Fálase

Atopan na ría de Arousa por primeira vez un exemplar de Odontaspis ferox, un tiburón que acostuma habitar as augas máis cálidas do océano Atlántico e do Pacífico. Trátase dunha hembra adulta [na foto, © CEMMA/Diversimar] de 3,3 metros de lonxitude que se adentrou na ría e quedou varada en Vilanova de Arousa, segundo informaron desde a Coordinadora para o Estudo dos Mamíferos Mariños (CEMMA). É unha especie vulnerable que figura na listaxe vermella internacional de especies ameazadas, que xestiona a IUCN (a unión internacional para a conservación da natureza).

Rueda salienta o “potencial” de Galicia en materiais críticos mentres mantén en segredo un informe sobre os mesmos por medo a “movementos especulativos”. O presidente participa no 50 aniversario de Ferroglobe na súa planta de Sabón xunto ao conselleiro delegado do grupo Villar Mir, Javier López Madrid, xenro do fundador e implicado en casos de corrupción e para quen a Fiscalía pide cadea por acoitelar a unha antiga amiga.

• HEMEROTECA | A Xunta mantén en segredo un informe das materias primas críticas que hai en Galicia por temor a "movementos especulativos"
• HEMEROTECA | Villar Mir non poderá vender as súas minas en Galicia ata 2025 como condición polo rescate de 34 millóns que lle deu o Estado

O ex-futbolista galego Jota Peleteiro, a un paso de comprar a SD Compostela, segundo asegura o club nun comunicado oficial. O ex-xogador de Celta, Eibar, Alavés ou Aston Villa está "moi preto de pechar un acordo definitivo" coa entidade santiaguesa para se converter nos seu propietario. 

Tanxugueiras publican 'Desidia', o novo adianto do seu terceiro disco, que verá a luz nas vindeiras semanas, un tema que xa están a interpretar nos seus concertos. Na canción, que reivindica "a necesidade do autocoidado", colaboran Carla Cervantes e Justin de Jager, especializados en threading, un estilo de baile no que os corpos se enfían. No vídeo a danza é protagonista, o mesmo que no retrouso: “Ai!, bailar que eu vou guiar”. 

Nove microrrelatos gañan o certame convocado pola Real Academia Galega e PuntoGal, que chega á súa quinta edición, con máis de 900 propostas presentadas nas tres categorías do concurso: infantil, xuvenil e adultos. As persoas gañadoras recibirán premios tecnolóxicos e os relatos premiados serán publicados na rede e mais na revista Luzes. A organización do certame destaca "o éxito de participación" e tamén a variedade temática, con textos ao redor da pandemia, a perda da memoria ou a descuberta infantil do galego

PARO REXISTRADO | As inscricións nas oficinas de emprego descenderon en 4.482 persoas en Galicia durante o mes de maio (-2,98%, un -3,29% na media estatal) e quedan en 146.120 persoas no paro, un -11,61% menos quen un ano antes (-22,70% no global estatal). En termos absolutos, son cifras inferiores ás previas á crise de 2008. No mesmo mes, a afiliación media á Seguridade Social aumentou en 6.751 persoas (+0,65%, un 1,07% no total estatal) e queda en 1,04 millóns, isto é, un 2,99% por riba do dato de doce meses antes (+5,01% na media). 

• AMPLIAMOS 👉 Galicia chega ao verán con menos paro que antes da crise de 2008 e máis emprego que antes da COVID

Prisión provisional para o veciño de Carballo detido por agredir a súa muller o pasado luns. O home está sendo investigado por intento de homicidio e non poderá achegarse á vítima nin aos seus fillos, segundo ditaminou o xulgado de Instrución número 1 de Carballo, que lle suspendeu tamén a patria potestade, que asume en exclusiva a nai. 

O Goberno de España prorroga ata outubro as medidas fronte á crise de prezos, entre elas o desconto na gasolina. A vixencia do actual decreto-lei remata o 30 de xuño, polo que o executivo deberá aprobar antes outro similar, que despois deberá ser convalidado no Congreso.

• HEMEROTECA | Dos 20 céntimos por litro de combustible ao tope do 2% aos alugueiros: o plan do Estado para a crise de prezos

Tras dous requirimentos xudiciais a Xunta comunica que o xuízo de Angrois se celebrará na Cidade da Cultura. O xulgado advertiu hai unha semana de que o proceso estaba “paralizado” polo silencio do Goberno galego ao respecto, e este mércores o vicepresidente segundo, Diego Calvo, vén de asegurar que o seu departamento xa respondeu “formalmente”.

• O proceso para organizar o xuízo de Angrois está "paralizado" porque a Xunta non di ao xulgado onde se celebrará

Unha Muralla vacúa na cidade con máis vacas. A empresa láctea Casa Grande de Xanceda e o Concello de Lugo conmemoraron a pasada noite o Día do Leite, que se celebra o 31 de maio, cunha proxección nos cubos que flanquean a porta de Santiago da Muralla lucense. Lugo, explican, foi a elixida para a conmemoración por ser a capital da provincia galega con máis vacas (263.021, segundo os datos máis recentes) e tamén a cidade de Galicia con máis cabezas deste gando, 9.631.