O Baxi Ferrol, a un paso da final da Eurocopa tras vencer o Asvel francés 93-62. O equipo galego defenderá unha renda de 31 puntos en Lyon na volta da competición europea, na que continúa a facer historia nunha Malata ateigada. Foto. FEB.
Fálase
-
O PP retira un vídeo para acusar de "corrupción" a Pedro Sánchez tras unha protesta formal do Goberno da República Dominicana. Na montaxe, realizada con intelixencia artificial -na imaxe, unha captura do vídeo- o equipo de Alberto Núñez Feijóo situaba o presidente do Goberno de España, á súa esposa e outros cargos e ex-cargos nun espazo chamado La isla de las corrupciones ilustrada coa bandeira dese país
Máis de 600 sinaturas suma xa o manifesto de apoio aos concelleiros socialistas de Santiago expulsados do grupo municipal do PSdeG. Á carta que asinan Touriño, Bugallo ou os rexedores de Ames e Padrón súmanse históricos do partido como Francisco Cerviño ou a ex-concelleira de CA, Noa Morales. As edís Mercedes Rosón e Mila Castro agradecen o apoio da cidadanía.
Familias afectadas pola falta de pediatras na Terra Chá entregan máis de 2.000 sinaturas a Sanidade pedindo que se restableza o servizo. Nais e pais de Castro de Rei, Cospeito e Outeiro de Rei levan milleiros de firmas á sede da Xunta en Lugo e denuncian a "desatención sanitaria para as crianzas" e a "inseguridade" pola falta de atención pediátrica nos tres municipios.
A enquisa da Generalitat Valenciana ás familias sobre a "lingua base" do ensino dá como resultado unha vitoria do valenciano por un 50,53%. En dúas das tres provincias a lingua valenciana foi a preferencia, cun 70,5% en Castelló e un 58% en València, mentres que en Alacant se impuxo o castelán cun 66%. A participación na consulta foi do 58,61%. O PP retornou á Xunta prometendo condicionar o idioma das aulas a unha consulta coma esta, pero ao formalizalo en 2010 o plan acabou tombado polo Tribunal Superior. Previamente, a Xunta fixera unha enquisa ás familias da que non divulgou os datos íntegros; esas cifras, como informou Praza.gal, acabaron vendo a luz mediante unha investigación académica en 2016.
- A forte caída no uso de galego e catalán contrasta co auxe do éuscaro no País Vasco
- HEMEROTECA | 8F do 2009: a outra foto 'ultra' que Feijóo esquivou (pero Rueda, non)
- HEMEROTECA | Feijóo xa ensaiou o control paterno do ensino e tombouno a Xustiza
- HEMEROTECA | 'Os datos secretos do galego': Así responderon as familias á consulta lingüística da Xunta
O pleno no que o socialista Miguel Fernández será elixido novo alcalde de Lugo celebrarase o martes 11 ás 19:00. Rubén Arroxo, tenente da alcaldía polo BNG e actualmente alcalde en funcións tras o falecemento da alcaldesa Paula Alvarellos, confirma a data da investidura de Fernández e aplaude a "axilidade" do PSdeG por "resolver esta situación en tempo récord nun momento moi complicado". Arroxo, que destaca a súa "boa relación persoal" co vindeiro rexedor, sinala que a prioridade principal do goberno segue sendo a "aprobación definitiva dos orzamentos" xa acordados e "completar" proxectos que "xa estaban na grella de saída" como a ordenanza de terrazas ou organización do tráfico na zona histórica cara ao remate das obras de peonalización. Na imaxe, Fernández recollendo un premio ao Concello como edil de Transición Ecolóxica.
O conselleiro Diego Calvo asume o despacho dos asuntos da Presidencia da Xunta pola viaxe de Alfonso Rueda á Arxentina e Uruguai, que principiou a pasada noite e se prolonga ata o día 10. Na imaxe, o presidente o pasado serán no aeroporto madrileño de Barajas, no inicio da viaxe. Na Arxentina residen máis de 165.000 persoas inscritas no censo de "residentes ausentes" das provincias galegas e no Uruguai, máis de 36.000; a maioría desta poboación descende de galegas e galegos que emigraron no pasado [CC BY-SA David Cabezón / Xunta]
A Fundació la Caixa e Criteria, a división empresarial de Caixabank, devolven as súas sedes a Barcelona oito anos despois de trasladárenas a Palma en vésperas do referendo do 1 de outubro de 2017. Caixabank, non obstante, seguirá tendo a sede en València, onde a instalou daquela polo mesmo motivo. [Imaxe: © Fundación La Caixa]
Rajoy nega no Congreso que existise a 'Operación Cataluña' e que ordenase a espionaxe a Podemos. O ex-presidente do Goberno de España compareceu este mércores na comisión que investiga a trama parapolicial contra o independentismo catalán reivindicando o labor do Executivo do PP contra o procès ao "parar" un "golpe de Estado". Rajoy botou man da retranca en diversos tramos da comparecencia para, entre outras cuestións, retrucar á líder de Podemos cando Ione Belarra fixo mención ao seu "gracejo" engadindo o comentario de que "os galegos non teñen sona de graciosos".
O Concello de Moaña ratifica formalmente a súa oposición a que a parella de Feijóo obteña unha concesión do terreo público de acceso á praia do seu chalé ata 2037. O concello moañés quere incluír ese terreo no miradoiro lindeiro. O proceso para recuperar o uso público do terreo de dominio público marítimo-terrestre ata agora pechado conxuntamente coa propiedade de Eva Cárdenas foi iniciado por Costas en novembro do ano pasado, como desvelou en exclusiva Praza.gal.
