Detido un traballador do metal que participaba na manifestación do sector na Coruña durante a segunda xornada de folga no siderometal da provincia coruñesa. A CIG condena a "actuación policial totalmente desproporcionada, brutal e inxustificada". Foto: CIG.
O voceiro parlamentario do PP, Pedro Puy, é trasladado ao hospital por mor dunha indisposición durante o pleno de investidura, no que viña de intervir. Foi atendido na unidade de hemodinámica do Clínico compostelán a causa dunha afección cardíaca e quedou ingresado. Substituiuno no resto da sesión o vicevoceiro da formación na Cámara, Miguel Tellado. Na imaxe, Puy nun pleno anterior.
Os líderes de Finlandia apoian oficialmente a adhesión do país á OTAN. O presidente e a primeira ministra anunciaron este xoves o seu apoio á posible unión á organización porque "fortalecería a seguridade" do Estado. Rusia ameazara con despregar armas nucleares se Finlandia ou Suecia entraban na OTAN.
O proxecto de lei do aborto que ultima o Goberno de España devolve o dereito á interrupción voluntaria do embarazo dende os 16 anos sen consentimento familiar e incorpora medidas como a supresión do IVE para os produtos de hixiene feminina ou baixas laborais por menstruacións dolorosas. Son algúns dos contidos do bosquexo da norma ao que accedeu a Cadena SER. Na imaxe, de arquivo, unha mobilización feminista contra a contrarreforma da lei do aborto impulsada polo Executivo de Rajoy, na etapa do ministro Ruiz-Gallardón.
O xulgado autoriza a venda de Barreras a Armón, que quedará co estaleiro por 14,7 millóns de euros. A xuíza explica que o maior cumprimento das obrigas cos acredores permitirá conservar as empresas auxiliares.
Destituída a directora do CNI, Paz Esteban, polo caso Pegasus. O Goberno de España, segundo avanzou El País, liga o cesamento da xefa dos servizos de intelixencia do Estado á confirmación de que Pedro Sánchez e a ministra Margarita Robles foron espiados mediante este sistema de intervención de teléfonos móbiles. Na imaxe (CC-BY-ND Ministerio de Defensa), Esteban na súa toma de posesión en 2020.
Rueda anuncia tres novas vacinas infantís cubertas pola sanidade pública: meninxite B, papiloma humano para nenos e antigripal tetravalente. É un dos anuncios do seu discurso de investidura, no que tamén avanza deducións do treito autonómico do IRPF especialmente para as familias con dous fillos. [Imaxe: CC-BY-SA Xunta]
Dende as 9:30, Alfonso Rueda pronuncia no Parlamento o seu discurso de investidura como candidato á presidencia da Xunta. O pleno continuará o xoves coas intervencións de BNG e PSdeG, a réplica do candidato e a votación.
A Comisión Europea dá o visto e prace ao plan para que os gobernos español e portugués limiten o prezo do gas e así baixar o custo da luz. O primeiro ministro portugués, António Costa, avanzou este martes a aceptación da UE ao proxecto elaborado xunto ao gabinete de Pedro Sánchez, polo que só resta que sexa aprobado nos consellos de ministros de ambos Estados, o cal sucederá esta semana -previsiblemente, este martes-. Nese momento, a aceptación preliminar virará definitiva. O límite temporal quedará fixado nunha media de 50 euros o megavatio / hora. Na imaxe, Sánchez e Costa en Bruxelas o pasado marzo, tras lograren que a Comisión aceptase a 'excepción ibérica' para o prezo do gas [© Pool Moncloa/Borja Puig de la Bellacasa]
A maxistrada que xulgará o accidente de Angrois a partir de outubro rexeita que dous avogados do Estado poidan intervir á vez nunha mesma sesión en defensa de Adif. As normas ditadas para o xuízo estableceron que cada parte pode mudar os seus avogados cando queira ao longo do xuízo pero que nunha mesma sesión só pode intervir un único letrado. Adif solicitou que no seu caso poidan intervir dous, un como parte prexudicada polo accidente do Alvia e outro como posible responsable subsidiario do mesmo no caso de que tamén o seu ex-director de Seguridade sexa condenado, pero a xuíza rexéitao co argumento de que ambas cuestións están ligadas.
