Vanesa Vázquez

Ecoloxistas en Acción vén de denunciar ante a Confederación Hidrográfica Miño - Sil o que, segundo indican, semella un vertido de fecais ilegal procedente da cidade deportiva do Celta que “está poñendo en perigo á saude das familias que se abastecen de auga dos pozos que se atopan ladeira abaixo do vertido”, explican. O Club argumenta que a vertedura non é súa, xa que a tubaxe sae dunha propiedade privada.

En menos dun mes, o 9 de xuño, a cidadanía galega está chamada de novo a votar. Desta vez para as eleccións ao Parlamento Europeo, ás que o BNG di acudir “sen teito” co obxectivo de darlle a Galicia un escano propio, logo dos resultados históricos acadados pola forza nacionalista en febreiro.

Tal e como xa anunciara o novo conselleiro de Sanidade da Xunta de Rueda, Antonio Gómez Caamaño, chegan cambios a algunhas xerencias, que foron anunciados este sábado por medio de tres comunicados de prensa, un por cada área afectada. Ángel Facio substitúe a Eloína Núñez en Santiago e Barbanza; Santiago Camba asume o cargo que ata agora tiña Félix Rubial en Ourense, Verín e O Barco;  e Fernanda López Crecente farase cargo da área de Ferrol

Alfombra vermella, celebridades paseando ao carón do Lérez… Pontevedra vestirase de gala para acoller durante os dous vindeiros anos a celebración dos Premios Feroz, que chegan por primeira vez a Galicia nos seus once anos de historia. A primeira cita xa ten data:  o sábado 25 de xaneiro de 2025 no Pazo da Cultura.

Desde acender o móbil mediante pegada dixital ou recoñecemento facial, empregar un navegador que fale e informe con todo detalle das posibilidades de ocio nun destino turístico, as recomendación dos contidos na smart tv, ata dirixir un robot nunha operación médica. Non imos descubrir agora que a evolución da intelixencia artificial (IA) é imparable. Máis si cómpre reparar nas implicacións que a primeira normativa comunitaria sobre esta materia que vén de validar o Parlamento pode ter para Galicia e máis concretamente para o idioma galego, que vai contar cunha ferramenta legal para exixir a súa non discriminación nos servizos da intelixencia artificial.

O sexto presidente da Xunta elixido nas urnas tomou posesión no mediodía deste sábado nun acto celebrado no parque de San Domingos de Bonaval (en Compostela) como un galego máis. “Un galego de Pontevedra”, indicou Alfonso Rueda, nun discurso no que apelou ao diálogo e o espírito de consenso e no que defendeu a política sen crispacións, a política “do sentidiño”.  Foi un discurso sinxelo, protagonizado polas referencias á súa familia e con pouca profundidade política, que para iso xa está o Parlamento. Foi, en realidade, como se o presidente continuara a darse a coñecer ante a cidadanía, seguindo o ronsel do traballo feito durante a campaña electoral.

Familias sen teito, maiores, dependentes, mulleres que sofren violencia de xénero, persoas consumidoras, persoas con algunha discapacidade... Toda a poboación que pode estar nunha situación de vulnerabilidade nalgún momento da súa vida necesita a atención das traballadores sociais municipais que, no caso de Vigo, veñen de comezar mobilizacións para reclamar máis persoal que lles permita mellorar a atención cada día. Nesta cidade existe unha traballadora social municipal por cada 17.000 persoas, o que supón o dobre da carga para cada profesional que establece a lei galega.

O álbum musicado 'Unha animalada de colexio' (Edicións Embora) vén de saír do prelo co obxectivo de achegar aos máis cativos da casa a música tradicional galega pero co aire rockeiro propio de Pakolas. O popular artista e compositor é o responsable dos arranxos musicais do libro escrito por Xabier Domínguez e ilustrado por Dani Padrón. 

Complexa. Esta é a palabra que máis empregan desde o Concello de Vigo para referirse ao proxecto de rehabilitación do Barrio do Cura.  Foi un xogador de fútbol, Valery Karpin, o primeiro impulsor da actuación en plena zona vella de Vigo hai máis de 20 anos. Mais, tras esgotar cartos e paciencia, o proxecto cambiou de mans. Hoxe en día pertence a un fondo americano. As primeiras licenzas foron outorgadas a finais de 2023 e unha xuíza vén de anular o proxecto de urbanización.

En menos dunha semana a área Pontevedra rexistrou a morte de tres traballadores que perderon a vida desepeñando a súa tarefa profesional, no sector naval, na construción e no sector industrial. Dous deles foron en Vigo e outro no concello  de Vilanova de Arousa. Tiñan 50, 25 e 36 anos.

Á terceira non foi a vencida. O vindeiro curso 24-25 será xa o terceiro de gratuidade xeral nas escolas infantís galegas e, un ano máis,  o acceso ás privadas subvencionadas continúa sendo por orde de chegada, sen criterios económicos ou sociais para asignar prazas malia ser un servizo pagado con fondos públicos. A asociación das escolas privadas asegura que están ultimando coa Dirección Xeral de Familia a orde de gratuidade para o seguinte curso que, esta vez si, incluirá criterios de admisión

Tras 105 días en folga indefinida, o cadro de persoal de Vitrasa votou este venres a favor de aceptar a última oferta da empresa e devolver a normalidade ao transporte urbano de Vigo. Porén, a folga seguirá ata, como mínimo, o luns, cando se reúnan membros do comité con representantes da empresa e asinen un primeiro acordo.