David Lombao

Os populares reeditan, a conta do informe do CCG sobre Altri, posturas ensaiadas tras retornaren á Xunta en 2009, cando racharon tabús como cargar abertamente contra a RAG ou o propio CCG por opoñérense ao seu decreto lingüístico. "Que fai un órgano especializado na cultura valorando unha instalación industrial", cuestionan, reducindo as persoas expertas que o elaboraron a membros da "órbita do BNG"

Unha decena de persoas expertas elaboran para o CCG un documento tan amplo coma crítico sobre a fábrica de celulosa que Altri promove da man da Xunta e Greenalia. Estima que xeraría uns 550 empregos na economía galega, 281 directos, cifras "moi inferiores ás anunciadas" pola compañía, que fala de medio milleiro directos e uns 2.000 indirectos. Advirte de que "non sería posible abastecer a nova planta sen incrementar substancialmente a área ocupada por plantacións de eucalipto en Galicia" ou, no seu defecto, sen importar madeira

Os socialistas procuran encarreirarse de vez pola vía ordinaria tras década e media de interinidades e présas electorais nun congreso marcado polo conclave federal do vindeiro outono e no que Besteiro procurará asentar un liderado cara ao medio prazo

A diferenza entre a media mensual de cotizantes á Seguridade Social e o derradeiro día do mes reduciuse a apenas 3.000 persoas en agosto. O total queda nuns 1,092 millóns, o que implica seguir nas maiores cifras dende o estoupido da crise de 2008. Mentres, as inscricións nas oficinas de emprego soben apenas un 0,54% e o paro rexistrado queda un 7,08% por baixo do de hai un ano

As dúas subas do canon de Sogama disparan o 'recibo' do lixo da Xunta aos concellos un 60%. Na liña do marcado pola UE para fomentar a reciclaxe, a normativa estatal grava dende 2023 con novos impostos a incineración do lixo, clave do modelo de Sogama, que queima máis da metade dos refugallos urbanos que recibe para xerar electricidade da man de Naturgy

A Confederación Hidrográfica Miño-Sil principia o traslado destes exemplares, considerados especies vulnerables, como paso previo á reparación do caneiro da Acea de Olga e do antigo muíño que durante décadas acolleu un restaurante. Os mergulladores localizan os mexillóns e recóllenos "un por un". A continuación son trasladados en recipientes isotermos en lotes de 750 ata doce treitos do río augas abaixo

Nove anos despois de reformar en solitario a lei da CRTVG para manter a Sánchez Izquierdo na dirección xeral por tempo indefinido, a Xunta ultima a norma coa que o PP só se precisará a si mesmo para elixir a persoa que o remude á fronte da que pasará a ser a CSAG

A Xunta lanza unha nova lei para os medios públicos tras máis dunha década sen cumprir a vixente en aspectos como nomear por maioría parlamentaria reforzada ao director xeral'. A CRTVG pasará a denominarse "Corporación de Servizos Audiovisuais de Galicia" e Rueda asegura que seguirá con "programas e servizos 100% en lingua galega", se ben a nova lei abre a porta ao "uso doutras linguas" para "dar a coñecer a identidade cultural de Galicia fóra da comunidade autónoma". "Castelán e inglés, basicamente", especifica

As taxas de emprego e paro en Galicia son as mellores dende a gran recesión. Pero, ao contrario que a media estatal, ningunha delas é aínda máis positiva que antes daquel crack global. Hai máis xente traballando e tamén máis buscando emprego. Explícase, sobre todo, polo incremento de poboación de orixe estranxeira no mercado laboral galego, onde así e todo segue sendo escasa con apenas 95.000 persoas. O 86% da poboación ocupada traballa a xornada completa, un nivel moi estable dende hai anos nun contexto no que o sector servizos segue sendo clave

A ofrenda rexia ao Apóstolo é ben anterior ás Irmandades e á súa elección do 25 de xullo como "Día de Galicia" e á autonomía política galega e, en todo caso, allea a ambas. Mesmo as ditaduras do século XX a empregaron como contraposición ou parte da represión contra o galeguismo político. A abdicación do Goberno galego a respecto do Día Nacional de Galicia contribúe a acrecentar unha caste de simulacro no que se presentan como parte da celebración da personalidade política do país eventos que non son tal

"Agora hai unha sentenza que di que aparte do maquinista o responsable é Adif. O ridículo dos nosos gobernantes cos seus enganos foi terrible", afirma o presidente da Plataforma Víctimas Alvia 04155 tras o primeiro ditame xudicial sobre o sinistro. A "verdade oficial", salienta, sinalou unicamente o condutor do tren "para eludir responsabilidades políticas. Había présas por inaugurar e por que os trens tardasen o menos posible. E de aí o denominado pacto da curva de Ana Pastor e Rubalcaba"

"Once anos despois demóstrase xuridicamente que isto foi unha traxedia evitable debida á cobiza, ás présas, á covardía, ás mentiras e a neglixencias de moita xente e institucións moi poderosas", afirma a Plataforma Víctimas Alvia 04155 tras o ditame xudicial, e esixe "que pidan perdón todas as persoas e institucións que non fixeron o seu traballo, que nos mentiron dicindo que a liña contaba cos sistemas de protección" ou "terxiversaron e tentaron ocultar a verdade, engadindo máis dor e sufrimento"