Fálase

A Audiencia Nacional condena agora á trama Gürtel pola visita do Papa a València en 2006 e dita outros 15 anos de cadea para Pablo Crespo, ex-secretario de Organización do PP galego. Hai un mes o Tribunal Supremo ratificou a primeira sentenza da Audiencia Nacional sobre a trama na que condenou o PP por beneficiarse da súa corrupción e deixou en 36 anos a condena por ese caso a Crespo, que xa tiña outra anterior do Tribunal Superior de Xustiza da Comunitat Valenciana doutros 13 anos tamén confirmada polo Supremo.

• HEMEROTECA | Gürtel tornou o ex-número tres do PPdeG no primeiro deputado da historia da autonomía galega encarcerado por corrupción

A Consellería de Sanidade relaxa as restricións nos concellos de Verín, Amoeiro, Coles, Trazo, Boqueixón, Val do Dubra, Monforte e Campo Lameiro, que pasan a ter restricións de nivel 2. Entre outras medidas, elimínase o confinamento perimetral e a prohibición de reunión de persoas non convivintes; ademais, a hostalaría pode reabrir con limitación de capacidade. En cambio, as restricións endurécense en Moaña, que pasa ao grupo de localidades con medidas especiais (nivel 3). Os cambios entrarán en vigor na medianoite do mércores ao xoves.

• INTERACTIVO | Mapa das restricións pola COVID-19 en Galicia, concello a concello
• Para non perderse: guía dos peches pola COVID que a Xunta impón ata decembro

O plan de restricións da COVID-19 para o Nadal no que traballan o Goberno de España e as comunidades autónomas prevé manter o límite de reunións de ata seis persoas non conviventes e desprazar á unha da madrugada o toque de queda en Noiteboa e Noitevella. O documento será abordado mañá no Consello Interterritorial de Saúde.  

• HEMEROTECA | Sanidade advirte de que os posibles levantamentos de restricións pola COVID non teñen horizonte definido (tampouco o do Nadal)

Donald Trump accede a iniciar o traspaso de poderes ao demócrata Joe Biden como vindeiro presidente dos EUA, comezando a aceptar de facto a súa derrota electoral malia teimar sen probas nas acusacións de fraude.

• 🔊PODCAST | Joe Biden presidente: malas novas para Boris Johnson?

Os 20 do XX, de Antón Varela, publicada nos últimos meses por Vinte, foi a gañadora do Premio á Mellor serie en versión orixinal en galego no Carballo Interplay, que rematou este sábado. Válidas, de Victoria Martín e Carolina Iglesias, obtivo tanto o Premio de Mellor webserie estatal como o Premio do Público. A produción portuguesa Subsolo conquistou o de Mellor serie internacional e David Fidalgo conseguiu o premio ao Mellor proxecto de webserie en galego coa serie de animación 2D dixital Cacola, que estreará na edición 2021 do festival

Coincidindo co 18 aniversario do desastre do Prestige, a asociación Unha Gran Burla Negra levou a cabo unha xornada sobre 'Arquivos cidadáns e memoria democrática'. O seminario, que ía celebrarse no Museo do Pobo Galego, realizouse finalmente a través da rede.

Sanidade incorpora Vilalba e A Laracha aos concellos con peche perimetral e restricións máis severas pola COVID-19 e "suaviza" as medidas no Carballiño. Así o vén de aprobar o subcomité clínico que vixía a pandemia. As novas medidas publicaranse nunha edición extraordinaria do DOG. Ampliamos a información neste espazo

• INTERACTIVO | Mapa actualizado coas restricións por concellos
• DATOS | A mellora da pandemia de COVID frea en Galicia, con lentos descensos na incidencia e nas hospitalizacións

O guitarrista ourensán Daniel Minimalia gaña o Grammy Latino ao mellor álbum instrumental polo seu traballo Terra.

O artigo #UNSEGREDOAVOCES. A loita feminista do alumnado da ESADg continúa na rede publicado en Vinte  pola xornalista Adela Bértolo Lueiro é o gañador do Premio Alfredo Vicenti de Xornalismo Cívico que entrega o Ateneo de Santiago. O xurado acordou conceder accésits a David Reinero pola serie de reportaxes “O que custou o AVE a piques de rematar”, publicada en Praza.gal, e a Marta Otero Mayán polo artigo “Menores migrantes, ayer y hoy”. O pasado ano 2019 a gañadora do premio fora Montse Dopico por outra reportaxe publicada en Praza.gal.

O Colectivo Nós organiza na noite deste xoves un coloquio sobre a selección galega de fútbol coa presenza de Fernando Vázquez, Sergio Álvarez, Verónica Boquete e Xurxo Souto. Pódese seguir en directo a partir das 21 horas nesta ligazón.