Unha Muralla vacúa na cidade con máis vacas. A empresa láctea Casa Grande de Xanceda e o Concello de Lugo conmemoraron a pasada noite o Día do Leite, que se celebra o 31 de maio, cunha proxección nos cubos que flanquean a porta de Santiago da Muralla lucense. Lugo, explican, foi a elixida para a conmemoración por ser a capital da provincia galega con máis vacas (263.021, segundo os datos máis recentes) e tamén a cidade de Galicia con máis cabezas deste gando, 9.631.
A escritora viguesa Ledicia Costas gaña o Premio Lazarillo 2021 coa novela A lebre mecánica, que publicarán Edicións Xerais en galego e a Editorial Anaya en castelán no vindeiro outono. Estes galardóns, que recoñecen a literatura e a ilustración para público infantil e xuvenil, son outorgados pola Organización Española Para el Libro Infantil (OEPLI) e tamén galardoaron nesta 62ª edición o ilustrador Víctor Jimeno polo álbum ilustrado Y tú, ¿de qué color lo ves?.
Esta é a terceira ocasión na que Ledicia Costas recibe o Lazarillo, que xa obtivo coa novela Jules Verne e a vida secreta das mulleres planta (Xerais, 2016) e con A balada dos unicornios (Xerais, 2018). [Na foto, a entrega dos premios no marco da Feira do Libro de Madrid © Mcdonald’s]
A escritora Maria Canosa, a Asociación de Escritores e Escritoras as en Lingua Galega (AELG) e o proxecto Brazolinda, gañadoras dos XIII Premios Rosalía de Castro de Lingua que convoca a Deputación da Coruña. Cada ano, o certame recoñece persoas e iniciativas polo seu labor "n promoción e dignificación social do patrimonio lingüístico de Galiza". Na imaxe, os membros do xurado desta edición: María Muíño, delegada especial de Igualdade e Normalización Lingüística da Deputación; Alexandre Marín, técnico de normalización lingüística de Culleredo, e mais os representantes de dous dos proxectos gañadores en 2021, Carmen Denébola (Agrupación Ío) e Carlos García (Twitter en Galego).
O PP confirma que Feijóo paralizou a venda da sede central do partido, na madrileña rúa de Génova porque "os edificios non teñen culpa de nada". Pablo Casado anunciara a súa venda para desligar o partido dos casos de corrupción e uso de diñeiro negro na trama Gürtel. O ex-presidente da Xunta xa afirmara, aínda con Casado como líder do partido, que esa venda non parecía "razoable" e cinguira os casos de corrupción a "problemas por algunhas persoas ou dirixentes". [Imaxe: Praza.gal]
Unha veciña de Carballo, en estado grave tras ser agredida no que a Garda Civil investiga como un caso de violencia machista, segundo informa a CRTVG. Radio Nordés informa de que a muller, de 43 anos, presentaba fortes golpes na cabeza e foi trasladada ao CHUAC mentres as forzas de seguridade buscan o seu marido como sospeitoso do crime [Imaxe de arquivo - CC-BY-NC-SA Gz Contrainfo]
Rueda convoca senllas xuntanzas con Ana Pontón e Valentín González Formoso para o vindeiro 6 de xuño. Tanto a portavoz nacional do BNG como o secretario xeral do PSdeG solicitaran ao presidente da Xunta encontros tras a súa toma de posesión para trataren diversos temas, a comezar pola crise de prezos. O titular do Goberno galego expón, en cartas remitidas a ambos líderes, que está aberto a abordar esa cuestión e mais outras como a xestión dos fondos europeos.
A xornalista lucense Érika Reija recibiu este sábado en Ferrol o premio José Couso á liberdade de prensa, promovido polo Colexio Profesional de Xornalistas e o Club de Prensa ferrolán. No transcurso dos actos, Reija leu o texto Na guerra da desinformación, fagamos que gañe a verdade, redactado por ela para o Día Internacional da Liberdade de Prensa, cun chamamento a volver ás orixes do xornalismo, primando "a calidade sobre a cantidade, as crónicas ben documentadas sobre os textos rápidos ou as conexións ininterrompidas".
O PP perdería tres escanos se as eleccións galegas se celebrasen agora e quedaría en 39, dous por riba da perda da maioría absoluta, segundo unha enquisa de Sondaxe, o instituto demoscópico do xornal La Voz de Galicia. O inquérito mantén o BNG como segunda forza con 19 escanos (=), seguido do PSdeG con 15 (+1) e outorga 2 a Galicia en Común (Podemos), actualmente fóra da Cámara. Segundo a enquisa, só o BNG (24,8%) obtería agora maior porcentaxe de voto que nas eleccións de 2020 entre os grupos que actualmente teñen representación. Na imaxe, o pleno do Parlamento celebrado esta semana.
Primeiro caso confirmado da varíola do mono en Galicia. O Sergas vén de recibir a ratificación do positivo, un varón da área sanitaria da Coruña-Cee que, segundo informa a Consellería de Sanidade, "permanece illado no seu domicilio". Saúde Pública, agrega, "xa se puxo en contacto cos seus contactos estreitos". O Sergas prevé "estar en disposición de realizar as PCR de confirmación" deste virus dende a semana vindeira. Polo momento, os casos sospeitosos en Galicia son 7, incluíndo o xa confirmado. Nesta entrevista con Sonia Villapol podes saber máis sobre a varíola do mono. Na imaxe (do CDC dos Estados Unidos), o virus visto ao microscopio.
O disco Puro Deleite que actualiza clásicos da música galega da mans de artistas e bandas actuais xa ten capa. É un deseño de Javier Ramírez e Deleite expón na súa web a historia desta creación. Cinco dos temas que comporán o disco xa poden escoitarse: Muinheira de Chantada, de Verto; Por última vez, de Ataque Escampe; Xuntos, de Familia Caamagno, O Tren de Ale e Miña Terra Galega, de Radio Océano.
