Falece Dora Carrera, unha das nais fundadoras e referente da asociación Érguete e da loita contra o narcotráfico. "Na maior das tristezas soñaches que se podía vencer os narcotraficantes, que se podían salvar os fillos e fillas afectados e vós gañastes. Levas ese orgullo a onde vaias. Levas a vitoria e nós quedamos co teu exemplo", despídea a entidade nunha emotiva mensaxe.
España, Portugal Italia, Alemaña e Austria piden á Comisión Europea un imposto aos beneficios das enerxéticas. Os ministros de Economía dos cinco Estados propoñen un gravame coordinado para minorar o impacto da guerra en Irán, segundo conta El País.
A derruba dun caza dos EUA por parte de Irán abre un novo capítulo do conflito en Oriente Medio. Washington confirma a perda dun F-15 sobre territorio iraniano e medita unha operación de rescate. Foto: CC_BY Avash Media.
Este 3 de abril, Venres Santo, Praza.gal non se actualiza por descanso do persoal. Deixámosvos toda a información destes días e o suplemento da fin de Semana (Santa) para lerdes. E o sábado estamos de volta. Se cadra, este tamén é bo momento para seres de Praza.gal, porque hai moitas cousas que só podemos contar contigo e, ademais, ata o 80% da túa achega anual vénche de volta na declaración da renda.
Unha folga protesta contra a "sobrecarga laboral" en grandes almacéns neste Xoves Santo festivo no que se permite a apertura deses establecementos. Convocada pola CIG, denuncia que non haxa compensacións por traballar en días coma este. [Imaxe: CIG]
Engala con éxito a misión Artemis II da NASA coa que catro astronautas rodearán a lúa por primeira vez en medio século. A misión durará 10 días e será a que máis afaste un ser humano da terra en toda a historia. [Foto: NASA/Bill Ingalls]
O Ministerio de Agricultura levanta o confinamento de galiñas agás en 40 concellos galegos. A cría en liberdade das aves de curral será posible en 273 municipios de Galicia pero continuará prohibida en 40 por seren zonas de especial risco ou vixilancia. Podes consultar aquí o mapa coas localidades onde as galiñas teñen que seguir pechadas.
Fillas de Cassandra publicará ‘Tertúlia’, o seu novo álbum, o 24 de abril. O dúo vigués desvelou este mércores nas súas redes sociais a portada do disco: doce cadeiras que transforman a música en materia- A Fundación Granell de Santiago acollerá os días 7 e 8 de abril a exposición ‘TERTÚLIA: doce cancións, doce cadeiras’, onde o público poderá preescoitar de xeito exclusivo o álbum a través dunha ducia de pezas escultóricas.
Hoxe é o Día das Artes Galegas, que este ano se dedica ao fotógrafo José Suárez. O alaricano, que tamén foi cineasta e estivo influenciado polas vangardas artísticas, deixou unha obra variada e vibrante, etnográfica e humanista, con creacións nun gran número de países -Arxentina, Uruguai, Xapón...- que o converteron no "fotógrafo galego máis internacional". Allariz acolle a partir das 19 horas o acto central, no que intervirá o presidente da Real Academia Galega de Belas Artes, Manuel Quintana Martelo, e o académico Xurxo Lobato, encargado de realizar a laudatio.
O Consello de Ministros declara os hórreos patrimonio cultural inmaterial. O Goberno de España destaca que representan "un vínculo vivo entre pasado e presente" e que "contribúen á diversidade cultural e á cohesión social". O recoñecemento, di, "contribuirá á "preservación destas construcións". Galicia, con 100.000 hórreos e 3,38 por quilómetro cadrado, ten a maior densidade do mundo destas construcións.
