Fálase

Hoxe é o Día das Artes Galegas, que este ano se dedica ao fotógrafo José Suárez. O alaricano, que tamén foi cineasta e estivo influenciado polas vangardas artísticas, deixou unha obra variada e vibrante, etnográfica e humanista, con creacións nun gran número de países -Arxentina, Uruguai, Xapón...- que o converteron no "fotógrafo galego máis internacional". Allariz acolle a partir das 19 horas o acto central, no que intervirá o presidente da Real Academia Galega de Belas Artes, Manuel Quintana Martelo, e o académico Xurxo Lobato, encargado de realizar a laudatio.

• O fotógrafo José Suárez será o homenaxeado no Día das Artes Galegas 2026
• Unha ducia de momentos da vida do fotógrafo José Suárez, homenaxeado no Día das Artes Galegas 2026
• ENTREVISTA | Xosé Luis Suárez Canal: "A fotografía foi, para José Suárez, un xeito de explicar e transformar a realidade"

O Consello de Ministros declara os hórreos patrimonio cultural inmaterial. O Goberno de España destaca que representan "un vínculo vivo entre pasado e presente" e que "contribúen á diversidade cultural e á cohesión social". O recoñecemento, di, "contribuirá á "preservación destas construcións". Galicia, con 100.000 hórreos e 3,38 por quilómetro cadrado, ten a maior densidade do mundo destas construcións. 

• Unha ducia de hórreos que son patrimonio cultural e identidade de Galicia
• Os hórreos, en camiño de ser recoñecidos como patrimonio cultural inmaterial

O Festival de Cans presenta o cartel da edición deste ano, a cargo de Rei Zentolo, e anuncia que dedicará o foco internacional ao cineasta Paulo Carneiro. Caneiro, un dos cineastas portugueses actuais con maior proxección internacional, foi seleccionado en 2024 na Quincena de Cineastas do Festival de Cannes co seu filme A Savana e a Montanha. O festival, que se celebrará do 19 ao 23 de maio nesta aldea do Porriño, vén de abrir ademais a venda de entradas para as súas proxeccións.

• Jaione Camborda, Premio Pedigree do Festival de Cans

A directora xeral dos medios públicos galegos, Concha Pombo, anuncia que a CSAG presentará recurso contra a sentenza que condena a corporación por represaliar unha traballadora que participa en Defende A Galega. A responsable da antiga CRTVG di que con esta acción busca obter unha "interpretación unificada" de ditames semellantes e rexeitou valorar "casos particulares" tras ser cuestionada ao respecto por Mercedes Queixas (BNG) e Carmen Rodríguez Dacosta (PSdeG).

• Condenada a CRTVG por represaliar unha traballadora que participa en Defende a Galega

A primeira xuntanza das universidades sobre a descentralización do Grao de Medicina incorpora a reitora electa da USC, Rosa Crujeiras. A Consellería de Educación sinala que o encontro deste órgano procurou "facilitar a transición entre Antonio López e Rosa Crujeiras", que tras a súa vitoria electoral do 11 de marzo tomará posesión do cargo o 10 de abril nunha cerimonia solemne. [CC BY-SA Xunta]

• ENTREVISTA | Rosa Crujeiras:  "Non sei a cantos reitores preguntaron polas súas circunstancias familiares. No meu caso foi unha constante"
• HEMEROTECA | Pacto de Medicina: a inclusión das demandas da facultade no aval da USC mantén a desconfianza
• HEMEROTECA | Medicina ou o pavor político a tocar o estrutural

Así se distribuíron en 2025 as subvencións da Xunta ao funcionamento das forzas políticas con representación parlamentaria. Son 2 millóns de euros asignados en función dos resultados das últimas eleccións galegas. Trátase do primeiro reparto dun ano enteiro ligado aos comicios de 2024, o que implica que o PP ve lixeiramente reducida a súa asignación (uns 7.000 euros menos), o BNG experimenta un incremento (uns 20.000 máis); o PSdeG perde fondos (uns 18.000 euros) e DO obtén case 4.000 máis. A resolución oficial está publicada no DOG dende este martes.

Rueda di rexeitar valorar o afastamento do xuíz Luís Villares da sección do TSXG que axuíza sobre os eólicos ou contratos da Xunta pero "celebra" a decisión se procura a "imparcialidade". Afírmao, esgrime o presidente da Xunta, porque esa foi a razón ofrecida pola nova presidenta da Sala do Contencioso-Administrativo. [Imaxe: CC BY-SA Mónica Arcay Carro / Xunta]

• BNG e PSdeG secundan a preocupación pola "independencia xudicial" co traslado forzoso do xuíz Villares
• O xuíz Villares, afastado á forza da sección do TSXG que sentencia sobre eólicos e contratos da Xunta

O Ministerio de Consumo advirte a 13 inmobiliarias e fondos de investimento de que "deben prorrogar obrigatoriamente os contratos" de alugueiro de vivenda "dos seus inquilinos que caduquen entre o 22 de marzo de 2026 e o 31 de decembro de 2027 e que así o soliciten". O departamento que dirixe Pablo Bustinduy faino en virtude do Real Decreto Lei aprobado o pasado día 20 polo Consello de Ministros e que está pendente de convalidación do Congreso, pero en vigor a todos os efectos. O Ministerio estima que unhas 130.000 persoas poden beneficiarse desta prórroga en Galicia.

• Máis de 130.000 persoas poden beneficiarse en Galicia da prórroga extraordinaria de alugueiros

Principia na Coruña o corte total dunha das súas principais vías de acceso e saída, a avenida da Pasaxe (AC-12), por mor da demolición do viaduto de acceso ao CHUAC que a Xunta executa no marco da ampliación do complexo hospitalario. O Concello coruñés amosa nun mapa interactivo as alternativas para o acceso aos hospitais da contorna tanto en vehículo privado como en transporte público por uns traballos que obrigan a alterar o percorrido de ata seis liñas de autobuses urbanos. O corte total dura ata a madrugada do vindeiro xoves. As obras de ampliación do CHUAC están a desenvolverse cunha notable demora sobre os prazos prometidos por Feijóo como presidente da Xunta.

The Rapants xuntaron case 6.000 persoas no Multiusos Fontes do Sar de Santiago para a estrea das 12 cancións do cuarto LP da banda muradá. Galician Army, Grande Amore, Sara Faro (Fillas de Cassandra), Antía Ameixeiras (Caamaño&Ameixeiras) e 9Louro acompañáronos nesta grande festa da música galega, na que entregaron aos e ás asistintes o carné de socia/o de Rapants Club. Foto: Mattias Monsterkid

• 🟪🟧🟦 EN VINTE | 📺 VÍDEO | Vinte almorzando con The Rapants
• ENTREVISTA | The Rapants: "O que buscamos é afrontar todo o que poida xurdir no noso día a día evadíndonos das malas vibras a través da música"