A maior parte dos representantes dos países presentes na Asemblea Xeral da ONU abandonaron a sala no momento en que ía intervir o primeiro ministro israelí, Benjamín Netanyahu. Netanyahu anuncia que seguirá adiante co xenocidio en Gaza. Podes seguir aquí a sesión en directo.
A Xunta e o Goberno de España negociarán dende outubro o traspaso das competencias sobre aeródromos e permisos de traballo de persoas estranxeiras. Así o acordaron este venres o secretario de Estado de Política Territorial, Arcadi España, e o conselleiro da Presidencia, Diego Calvo. O mes vindeiro desenvolveranse "reunións técnicas" sobre ambas competencias que "permitan culminar un acordo que se materializará na
comisión mixta de transferencias", órgano bilateral de negociación entre ambos gobernos que chegou a estar 13 anos sen reunirse, de 2009 a 2022
Feijóo volve extremar o seu discurso migratorio en plena competencia electoral con Vox. O ex-presidente e actual líder do PP, avoga agora por limitar a inmigración a persoas "culturalmente próximas" e, en todo caso, "elixir quen entra, como e para que", dixo nun acto con representantes de sindicatos policiais centrado nas migracións. [Imaxe: © PP]
A UEFA, disposta a expulsar a Israel das competicións europeas de fútbol a vindeira semana, segundo afirma The Times. A maioría dos membros do seu comité executivo están dispostos a vetar os equipos israelís dos campionatos oficiais continentais. Foto: © UEFA.
Unha manifestación de profesorado percorre Santiago na xornada de folga xeral no ensino público convocada por CIG-Ensino e mais STEG "contra a política de recortes e de propaganda da Xunta". A CIG sitúa o seguimento por riba do 60% e a Xunta rebáixao a menos do 15%. Foto: CC-BY-NC-ND BNG.
Altri recorrerá a exclusión da planta prevista en Palas de Rei da planificación eléctrica do Estado. Atribúe a súa exclusión por parte do Goberno de España a unha "decisión puramente política" e advirte de que sería "un prexuízo" para a provincia de Lugo.
Morre o concelleiro socialista lucense Pablo Permuy, o que obriga a novas mudanzas na Corporación municipal tras o falecemento hai medio ano da alcaldesa Paula Alvarellos. Segundo El Progreso, Permuy faleceu esta madrugada no hospital Lucus Augusti tras máis dun ano de enfermidade e o Pleno previsto para este xoves queda suspendido. O Concello declarou tres días de loito oficial. [Foto: Concello de Lugo]
🇵🇸Pedro Sánchez anuncia o envío dun buque militar para protexer a Flotilla de solidariedade e axuda a Gaza. O presidente do Goberno de España confirmouno en conferencia de prensa dende Nova York, tras participar na Asemblea Xeral da ONU, na Conferencia das Nacións Unidas a respecto de Palestina -na imaxe- e outros compromisos internacionais. [Imaxe: Pool ONU]
A Fiscalía especializada en violencia contra a muller de Galicia asegura non ter constancia de denuncias de vítimas relativas ao mal funcionamento das pulseiras de control telemático a maltratadores. Con todo, e tras unha instrución da Fiscalía Xeral do Estado, tanto a Fiscalía Superior de Galicia como as súas catro delegacións provinciais están "estudando caso por caso e procedendo á revisión de sentenzas" dende febreiro de 2024. Nun comunicado, o organismo autonómico recoñece ter coñecemento de "incidencias" debido "ao funcionamento en si mesmo dos aparatos" que provocan a súa activación sen que exista un quebrantamento da medida cautelar. [Na imaxe, dispositivos de control telemático empregados en casos de violencias machistas CC-BY-SA Ministerio de Igualdad]
A Deputación da Coruña acolle na residencia do IES Rosalía Mera da Coruña 15 menores refuxiados da guerra de Malí. O acollemento realízase en colaboración coa Secretaría de Estado de Migracións e a ONG Ecos do Sur e prodúcese no mesmo espazo onde antes residiron persoas refuxiadas da guerra de Ucraína ou da de Iugoslavia nos anos 90.
