pode acelerar unha recesión