Inés Rey, nova alcaldesa da Coruña cos votos a prol do PSdeG, da Marea Atlántica e do BNG. A nova rexedora tomou posesión do cargo subliñando o feito de ser a primeira muller que acada o cargo na historia democrática da cidade. 

• Inés Rey convértese na primeira alcaldesa da democracia na Coruña apelando ao "entendemento"

En Narón este sábado foi elixida como alcaldesa Marián Ferreiro, de Terra Galega, primeira forza da corporación. Ferreiro, que asumiu o cargo en 2017 en substitución de José Manuel Blanco, logrou no 26M 10 dos 21 edís da corporación municipal naronesa.

Arteixo (31.917 habitantes) convértese no concello galego máis poboado con alcaldía do PP, condición que ata agora ostentaba a cidade de Ourense. Carlos Calvelo revalidou este sábado o posto como alcalde de Arteixo grazas á maioría absoluta que obtivo nas urnas, con 12 dos 21 edís da corporación.

Fernando Suárez, elixido por cuarta vez como alcalde de Ribadeo polo BNG. "Traballaremos para dar conta da afouteza de Ribadeo e da súa singularidade en Galiza, e desde Galiza para o mundo", afirmou o rexedor, que conta con 7 edís na corporación que supoñen a maioría absoluta.

A socialista Elba Veleiro é xa a nova alcaldesa de Vilalba, concello natal de Fraga no que o PP nunca perdera e onde chegara a superar o 80% dos votos. Veleiro foi investida cos 8 votos do PSdeG, primeira forza, e cos 2 de Vilalba Aberta, formación coa que acadou un pacto de investidura.

Benito Portela foi reelixido como alcalde de Sada cos votos de Sadamaioría (6) e do BNG (2), un por baixo da maioría absoluta. Tras unha mañá de incertezas, nas que Sadamaioría, primeira forza, temía a eventual conformación dunha maioría alternativa, finalmente o rexedor recuncou no posto e asegurou, na súa toma de posesión, estar disposto a procurar maiorías co resto da esquerda do concello.

Ángel García Seoane revalida a alcaldía de Oleiros para Alternativa dos Veciños con 13 votos a prol, dous por riba da maioría absoluta. A formación logrou tamén desta volta a alcaldía de Carral con Javier Gestal, que cos seus 8 votos e os 3 do PSdeG puxo fin ao longo período do PP nese concello.

Manuel Ruiz Rivas recunca como alcalde de Ribeira polo PP. Foi investido cos 9 votos do PP, que foron dabondo grazas á súa condición de forza máis votada e ao non existir maioría alternativa que sumase maioría absoluta.

Abel Caballero recunca como alcalde de Vigo cos 20 votos a prol do grupo do PSdeG na corporación fronte aos 4 do PP, os 2 da Marea e 1 do BNG.

• Caballero recunca con "maioría absolutísima" fronte a un PP no que 16 candidatos renunciaron a tomar posesión

Miguel Anxo Fernández Lores, reelixido alcalde de Pontevedra cos 11 votos do BNG e os 4 do PSdeG. Ambas forzas gobernarán en coalición sobre o pacto que asinaron o pasado xoves. 

• Lores inicia o seu sexto mandato en Pontevedra anunciando un "novo ciclo" na cidade sen "conformismo"

Ana Ermida, nova alcaldesa de Barreiros polo BNG. Os 5 votos do BNG e o único voto do PSdeG sustentaron a elección da rexedora, primeira forza da corporación, que deixa de estar dirixida polo PP de Alfonso Puente, cuxa controvertida xestión urbanística marcou a vila na última década.

Ángel Mato, elixido alcalde de Ferrol co apoio do PSdeG, Ferrol en Común e BNG. O socialista é o novo rexedor ao lograr a maioría absoluta da corporación, na que a oposición será exercida só polo PP, con 12 edís, grupo máis numeroso. 

• A esquerda repite mandato en Ferrol por primeira vez dende 1983

Carlos López, novo alcalde socialista da Fonsagrada tras esixir a edil do BNG, Xosefa Ortiz, a renuncia do cabeza de lista do PSdeG e ata agora alcalde, Argelio Fernández, por considerar que mantivera o concello "abandonado". O voto do Bloque era imprescindible para a investidura, xa que do contrario o PP lograría a alcaldía.

Francisco Fumega repite como alcalde socialista do Carballiño. Desta volta o PSdeG da vila logrou maioría absoluta, con 9 dos 17 edís. Á constitución da corporación non asistiu o ex-socialista Pachi Vázquez, antigo alcalde da vila polo PSdeG, que neste 26M concorreu polo seu novo partido, Espazo Común, logrando 3 concelleiros.

Rafael Sisto, reelixido como alcalde de Teo cos votos de Son de Teo, PSdeG e BNG. Nas eleccións do 26M a formación de Sisto perdeu tres edís e quedou con 4, mentres que o PP logrou ser primeira forza, pero tras unhas complexas negociacións cos socialistas, o acordo de esquerda permítelle revalidar a alcaldía.

Xosé Sánchez Bugallo regresa á alcaldía de Santiago tras ser investido polos 10 edís do PSdeG compostelán. Grazas á súa condición de forza máis votada, puido ser elixido sen necesidade de maioría absoluta.

• Bugallo volve á alcaldía de Santiago que deixou en 2011 para afrontar agora un goberno en minoría

Lara Méndez, reelixida alcaldesa de Lugo cos votos do PSdeG e do BNG. A rexedora socialista apelou a unha cidade "máis orgullosa do seu" e anunciou "pontes tendidas" cara ao resto da corporación. Máis información, hoxe en Praza.gal

• Lara Méndez inicia o seu segundo mandato en coalición co BNG para lograr un Lugo “máis orgulloso do seu”

Gonzalo Pérez Jácome, novo alcalde de Ourense grazas aos votos do PP. "É a quinta vez que me presento a alcalde de Ourense e non hai quinto malo", afirma

• Jácome chega á alcaldía de Ourense da man de Baltar tras prometer botalo por "psicópata"

O BNG, forza máis votada, gobernará Barreiros co apoio do PSdeG tras manter a edil socialista ata o último día a incerteza sobre a posible continuidade do PP. A socialista cobrará unha dedicación parcial tras reducir a alcaldesa o soldo que cobraba o anterior rexedor popular e repartilo con ela. 

A pasada noite quedou tamén constituído o Concello de Láncara. Volveu ser elixido como alcalde o socialista Darío Piñeiro.

O Concello de Sober volveu quedar constituído ás cero horas deste 15 de xuño, recuncando así na 'tradición' de ser o primeiro do Estado en facelo, aínda que desta volta tamén se lle sumou o Concello de Láncara. O popular Luis Fernández Guitián volveu ser investido con maioría absoluta.