Fálase

O ex-director xeral de minas da Xunta, Ángel Bernardo Tahoces, declara este xoves no Xulgado de Instrución número 3 de Santiago como investigado por ter presuntamente asinado informes con falsidades para beneficiar a mineira de San Finx, en Lousame. A Confraría de Pescadores de Noia, Ecoloxistas en Acción e Verdegaia están persoadas na causa penal como acusación popular. Máis información, hoxe en Praza.gal [Na imaxe, Tahoces entrando a declarar nos xulgados de Santiago en 2022 CC-BY-SA Praza Pública]

• HEMEROTECA | A xustiza investiga por falsidade documental o director de Minas da Xunta de Feijóo
• HEMEROTECA | Feijóo cesa o director xeral de Minas, un veterano pendente de varias denuncias e investigacións xudiciais

A Xunta declara os dous primeiros focos de Enfermidade Hemorráxica Epizoótica (EHE) en dúas explotacións de gando bovino nos concellos coruñeses da Capela e Abegondo. A EHE é unha enfermidade infecciosa pero non contaxiosa producida por un virus que se transmite aos animais exclusivamente a través da picadura de mosquitos do xénero Culicoides spp, detalla Medio Rural. [Imaxe de arquivo CC-BY-SA Unións Agrarias]

Galicia, terceira comunidade por recadación no imposto temporal ás grandes fortunas. Conta con 91 declarantes que pagan 9,8 millóns de euros, só por detrás de Madrid e Andalucía, segundo datos do Ministerio de Facenda. As tres autonomías suman máis do 95% dos contribuíntes e da declaración. A Xunta recorrera este gravame estatal. Foto: CC-BY-SA Cottonbro.

• Menos impostos aos soldos baixos fronte a rebaixas con extra para ricos: colisión tributaria entre Estado e Xunta
• Novo imposto ás fortunas e rebaixa a quen menos gaña: as claves da reforma fiscal que vén

Falece un traballador nun estaleiro en Vigo. Un operario dunha empresa auxiliar morreu este mércores en Armón, logo de quedar atrapado nun guindastre. Tiña 41 anos. 

• As derivas do naval vigués: “Con 48 anos tiven que comezar de novo”
• HEMEROTECA | 67 persoas morreron en accidente laboral en Galicia en 2022, a cifra máis alta dende o 2009

A Deputación de Pontevedra nomea a Ángeles Tilve Jar como directora do Museo de Pontevedra. A historiadora da arte leva máis de tres décadas vencellada á institución cultural como conservadora de fondos xerais e responsable da súa área de coleccións. É a primeira muller que accede á dirección do Museo de Pontevedra, cargo que ocupaba desde 2019 o arqueólogo José Manuel Rey, que chegara ao posto tras un concurso convocado polo ente provincial. [Fotografía CC-BY-SA Rafa Estévez/Deputación de Pontevedra]

Aviso amarelo por chuvias e vento nas provincias da Coruña e Pontevedra e na Mariña nas últimas horas deste mércores e primeiras do xoves.

A Xunta eleva ao Supremo a sentenza que ampliaba a 22 semanas o permiso de paternidade dun empregado público. A Consellería de Facenda alega que a sentenza do TSXG de xuño non é de aplicación xeral, senón só para un caso concreto e recorre ao TS por “seguridade xurídica”.

O galego estréase no Congreso da man do socialista Besteiro mentres Vox abandona o hemiciclo e cisca os auriculares para a tradución no escano de Pedro Sánchez, ausente por motivos de axenda. 

• AMPLIAMOS | O galego estrea o plurilingüismo no Congreso entre apelacións a Castelao e a perrencha da ultradereita

A UE adía a decisión sobre a oficialidade do galego, o catalán e o éuscaro na UE. Moitos dos estados membros consideran que é "pronto" para decidir e os 27 esperarán a un ditame xurídico do Consello sobre as consecuencias da medida e unha análise do seu impacto económico. O ministro Albares propuxo priorizar o recoñecemento do catalán e aprazar o do galego e o éuscaro. Máis información, hoxe en Praza.gal Foto: UE. 

• O galego afronta unha semana transcendental no Congreso e na UE sen o apoio de PP nin Xunta

Francisco Castro anuncia a súa dimisión como director xeral da Editorial Galaxia nun texto no que critica que a empresa "se negase reiteradamente durante os últimos dez días a emitir un comunicado" que "desarmase as acusacións contra a Editorial" formuladas por Alberto Ramos na entrevista publicada por Praza.gal o pasado 8 de setembro.

• EDITORIAL | Carta de Praza ao público lector