Fálase

EH-Bildu logra sacar adiante unha moción na Comisión de Pesca no Senado grazas aos votos do PP. A iniciativa, defendida pola senadora de Bildu Idurre Bideguren -integrada no grupo parlamentario Izquierdas por la Independencia, que xunta a formación vasca con ERC-, insta o Goberno de España a "impulsar medidas contra a pesca ilegal, non declarada e non regulamentada". Os populares, imprescindibles para que fose aprobada -teñen maioría absoluta na Cámara Alta-, tentaron negociar unha emenda de adición ao texto que EH-Bildu non aceptou por non suscitar consenso co resto de grupos, pero así e todo votaron a prol porque "cremos que é oportuno traballar nesta liña", explicaron. Na imaxe [© Senado], un intre da comisión.

Falece o exalcalde de Vigo Ventura Pérez Mariño. O socialista ocupou a alcaldía de Vigo en 2003 en coalición co BNG durante seis meses, que tras unha moción de confianza deron lugar ao mandato da popular Corina Porro. Mariño, que dedicou a meirande parte da súa vida profesional á xudicatura, padecía a enfermidade de Parkinson. [Na imaxe CC-BY-SA Concello de Vigo, na súa etapa na alcaldía] 

18F RTVE ofrece esta noite (22h) o seu debate das eleccións galegas coa participación de Ana Pontón (BNG) e José Ramón Gómez Besteiro (PSdeG) e a ausencia de Alfonso Rueda (PP), que se negou a asistir e mais a enviar outro membro do PP que o substituíse. Exactamente á mesma hora, a TVG emite a súa entrevista electoral con Pontón malia á petición do Bloque de mudaren a data para evitar a coincidencia. Este martes a TVG ofreceu a entrevista con Besteiro.

• Persoal de RTVE lamenta a "falta de respecto" do PP por "vetar" o seu debate electoral
• CRÓNICA | A esquerda alimenta a crenza no cambio político ante a atonía de Rueda no debate da CRTVG

Falece o crego Xesús Mato, fundador de Fuxan os Ventos. O padre Mato, moi implicado durante décadas na difusión da cultura galega e no traballo a prol das persoas con discapacidade, tiña 91 anos e en 2018 fora distinguido coa Medalla Castelao (na imaxe).

• HEMEROTECA | Das festas ao casete: Fuxan os Ventos celebra o seu 50 aniversario cunha mostra de "amor ao país"
• HEMEROTECA | Unha ducia de momentos dos 50 anos de historia de Fuxan os Ventos

ERC desvela que o PP quixo pactar coa formación independentista unha investidura de Feijóo. A secretaria xeral de Esquerra, Marta Rovira, asegura que se negaron despois de que llelo propuxese o deputado popular Carlos Floriano, segundo dixo nunha entrevista en SER-Catalunya. Tras estas declaracións, a dirección dos populares asegura que "nunca" abordou esas "conversas ou negociacións" con Esquerra porque só "comentou" co partido independentista catalán que "deberían deixar gobernar" o ex-presidente galego por ser o "máis votado".

• Feijóo tenta resituar a postura do PP sobre Catalunya e Rueda pide o voto "para axudalo a que chegue ao Goberno de España"

A Xunta Electoral ordena o alcalde de Ourense a retirar o cartel no que anunciaba unha obra que non está nin adxudicada ao consideralo electoralista. Admite así a denuncia do PP e advirte a Gonzalo Pérez Jácome de que "se absteña de levar a cabo unha acción semellante durante o proceso electoral", así como da "apertura dun procedemento sancionador no caso de que non atenda a este requirimento". 

• A Xunta Electoral abre expediente a Rueda por facer electoralismo coas pensións non contributivas

Rueda asegura agora que está “en conversas” con Abanca para mercar o cine Fraga. O candidato do PP vén de anunciar nun acto electoral en Vigo que a Xunta está a negociar coa entidade propietaria do antigo teatro-cine Fraga para adquirilo e “devolverllo á cidadanía”. O PSOE de Vigo, pola súa banda, tamén desvelou este luns que Caballero "negocia" con Abanca a cesión gratuíta á cidade. Os anuncios chegan ao día seguinte da reportaxe publicada por PRAZA.gal sobre o abandono do histórico edificio.

O BNG considera que as palabras de Feijóo sobre os indultos corresponden o nerviosismo entre os populares cara ás eleccións. “Apertou o botón do pánico, está absolutamente desnortado. Leva toda esta semana atacando a Catalunya e agora resulta que o señor Feijóo é quen quere indultar a Puigdemont”, sinalou Ana Pontón este domingo nun mitin en Ferrol, no que salientou que no PP “saben que nestas eleccións un puñado de votos pode decantar a presidencia cara ao BNG”. [Fotografía do mitin en Ferrol CC-BY-SA BNG]

• Feijóo contempla un indulto a Puigdemont tras media campaña de Rueda contra as concesións a Catalunya

José Luis Rodríguez Zapatero criticou este domingo as revelacións de Feijóo sobre os indultos e que estivese “xerando crispación, atacando o Goberno dicindo que se rompe España, a Constitución e o Estado de Dereito, e resulta que todo era unha grande hipocrisía, unha gran mentira”. Zapatero acompañou a Besteiro nun mitin en Ferrol, onde afirmou que descubrir as verdadeiras intencións do agora líder do PP estatal supoñen “a fin dunha infamia”. “Imos conseguir que o próximo 18 de febreiro os mentirosos saian do Goberno de Galicia”, sentenciou Besteiro. [Fotografía de ambos en Ferrol CC-BY-SA PSdeG]

• Feijóo contempla un indulto a Puigdemont tras media campaña de Rueda contra as concesións a Catalunya

As enquisas abren a porta á perda da maioría absoluta do PP. O inquérito de 40dB para o xornal El País coloca o partido de Rueda entre os 36 e os 40 escanos e dálle o BNG entre 22 e 25 deputados e deputadas. O PSdeG situaríase entre os 11 e 13 escanos, Democracia Ourensana entraría no Parlamento cun deputado e Sumar quedaría fóra da Cámara. 

• DATOS | Así marchan as enquisas a unha semana das eleccións: o PP baixa e sobe o BNG, que concentra o voto da esquerda