Hiperxel, en concurso de acredores polo seu estado de "insolvencia". O xulgado do Mercantil número 3 de Pontevedra vén de declarar o concurso voluntario de acredores a Xeldist Congelados, matriz de HIperxel, intervida desde agora na súa administración.
Baltar négase a dimitir e reitera que conduciu a 215 por hora nun coche da Deputación por "despiste" nunha viaxe a Madrid para manter dous encontros oficiais. A preguntas do PSdeG no pleno da Deputación de Ourense, o popular tamén nega que el conducise o coche oficial da institución que foi multado en setembro de 2021 na N-120 por conducir a 157 km/h nun treito limitado a 90; alega que un informe do xefe do parque móbil indica que non hai "datos fidedignos" para "afirmar con certeza quen conducía".
ENQUISA | Inés Rey mantería a alcaldía da Coruña o 28M pero desta volta co PSdeG como primeira forza, pasando de 9 a 12 edís, segundo unha enquisa divulgada por Radio Coruña que apunta tamén a un mantemento da representación do PP (9) e a un ascenso dun concelleiro para o BNG coruñés, que pasaría de 2 a 3. Marea Atlántica perdería 4 edís e quedaría con 2 e Por Coruña (a coalición de Podemos, EU e outras forzas) lograría un representante na corporación, indica o inquérito.
O Congreso aproba a lei de vivenda por maioría absoluta malia o 'non' de PP, Vox, Cs, PNV e Junts. Foron 176 votos a favor fronte a 167 en contra.
O Consello da Xunta aproba a declaración da Casa Cornide da Coruña como Ben de Interese Cultural (BIC). Con esta medida, a familia Franco terá "a obriga de permitir a súa visita pública e gratuíta polo menos catro días ao mes", segundo aclara o presidente da Xunta, Alfonso Rueda, que destaca que a decisión supón o recoñecemento do "gran valor histórico e cultural" do inmoble e o establecemento de "obrigas de protección" sobre el.
EPA | A poboación ocupada mantívose practicamente plana (-800) en Galicia durante o primeiro trimestre do ano e queda en 1,11 millóns de persoas, o que supón un 1,13% máis que no mesmo período de 2022, segundo os datos da Enquisa de Poboación Activa que vén de ser publicada. No mesmo trimestre, a poboación en desemprego situouse en 135.100 persoas, 3.700 máis que no trimestre previo e 5.900 menos que un ano antes.
Desconvocada a folga do sector do transporte de viaxeiros por estrada prevista para mañá e o venres. Os sindicatos manteñen a convocatoria de paro indefinido a partir do 8 de maio se a patronal non actualiza os convenios provinciais.
O Senado aproba definitivamente a reforma da lei de liberdade sexual formulada polo PSOE. Recibiu os votos favorables do PP, PNV, C's, UPN e unha senadora independente, ademais dos socialistas. JxCat abstívose e ERC, EH-Bildu, Más Madrid e Mes per Mallorca votaron en contra.
A Garda Civil intercepta a José Manuel Baltar a 215 quilómetros por hora na autovía A-52 conducindo un coche da Deputación de Ourense, segundo revela elDiario.es. O presidente da institución provincial ourensá e do PP nesa provincia dirixíase a Madrid o pasado domingo e foi sancionado por exceso de velocidade á altura de Asturianos (Zamora). Segundo a mesma información, os axentes multaron no acto o barón popular e a continuación iniciaron a instrución dun atestado por posible delito contra a seguridade no tráfico.
Pedro Sánchez anuncia a construción de "20.000 novas vivendas públicas en terreos do Ministerio de Defensa" e eleva a 183.000 o total das anunciadas para "alugueiro a prezo accesible". O presidente do Goberno de España anunciouno durante a súa comparecencia desta tarde no Senado, onde expón medidas do seu Executivo ligadas a paliar as consecuencias económicas da guerra en Ucraína. Imaxe tirada do sinal institucional do pleno do Senado.