Fálase

Pablo Casado asegura que a enerxía de orixe solar non pode ser empregada cando é de noite porque "non emite". O líder do PP afirmouno durante un acto de partido no que tamén se mofou de que "a esquerda" se "queixe de que os muíños", en referencia aos aeroxeradores eólicos, "danan a paisaxe". Posteriormente, a súa contorna e el mesmo nas redes sociais indicaron que se refería a que a enerxía con esta orixe non pode ser xerada de noite nin almacenada a gran escala. Recolle as súas palabras este vídeo de ElHuffPost

Comeza en Santiago a manifestación da plataforma SOS Sanidade Pública, convocada baixo o lema Salvemos a atención primaria!. 

• AMPLIAMOS 👉 Clamor na defensa da Atención Primaria na primeira protesta multitudinaria pola sanidade pública galega dende o inicio da pandemia
• Á xestoría para dar pedido cita en Atención Primaria do Sergas: a fenda dixital xa impacta na saúde

A Asemblea Xeral da Rede Europea pola Igualdade das Linguas, que concluíu este sábado en Santiago, secunda a reclamación de "tratamento igualitario de todas as linguas oficiais na nova Lei do Audiovisual". No encontrou, no que A Mesa pola Normalización Lingüística actuou como anfitrioa, os colectivos subliñaron tamén o seu rexeitamento ao vixente decreto sobre uso das linguas no ensino en Galicia.

• A Europa multilingüe cítase en Compostela coa Mesa pola Normalización Lingüística como anfitrioa

Competencia abre unha investigación ás eléctricas por non emitir facturas desde xuño. A CNMC traballa en coordinación coas comunidades autónomas e o Ministerio de Consumo. Os atrasos na facturación provocaron xa queixas de particulares e organizacións en Galicia. 

• Atrasos de ata cinco meses na facturación da luz xeran "alarma" en particulares e empresas en Galicia

A Xunta aproba a esixencia de certificado COVID (de vacinación, proba negativa ou enfermidade superada) para acompañantes de pacientes ingresados nos hospitais. O conselleiro de Sanidade sinala que o Goberno galego "estuda" pedilo "noutras contornas" aínda non concretadas. [Imaxe: Praza.gal / Cedida]

• AMPLIAMOS 👉 A Xunta aproba esixir o certificado COVID para acompañantes de persoas hospitalizadas e cribará o persoal sanitario non vacinado
• DATOS | As vacinas amortecen as subas de incidencia e minimizan o seu impacto nos hospitais na 'nova normalidade' da COVID

Non foron 35 anos de coma, senón un grave accidente en 1979 con secuelas prolongadas durante décadas nas que alternou fases de catatonía con momentos de lucidez. GCiencia detalla o caso do escritor Manel Monteagudo (José Manuel Blanco) e as propias explicacións que o autor ofreceu publicamente sobre a súa doenza e circunstancias persoais anos antes de saltar a multitude de medios de comunicación coa versión divulgada nas últimas semanas. O propio José Manuel Blanco introduciu estes matices no seu relato este venres en declaracións aos medios.

• En GCiencia: Manel Monteagudo non estivo 35 anos en coma: a escuridade intermitente do escritor galego

O Congreso aproba o nomeamento dos novos maxistrados do Tribunal Constitucional despois do pacto entre PSOE e PP para a selección de candidatos, entre os que figura Enrique Arnaldo, que incumpriu o Estatuto do Congreso na etapa na que foi coordinador xurídico de varias comisións da Cámara baixa. O pleno do Congreso tamén aprobou o nomeamento de Ángel Gabilondo [na imaxe ©PSOE], ex portavoz do Grupo Parlamentario Socialista na Asamblea de Madrid e ex Ministro de Educación, como Defensor del Pueblo. 

Entre as maxistradas que se incorporan ao Constitucional, que leva máis de dous anos con estas vacantes, están tamén Concepción Espejel –que se recusou no caso da Gürtel–, Inmaculada Montalbán e Juan Ramón Sáez. No momento da votación na Cámara, os grupos soberanistas abandonaron a sesión, entre eles o BNG, en sinal de protesta.

A Audiencia de Lugo ordena reabrir o caso da Maruxaina ao entender que se comprometeu a intimidade das mulleres gravadas ouriñando. Hai unhas semanas o xuíz instrutor do caso reiterara que non vía delito nesas gravacións.

• 👉 AMPLIAMOS | A Audiencia de Lugo ordena reabrir o caso das gravacións de mulleres na Maruxaina difundidas en webs pornográficas

Asociacións da patronal do transporte anuncian un paro da actividade nas súas empresas para vésperas de Nadal como protesta contra o Goberno de España. Este paro patronal está programado do 20 ao 22 de decembro e, segundo estas organizacións empresariais, "só un cambio radical e urxente" en diferentes políticas a respecto do sector podería evitalo.

O Goberno de España e a UE publican o documento coas condicións dos fondos europeos de recuperación pola COVID. Feijóo acusou esta mañá a Pedro Sánchez de ocultalo e esixiu ao PSdeG que o revelase. Entre os compromisos adquiridos figura incrementar o período de cálculo das pensións. Pódese consultar íntegro nesta ligazón.