Feijóo insta a "volver saír á rúa" pola "liberdade de prensa". Faino en declaracións a EsRadio nas que anuncia mobilizacións do PP contra o Goberno de España. As declaracións do ex-presidente e actual líder do PP chegan ás portas do sexto aniversario do movemento Defende a Galega, que esixe o cumprimento íntegro da lei dos medios de comunicación públicos e a fin da "manipulación" na CRTVG. [Na imaxe, Feijóo entrevistado na TVG na súa etapa como presidente]
PARO REXISTRADO | As inscricións nas oficinas de emprego diminuíron en 2.677 durante o mes de abril en Galicia (-2,08% e na media estatal, -2,22%) e quedan en 126.334, outro mínimo dende que hai datos comparables. Son 13.009 menos que un ano antes (-9,34% interanual, máis do duplo que a media, situada no -4,37%). No mesmo mes, a afiliación media á Seguridade Social aumentou en 6.740 persoas (+0,63%) e chega aos 1,068 millóns, o que supón un aumento do 1,72% interanual. Na media estatal, o incremento da afiliación media é do 0,95% e supón superar o fito dos 21 millóns de persoas cotizando á Seguridade Social, un 2,36% máis que un ano antes.
O BNG levará o Parlamento "unha Lei do Viño de Galiza", co obxectivo de "apoiar" aos produtores e ás produtoras e "dar ao sector o impulso que precisa". Ana Pontón anunciou na celebración da XXXI Feira do Viño de Vilachá, na Pobra do Brollón, que o proxecto de lei formará parte dunha batería de iniciativas en defensa dun sector "clave para o desenvolvemento do rural" pola súa capacidade "para xerar riqueza e emprego, para fixar poboación e para preservar o territorio".
O Celta anuncia a posta en marcha do equipo de fútbol feminino para a próxima tempada. O club únese coa Unión Deportiva Mos para este proxecto, que presenta baixo o liderado da nova presidenta, Marián Mouriño. "O equipo nacerá a próxima tempada en Terceira Federación, máis equipos infantil, cadete e filial, coa clara vocación de crecer sen pausa", sinala o Celta nun comunicado. [Fotografía © RC Celta]
Ponte...nas Ondas! leva a Lisboa a súa defensa do patrimonio inmaterial galego-portugués. Unha delegación de alumnos, profesores e músicos galegos representou a iniciativa Ponte... nas Ondas! en Lisboa para presentar o modelo de boas prácticas co patrimonio cultural inmaterial que a UNESCO inscribiu en decembro de 2022 a proposta de Portugal e España. O Centro Galego acolleu unha xornada na que a rapazada puido entrevistar a Graciano Espinheira, de Barciademera; o grupo de pandereita Ghalderios; a Luiz Caracol e á cantora galega Uxía, madriña deste proxecto que se desenvolve nas aulas.
O eurodeputado galego do PP Francisco Millán Mon volve recuncar nas listas dos populares para as eleccións ao Parlamento europeo que encabeza a catalá Dolors Montserrat. O PP de Feijóo inclúe na candidatura europea, no décimo posto sendo o oitavo para Millán Mon, a Adrián Vázquez Lázara, que se presentou como galego –por ser a orixe dos seus pais– por Ciudadanos nos anteriores comicios.
A vacinación contra o Virus Respiratorio Sincitial (VRS) evita unhas 400 hospitalizacións de bebés menores de 6 meses e acada unha efectividade do 82%, segundo os datos da primeira campaña que vén de presentar o Sergas, que lembra que antes da pandemia da COVID este virus provocaba "entre 800 e 1.000 hospitalizacións" ao ano, tres de cada catro en menores dun ano de idade. Dende o pasado setembro e até marzo foron inmunizados 13.505 nenas e nenos. [Imaxe: CC BY-SA Xunta]
Festa por Luz Fandiño este domingo, 5 de maio, ás 11 horas no Museo do Pobo Galego. Amizades da poeta finada esta semana aos 92 anos organizan unha primeira homenaxe na que haberá espazo para o activismo, a poesía, a mocidade e o feminismo. [Fotografía de Sés e Luz Fandiño o pasado novembro na entrega do premio Facer País, outorgado pola Asociación Cultural Val de Láncara]
Botan a andar os dous departamentos que substitúen a desaparecida Secretaría Xeral de Igualdade coa toma de posesión das persoas que os dirixirán: María Quintiana, directora xeral de Promoción da Igualdade; e Roberto Barba, director xeral da Loita contra a Violencia de Xénero. Quintiana coordinaba ata agora as redes sociais do presidente da Xunta e Barba exercía de maxistrado do Xulgado de Violencia de Xénero número 1 da Coruña. Ambas áreas dependen agora da Consellería de Política Social e teñen rango orgánico inferior á anterior secretaría xeral. Estes nomeamentos son parte dos aprobados este pasado luns no Consello da Xunta.
O conselleiro de Presidencia, Diego Calvo, queda encargado do despacho dos asuntos do presidente da Xunta, Alfonso Rueda, durante a súa viaxe a Arxentina dos próximos días. O DOG publica o decreto que así o establece ás portas dunha viaxe na que Rueda reunirase con empresas pesqueiras galegas e a emigración.
