Fálase

"Vigo somos todos e todas, e por iso estamos aquí, para que se nos escoite na rúa xa que na alcaldía fan oídos xordos". Asociacións veciñais e colectivos ecoloxistas concentráronse este domingo na Porta do Sol de Vigo [na foto © Greenpeace Galicia] baixo o lema #VigoSomosTodxs reclamando "un modelo de cidade máis habitable e sustentable" que teña en conta á veciñanza "e non reduza á marxinalidade ás multiples asociacións e
colectivos" porque "non se pode construír un Vigo de costas aos veciños e veciñas". 

• Entidades viguesas de moi diversa orixe únense nunha manifestación para pedir que o Concello as "escoite"

A praza de María Pita da Coruña conmemora o Día mundial contra o cancro cun gran lazo humano conformado en apoio ás persoas que padecen a enfermidade. Unha iniciativa promovida pola Asociación española contra o cancro (AECC) e na que participaron a alcaldesa da cidade, Inés Rey; o delegado territorial da Xunta, Gonzalo Trenor; e o presidente da AECC Coruña, Manuel Aguilar; así como diversos membros da corporación municipal e centenares de coruñesas e coruñeses. 

Transportes reabre á circulación en ambos sentidos o treito da N-642 entre Foz e Burela afectado pola derruba do pasado xaneiro. O Ministerio resalta que se trata dun trazado provisional por continuar as obras, polo que pide "circular con precaución" na zona mentres os operarios "traballan na reparación definitiva". [Imaxe: Ministerio de Transportes]

• A caída da estrada entre Foz e Burela pon o foco nas eivas da mobilidade na Mariña e nas promesas para mellorala
• 🔊PODCAST | Fálase - Unha derruba na Mariña e un 'milagre' en Fitur

Catro persoas feridas ao envorcar na estrada entre cabo Silleiro e Oia un microbús da ruta Baiona - A Guarda. Un mariñeiro alertou os servizos de emerxencia tras presenciar o sinistro, no que foi preciso excarcerar a condutora e unha pasaxeira, segundo informa a Garda Civil. Tanto as dúas persoas excarceradas como outros dous pasaxeiros, feridos leves, "foron trasladados a centros hospitalarios".

A Xunta fai públicas as semanas nas que se desenvolverán os exames de 35 oposicións entre xuño e o outubro para cubrir 901 prazas. Os exercicios desenvolveranse en Santiago e Silleda e nesta ligazón podes consultar o calendario completo. O Goberno galego indica que "hai máis de 40.000 aspirantes inscritos para estas oposicións".

Galaxia publicará o 20 de setembro o libro inédito de Domingo Villar Síbaris, unha obra de teatro que o autor deixou rematada por completo e que entregou á editorial pouco antes do seu falecemento, o pasado 18 de maio. Trátase dunha peza dramática, con fino humor, protagonizada por un escritor que vén de recibir o Nobel pero que se atopa nun bloqueo creativo dende hai anos.

A Xunta di que publicará este venres as datas dos exames de 35 oposicións distintas que se celebrarán en xuño, xullo e outubro. Son máis de 900 prazas para as que están inscritos máis de 40.000 aspirantes.

PARO REXISTRADO | As inscricións nas oficinas de emprego aumentaron en 2.826 durante o mes de xaneiro (+1,99% e na media estatal, +2,49%) e quedan en 145.048, o que supón 8.884 menos que en xaneiro de 2022 (-5,77% en Galicia e -6,87% na media do Estado). No mesmo mes, a afiliación media á Seguridade Social caeu en 11.525 persoas, o que deixa a cifra total en 1,03 millóns. É un descenso mensual da afiliación do -1,11% (-1,06% na media estatal) e a cifra supera en 8.784 a poboación afiliada doce meses antes (+0,86% en Galicia, +2,31% no Estado).

• AMPLIAMOS 👉 A suba do paro en xaneiro volve a niveis previos á pandemia en Galicia, pero con máis poboación ocupada que daquela
• EPA | Galicia rematou 2022 con 13.000 postos de traballo máis pero amosa signos de estancamento na mellora do emprego

No centenario do pasamento de Manuel Murguía, o Concello da Coruña e a RAG instalaron no cemiterio de Santo Amaro unha placa conmemorativa coa cita "o primeiro é o noso idioma. El prométenos o porvir que procuramos", extractada do discurso do homenaxeado nos Xogos Florais de Tui. A alcaldesa, Inés Rey, destacou que "A Coruña sempre foi berce do máis fondo e verdadeiro galeguismo. A celebración do centenario de Murguía non podía ter o seu xerme noutro lugar diferente"

• A Coruña conmemora o centenario do pasamento de Murguía, "figura central da cultura galega contemporánea"

Pedro Sánchez reprocha a Feijóo que esixa "independencia" de RTVE mentres continúan na CRTVG as mobilizacións de persoal pola "descarada manipulación informativa". O presidente do Goberno de España sinalouno durante a súa comparecencia no Senado, do que o ex-presidente e actual líder do PP é membro por designación do Parlamento de Galicia.

• O PP esixe a fin da "colocación de afíns" e a "independencia de RTVE" tras unha década a incumprir a lei da CRTVG
• CRÓNICA | Feijóo á procura dunha neveira
• HEMEROTECA | Feijóo formulou catro iniciativas en medio ano como senador polo Parlamento, ningunha sobre Galicia