Acontece

O CEIP Emilia Pardo Bazán (Vigo) viuse na obriga de expulsar temporalmente un neno que cursa 6º de Educación Infantil polas "reaccións agresivas" contra os seus compañeiros e contra os mestres. O centro tentou buscar outras vías e demandou apoio da Consellaría de Educación, pero finalmente viuse "sen recursos" ante unha situación "descontrolada". Segundo as familias, "a única medida proposta pola Inspección de Educación foi a expulsión" e esixen un docente de Pedagoxía Terapéutica.

Dos 15.740 pisos turísticos galegos con anuncios en plataformas como Airbnb, máis do 60% con cumpren coa súa obriga legal de incluír o seu número de inscrición no rexistro da Xunta, o que fai sospeitar que poden carecer del. Por provincias, Pontevedra é o territorio con máis pisos turísticos incumpridores, 4.560 de 7.138 (o 63%)

O concelleiro de Urbanismo, Vivenda e Cidade Histórica, Iago Lestegás, presenta un plan centrado, sobre todo, na mobilización da vivenda baleira para que pase a estar dispoñible para ser habitada. O Goberno local propón tamén bonificacións fiscais para actuacións de rehabilitación de edificios catalogados de uso residencial e para vivendas de promoción pública e cooperativas de vivenda en cesión de uso.

O informe realizado por Turismo de Galicia advirte da posibilidade de prexuízos "leves" a "moderados" sobre a paisaxe, os espazos naturais protexidos e o patrimonio cultural destas comarcas, de importante actividade turística e atravesadas polo Camiño Francés a Compostela. Para compensalos, suxire "medidas correctoras", como unha mellor sinalización, "rutas megalíticas" ou a organización de actividades culturais e deportivas na zona.

Nasser Abu Baker, presidente do Sindicato de Xornalistas Palestinos, recolleu este sábado en Santiago o galardón convocado polo Colexio Profesional de Xornalistas de Galicia. O premiado advertiu de que "o goberno israelí non quere que ningún de vós vexa a realidade do que pasa alí" e que son os profesionais palestinos "os que están a mostrar o que acontece".

O chamamento á manifestación do vindeiro sábado 17 de maio, impulsado por Queremos Galego, foi apoiado por representantes de BNG, PSdeG, Alternativa dos Veciños, Compostela Aberta, Sada maioría, Movemento Salceda e Apin, que amosaron a súa disposición "para aplicar os acordos comúns, amplos e que unen ao conxunto do pobo galego". 

A Directora Xeral de Memoria Democrática, Zoraida Hijosa, e outros representantes ministeriais reuníronse en Santiago co equipo do Grupo HISTAGRA-CISPAC, ao que o Goberno central encargou a investigación pola experiencia do proxecto Nomes e Voces. É un "recoñecemento a un esforzado traballo de décadas para arroxar luz sobre o período máis negro da Historia recente coa fin de reconstruír a memoria democrática”, destacan Lourenzo Fernández Prieto e Antonio Míguez Macho.