Fálase

Este luns inaugúrase no Teatro Principal de Pontevedra a XXVII Semana de Filosofía, que afondará na 'Filosofía e civilización dixital'. As conferencias, que rematarán o sábado 9, serán retransmitidas a través da rede, pero tamén se poderán seguir de forma presencial no Teatro, con capacidade limitada. A edición 2020, co mesmo programa, tivo que ser adiada en dúas ocasións por mor da pandemia de Covid-19. Entre outras persoas, participarán Albino Prada, Antonio Lafuente, Belén Castellanos, Santiago López Petit ou Antonio Rial Boubeta

O incendio que afectou á parroquia de Meiraos, en Folgoso do Courel, foi extinguido despois de queimar 300 hectáreas de terreo. Obrigou a activar momentaneamente a sitaución 2 pola proximidade do lume ás casas do lugar de Portela, na parroquia de Gundriz do municipio limítrofe de Samos. Outros incendios, en Cerdedo-Cotobade, Rodeiro, Monforte de Lemos e Calvos de Randín, queimaron ao redor de 200 hectáreas.

Este 2 de abril, venres santo, Praza.gal non se actualiza por descanso do persoal. Regresamos o sábado e, mentres, deixamos moito para ler :)

A Real Academia Galega de Belas Artes celebrou este 1 de abril o Día das Artes Galegas coa homenaxe a Domingo de Andrade, a quen xa lle dedicara a celebración en 2020, adiada a causa da pandemia. A institución distinguiuno como "formulador da imaxe de Santiago na contorna da Catedral". Os actos de homenaxe inclúen a instalación dunha placa conmemorativa na capela da Concepción da Catedral compostelá, onde está soterrado.

Un incendio forestal queimou xa unhas 30 hectáreas na parroquia de Marcelle, en Monforte. Segundo informa Medio Rural, un dos avións que participa nos traballos de extinción sufriu o rebentón dunha roda mentres cargaba auga en Doade (Sober). Na imaxe, bombeiros da Brif de Laza traballando neste incendio. (Foto: Brif Laza)

O BOE publica o nomeamento de José Miñones como novo delegado do Goberno de España en Galicia e tamén os cambios no Executivo de Pedro Sánchez tras a saída de Pablo Iglesias, entre eles o nomeamento da ministra de Traballo, Yolanda Díaz, como vicepresidenta terceira. Díaz e o resto de membros do Goberno que asumen novas responsabilidades prometen os seus cargos esta mañá. Na imaxe, Sánchez e as catro vicepresidentas, este martes na Moncloa. (Foto: ©Borja Puig de la Bellacasa / Goberno de España)

O Goberno de España recorre ao Tribunal Constitucional a reforma sanitaria galega. Tras a aprobación o 23 de febreiro da lei no Parlamento de Galicia, o Executivo de Sánchez pediu hai dúas semanas un ditame ao Consejo de Estado por considerar que pode afectar a dereitos fundamentais e este martes o Consejo de Ministros decidiu presentar o recurso.

• AMPLIAMOS 👉 O recurso do Estado no Constitucional suspende o artigo da reforma sanitaria da Xunta que atinxe a dereitos fundamentais
• HEMEROTECA | A polémica da vacinación solapa o impacto nos dereitos fundamentais e o réxime sancionador na reforma sanitaria do PP

A Xunta mantén Beade como único concello con peche perimetral e o resto de máximas restricións pola COVID-19 dende o vindeiro venres, 2 de abril. Dende esa mesma xornada, 11 municipios quedan no nivel alto, ao que se suman O Irixo, A Pobra do Brollón e Rábade. Mentres, Vilardevós descende ao nivel medio, ao que se engaden Moaña, Gondomar, Meis e Carral. O resto de concellos pasan ao nivel baixo ou continúan nel. Así o vén de confirmar a Consellería de Sanidade. Máis información, esta tarde en Praza.gal.

• INTERACTIVO | Mapa de restricións da Xunta pola COVID-19 dende o 2 de abril de 2021
• AMPLIAMOS 👉 Sanidade mantén un só concello pechado pola COVID e constata estabilidade xeral da pandemia agás na área de Vigo

O alcalde de Ames, José Miñones, será o novo delegado do Goberno de España en Galicia en substitución de Javier Losada, segundo conta Radio Galicia-Cadena SER Losada ocupaba o cargo dende xuño de 2018, apenas dúas semanas despois da moción de censura tras a que Pedro Sánchez chegou por primeira vez á presidencia do Executivo.

• AMPLIAMOS 👉 O Goberno de España encomenda a súa delegación galega a José Miñones en substitución de Javier Losada

Logran reflotar e desencallar o Ever Given, o cargueiro que estaba a atrancar o canal de Suez dende a pasada semana, obstaculizando o tráfico marítimo mundial. (Imaxe: Vessel Finder)