Fálase

O PP volve bloquear a renovación do Consello Xeral do Poder Xudicial, que leva catro anos con mandato caducado. A dirección de Feijóo alega que agora o fai porque o Goberno de España pretende diminuír as condenas por sedición e o PSOE coida que o ex-presidente da Xunta atende os ditados da "dereita máis reaccionaria" para manter o bloqueo deste poder do Estado. Coa actual normativa, a participación dos conservadores é imprescindible nesta renovación. Na imaxe, Pedro Sánchez recibe a Feijóo na Moncloa o pasado 10 de outubro para tratar a renovación do Poder Xudicial despois da dimisión do presidente do Consello, Carlos Lesmes. [© Pool Moncloa/Borja Puig de la Bellacasa]

• CRÓNICA | Pactar con Feijóo: do Estatuto bloqueado e os Valedores falidos ao Poder Xudicial do Estado

Rueda defende que o seu Goberno ten "moitas cousas en común" co de Madrid e afirma compartir con Isabel Díaz Ayuso un "modelo de xestión" baseado na "xestión seria e estable" e nas "rebaixas de impostos para paliar a incerteza". O presidente da Xunta afirmouno durante unha visita da presidenta da comunidade madrileña a Ordes, onde afirmou que estes principios se reflicten nos orzamentos de ambos gobernos para 2023, con "gran contido social". [Imaxe: CC BY-SA David Cabezón]

• CRÓNICA | Saír a Ordes con Ayuso
• A Xunta ingresará 650 millóns máis en 2023 polos impostos cos que o PP acusa a Pedro Sánchez de "forrarse"

O Banco Central Europeo volve incrementar os tipos de xuro, desta volta noutros 0,75 puntos e sitúaos no 2% tras mantelos máis de media década ao 0%. O BCE volve argumentar que o fai para tentar conter a inflación e avanza que aplicará novos incrementos, contribuíndo a continuar encarecendo moitas hipotecas e os préstamos para a cidadanía e as empresas, así como o financiamento para as institucións públicas. Na imaxe, Christine Lagarde e Luis de Guindos na comparecencia ante a prensa na que anunciaron a decisión [CC BY-NC-ND ECB]

• HEMEROTECA | Os falcóns do BCE impoñen unha suba histórica de tipos de xuro que pode acelerar unha recesión

O Congreso rexeita as emendas de devolución dos Orzamentos Xerais do Estado formuladas polo PP, Vox, Junts, CUP, Foro Asturias e os dous deputados expulsados de UPN. As contas estatais para 2023 seguen adiante coa súa tramitación tras decaer os vetos con 186 votos en contra, 159 a prol e 3 abstencións. [Foto: © Congreso]

• O Estado orzamenta uns 1.070 millóns de investimento en Galicia por segundo ano consecutivo
• Da suba dun 8,5% nas pensións á continuidade dos trens gratis: primeiras claves do terceiro orzamento do PSOE e UP

EPA | A poboación ocupada aumentou en 8.500 persoas en Galicia durante o terceiro trimestre do ano e chega aos 1,12 millóns, o que supón un 0,77% máis que no trimestre previo, un incremento superior á media estatal (+0,38%), e un 0,11% máis que hai un ano (+2,57% na media). No mesmo trimestre, a poboación en desemprego diminuíu en 4.600 persoas ata quedar nunhas 134.800, isto é, un -3,30% trimestral mentres que na media estatal aumenta un 2,08% por subas superiores ao 10% en territorios como Murcia, Asturias ou Madrid. O total de persoas en paro é en Galicia un 6,42% superior ao de hai un ano e na media estatal rexístrase unha diminución interanual do -12,78%. 

• AMPLIAMOS 👉 Galicia encabeza a suba interanual do paro malia caer no verán mentres sobe na media estatal

Un neno de 13 anos morre ao caer a parede dun vestiario no IES Julio Prieto Nespereira de Ourense, segundo informa o 112. Outro estudante resultou ferido leve. O caso recaeu no xulgado número 3 da cidade, en funcións de garda, que ademais de autorizar o levantamento do cadáver do menor falecido e a realización da autopsia, deu orde de precintar a zona e fotografala e encargou xa un informe técnico sobre o estado do muro, segundo confirma o TSXG.

A CIG convoca unha folga indefinida nos Servizos de Axuda no Fogar a partir do 2 de novembro e rexeita o preacordo de CCOO e UGT coa patronal para renovar o convenio do sector. O sindicato nacionalista denuncia que este convenio prevé subas salariais por debaixo do IPC e "introduce unha dobre escala salarial que suporá unha discriminación en función do concello no que se traballe" 

• AMPLIAMOS 👉 Folga indefinida na axuda no fogar: "Abocan as traballadoras á pobreza"
• As traballadoras de axuda no fogar pelexan ante Xunta e concellos pola suba salarial do 6,5% que esixe o seu convenio

O Banco Santander logra un beneficio récord de 7.316 millóns de euros ata setembro, segundo a información remitida á CNMV, o que supón un crecemento do 25% interanual. Nesta mesma xornada, a eléctrica Iberdrola vén de presentar uns resultados con ganancias de 3.104 millóns "malia á caída do 14% en España", di a compañía. Ambas empresas están atinxidas polos impostos extraordinarios que ultima o Goberno de España e as dúas rexéitanos. Na imaxe, a presidenta do Banco Santander, Ana Patricia Botín, e o presidente de Iberdrola, Ignacio Sánchez Galán. [© Banco Santander | © Iberdrola]

• A UE chama ao aforro enerxético e recortará os beneficios das eléctricas: "O mercado xa non funciona"
• Sánchez anuncia impostos extra a enerxéticas e bancos, trens de balde e máis bolsas para combater a crise de prezos

Continúan polas principais cidades as concentracións previas á manifestación para "rescatar" a CRTVG do "secuestro da Xunta". Este xoves, persoal do comité intercentros dos medios públicos e das organizacións que apoian a mobilización concentráronse en Vigo para "chamar a participar" na mobilización do 6 de novembro en Santiago.

Marilar Aleixandre, galardoada co Premio Nacional de Narrativa 2022 -que concede o Ministerio de Cultura- pola súa obra As malas mulleres. A resolución destaca "a súa orixinal estrutura híbrida que a converte nunha singular novela histórica sobre a situación carceraria das mulleres no século XIX, cun admirable dominio do diálogo e da linguaxe"

• AMPLIAMOS 👉 'As malas mulleres' de Marilar Aleixandre gañan un Premio Nacional de Narrativa ata agora inzado de homes