A sociedade anónima deportiva controlada pola familia Mouriño di que "a paz social acada a plenitude" tras un acordo cos comuneiros opostos a un proxecto que aínda ten frontes abertas no ecoloxismo e na xestión da auga
Dúas décadas despois de facerse co control do Celta a familia Mouriño vén de ver como outra protesta cidadá entorpece os seus proxectos urbanísticos. Se en 2006 quedou paralizado o plan de urbanismo de Nigrán que ía recualificar terreos dese concello nos que Carlos Mouriño participaba xunto con outros directivos da sociedade anónima deportiva, agora é a súa filla e herdeira, Marián Mouriño, a que recorta as dimensións inicialmente previstas da cidade deportiva que está a levantar en terreos comunais de Mos ante o rexeitamento veciñal e a ameaza de xudicialización do proxecto.
O complexo de ocio xa prescindira do centro comercial previsto inicialmente e agora, tras un acordo coa comunidade de montes de Tameiga, que se opuña á ocupación das súas terras, tamén renuncia ao pavillón deportivo, reorganizando o resto de instalacións previstas (hoteleiras, de restauración, deportivas, educativas ou sanitarias) nos terreos que si lle facilitou a comunidade de montes de Pereiras, favorable ao proxecto.
O proxecto inicial do Celta tras o enfrontamento de Carlos Mouriño co alcalde de Vigo, Abel Caballero, pasaba por construír, co apoio do PP tanto na Xunta como no Concello de Mos, un complexo de ocio nun ámbito de 864.000 metros cadrados de montes comunais dese municipio lindeiros co concello de Vigo. Alí quería instalar un centro comercial, un estadio de entre 6.000 e 11.000 espectadores e un pavillón cuberto, ademais de varios campos de fútbol de adestramento. Pero os plans iniciais foron reducíndose e executándose de forma fragmentaria, o que ao tempo permitiu eludir unha avaliación ambiental completa do conxunto do complexo.
O complexo, iniciado en 2019 de xeito ilegal, está pendente do permiso da Xunta, que apoia aos Mouriño, para desenvolver as seguintes fases
Ante o rexeitamento da comunidade de montes de Tameiga ao proxecto e a aceptación da comunidade veciña, a de Pereiras, foi nesta segunda zona onde en 2019 comezaron a construírse os primeiros campos de fútbol de adestramento con instalacións asociadas que se levantaron ao amparo dunha licenza municipal outorgada polo Concello de Mos. Cando a xustiza acabou confirmando en 2023 que a licenza fora ilegal, a obra estaba xa en servizo, inaugurada por Feijóo en 2020.
Dese plan apoiado pola Xunta pero aínda pendente de aprobación definitiva, cun desenvolvemento en varias fases ao longo dunha década, xa caera o centro comercial inicialmente previsto. Pero seguía contemplando a expropiación de terreos da comunidade de montes de Tameiga, que se opuña ao proxecto cualificándoo de "pelotazo urbanístico" persoal da familia Mouriño baixo a marca do Real Club Celta de Vigo.
Con esa comunidade de montes é coa que agora vén de chegar a un acordo a sociedade anónima deportiva para non ocuparlle os terreos a cambio de que os comuneiros renuncien á vía xudicial contra o proxecto. A redución de espazo implica renunciar ao pavillón deportivo e recolocar o resto de instalacións nos terreos dispoñibles en Pereiras.
O Celta asegura que o acordo supón que "a paz social acada a plenitude". Pero desactivados os comuneiros o proxecto aínda segue tendo en contra o movemento ecoloxista, coa xestión da auga como principal eiva pendente sinalada tamén pola Confederación Hidrográfica do Miño Sil.
