A primeira poxa eléctrica co tope do gas en vigor, a 'excepción ibérica' autorizada pola Comisión Europea, remata cunha baixada do 22% no prezo da luz no mercado maiorista. Pódese consultar máis información nesta ligazón e nestoutra, máis datos sobre o funcionamento do mecanismo para limitar o prezo do gas e mais as compensacións ás eléctricas. [Imaxe: CC BY-SA Juantiagues].
Pontón reclama que a recuperación do viaduto derrubado na A-6 sexa supervisada por unha comisión participada polo Estado, a Xunta e as forzas políticas e pide unha investigación "transparente" sobre o acontecido. "Se esta ponte estivese conectando Madrid, Catalunya ou Euskadi a resposta sería moi diferente", coida a portavoz nacional do BNG, que insta o Ministerio de Transportes a concretar os prazos da obra en canto sexa posible. Agárdase que este martes a Delegación do Goberno de España en Galicia achegue información ao respecto na sesión da Comisión Autonómica de Tráfico, Seguridade Viaria e Mobilidade Sostible que se celebra na Coruña. Na imaxe [CC-BY-NC-SA BNG], Pontón, Néstor Rego, Olalla Rodil e outros membros do BNG na contorna do viaduto caído, este luns.
A TVG anuncia a emisión este luns (23:00) dun especial titulado O meu último verán en Sanxenxo. O rei en Galicia centrado en Juan Carlos I e nos aspectos "máis curiosos das súas múltiples visitas a Sanxenxo", así como na súa "afección ao mundo da vela", todo tras a súa controvertida última viaxe á vila do Salnés. Abordará tamén, avanza, a "orixe da súa amizade" co regatista Pedro Campos. Na nota oficial divulgada pola canle pública non se especifica se o espazo se deterá tamén nos escándalos que atinxiron ao anterior xefe do Estado nos últimos anos, aos casos de fraude fiscal ou aos fondos opacos que manexou. [Imaxe: © TVG]
O PP atribúe á anterior dirección da formación o recurso presentado no Supremo contra a sentenza que condenou o partido e o seu ex-tesoureiro, Luis Bárcenas, pola reforma da súa sede central da rúa Génova. O Partido Popular anuncia que vai retirar o recurso e o seu vicesecretario de Institucións, Esteban González Pons, afirma que tiveron coñecemento del a través dos medios de comunicación.
O PP recorre no Supremo a sentenza que o pasado 2021 condenou o partido e o seu ex-tesoureiro, Luis Bárcenas, pola reforma da súa sede central da rúa Génova de Madrid (na imaxe) con máis dun millón de euros en diñeiro negro. A formación que lidera Alberto Núñez Feijóo alega que a Audiencia Nacional incorreu en fraude de lei e alega, entre outros aspectos, que os feitos prescribiran cando comezaron a investigarse. Aquel ditame volvera dar por acreditada a existencia dunha 'caixa B' no partido. Recentemente, Feijóo confirmou que cancela a venda do edificio, que decidira Pablo Casado coa intención de distanciarse de casos de corrupción coma este.
Marcos Calveiro, novo director de edicións da Editorial Galaxia. O escritor vilagarcián principiou a súa carreira literaria no eido infantil e xuvenil, no que foi recoñecido con premios como o Ala Delta, Barco de Vapor ou Lazarillo. En 2008, a súa novela para público adulto Festina Lente recibiu o Premio da Crítica e, en 2015, gañou o IX Premio Narrativa Breve Repsol con Fontán. En 2017, o seu O xardineiro dos ingleses levou o XXIX Premio García Barros. Recentemente, Galaxia publicou o primeiro tomo da súa saga Curros & Holmes, Curros & Holmes no misterio d’o Kapital, [Imaxe: © Anxo Cabada]
O pontés Miguel Alvariño proclámase campión de Europa de tiro con arco despois de gañar o campionato celebrado en Munich (Alemaña). [Imaxe: Real Federación Española de Tiro con Arco]
Non puido ser. O Dépor mantense na segunda b da liga de fútbol estatal ao non lograr o ascenso. 1 - 2 no marcador para o Albacete Balompié, que xa é de segunda. Nun partido de moita expectación, con 27.215 persoas en Riazor e milleiros en Cuatro Caminos, o gol do Albacete Balompié no minuto 82 igualou o marcador despois do primeiro gol marcado polo xogador do Deportivo Mario Soriano no minuto 26. Houbo prórroga e foi aí cando o equipo albaceteño logrou o gol da vitoria. Imaxe: @RCDeportivo
Ana Pontón reclama devolver ao galego a condición de lingua vehicular no ensino. Desde a xornada sobre a situación do galego, Medre a lingua, organizada este sábado polo BNG na Coruña, Pontón denunciou que o PP "estalle roubando ás novas xeracións a liberdade de poder falar en galego practicando unha política que non garante a aprendizaxe do idioma propio".
A portavoz nacional do BNG criticou que "a escola está convertida nun axente desgaleguizador" e salientou que a perda de falantes "empeza xa na etapa infantil", ao que se suma "o feito de que un 24% dos nenos e nenas menores de 14 anos non saben falar galego e un 30% non é capaz de escribilo".
A organización do festival O Son do Camiño traslada que catro das persoas feridas polo derrumbe do escenario principal durante a a montaxe recibiron a alta hospitalaria. Así, sinalan que os dous traballadores que continúan no hospital de Santiago polo sinistro que tivo lugar na mañá do venres “evolucionan favorablemente”. O director xeral de Emerxencias e Interior, Santiago Villanueva, manifestou que un deles está na UCI, cun prognóstico “favorable”. "O Son do Camiño segue adiante e celebrarase nas datas previstas", engade a organización.
