Fálase

As esculturas do Mestre Mateo espoliadas polos Franco volverán a Santiago o 11 de decembro e exporanse no Museo do Pobo Galego. A alcaldesa da capital galega, Goretti Sanmartín, sinala nun vídeo divulgado este xoves que o 20N, aniversario da morte do ditador, é "un día magnífico" para anunciar o retorno dende Meirás das pezas que o Concello de Santiago conseguiu recuperar tras un longo litixio xudicial contra os herdeiros do xeneral golpista. Na imaxe, as esculturas procedentes da composición orixinal do Pórtico da Gloria, no Pazo de Meirás.

• O Supremo condena os Franco a devolver as esculturas do Mestre Mateo ao Concello de Santiago
• Os herdeiros de Franco admiten a derrota no caso das esculturas espoliadas en Santiago
• De Meirás ás esculturas: cando a política si actúa ante os espolios impunes dos Franco

O Tribunal Supremo condena o fiscal xeral do Estado a dous anos de inhabilitación por revelación de segredo. O alto tribunal fai responsable a Álvaro García Ortiz da filtración que concretou que o noivo da presidenta Ayuso quería pactar coa Fiscalía admitindo unha fraude fiscal.

• AMPLIAMOS 👉 O Supremo inhabilita o fiscal xeral
• HEMEROTECA | Raíces galegas no aborrecemento ao fiscal xeral polo PP

Jordi Turull, secretario xeral de Junts per Catalunya e María Dolores Etxano, senadora do PNV, debaten no serán deste xoves na Facultade de Historia de Santiago (19h30) sobre As nacionalidades históricas como contrapeso ao centralismo por convite do Partido Galego, representado na conferencia polo seu secretario xeral, Anxo Franco, e Aarón Pousada, das súas mocidades.

BNG, ERC e EH Bildu reclaman a ruptura coa monarquía e aseguran que "non haberá democracia mentres a xefatura do Estado non sexa elixida polo pobo". As tres formacións emiten un comunicado conxunto no 50º aniversario da morte de Franco no que consideran a monarquía "unha institución anacrónica e incompatible cos principios democráticos esenciais" e lembran que foi "imposta polo ditador a dedo". 

O BNG pide unha investigación do último accidente mortal nas obras do AVE porque "non é un feito illado". A senadora Carme da Silva lembra a "longa serie de sinistros laborais" nas obras da alta velocidade galega, con cando menos 15 obreiros falecidos desde 2007, segundo vén recompilando Praza.gal.

• Outro accidente mortal eleva cando menos a 15 os falecidos nas obras do AVE galego

Mobilización ante a sede da Consellería de Sanidade contra o plan do Sergas para atención primaria. Os sindicatos CIG, CSIF, CCOO e UGT chaman á folga do vindeiro día 26 e o sindicato de enfermaría SATSE convoca outro paro para o 4 de decembro. 

• O plan do Sergas para a atención primaria xa saca o persoal á rúa e suma voces en contra

O Ministerio de Cultura inicia os trámites para declarar a Ponte de Cruzul, en Becerreá, como Ben de Interese Cultural. A ponte foi proxectada polo enxeñeiro francés Lemaur no século XVIII por orde de Carlos III e foi fundamental na comunicación de Lugo, A Coruña e Ferrol coa Meseta a través do Camiño Real e, posteriormente, a N-VI, que tamén o empregou ata os anos 60 do pasado século, cando se construíu unha nova ponte. 

Trátase da única ponte neoclásica da provincia de Lugo, conta con tres arcos de medio punto de 12 metros de diámetro, una altura total de 29,20 metros e unha lonxitude de 93 metros. Acadou unha grande importancia estratéxica na Guerra de Independencia contra o exército de Napoleón. Imaxe: Estevoaei (CC-BY-SA)

Morre Julio Fernández, fundador de Filmax, aos 78 anos de idade. Nacido na Fonsagrada en 1947 e emigrado en Cataluña, converteu unha pequena distribuidora nunha produtora con varias divisións (Filmax, Castelao, Bren, Fantastic Factory) e máis dun cento de películas. Recibiu a Medalla Castelao e foi presidente da Asociación de Empresarios Galegos de Cataluña e presidente de honra do Cluster Audiovisual Galego.

Detido o presidente da Deputación de Almería pola compra irregular de máscaras contra a COVID. Xunto co presidente, Javier Aureliano, tamén foron detidos o seu vicepresidente e un alcalde, todos do PP. [Imaxe: Deputación de Almería]

A actriz María Vázquez gaña o XXIII Premio Ramón Piñeiro Facer País, que concede a Asociación Cultural Val de Láncara. "Representa con claridade os valores do premio: a defensa activa da lingua galega, o compromiso coa cultura galega, a posta en valor do rural e a proxección internacional do noso país desde unha óptica propia e sen renuncias", salienta a organización do galardón, que deu a coñecer o seu ditame este luns no Consello da Cultura Galega. A presidenta do CCG, Rosario Álvarez, eloxia o Premio Ramón Piñeiro como "un modelo de pluralidade e de traballo pola cohesión do territorio". A protagonista de Matria recibirá a distinción o vindeiro día 29 na Pobra de San Xiao de mans da anterior premiada, Yolanda Díaz Gallego. Na imaxe, María Vázquez durante unha entrevista no Vinte Almorzando de VINTE.

• 🟪🟧🟦EN VINTE | 📺 Vinte almorzando con María Vázquez