Beatriz Mato abandona a política. A ex-conselleira e edil na Coruña deixa a dirección do PP local, o grupo municipal e o Parlamento de Galicia. A que fora responsable de Traballo e Benestar ou Medio Ambiente en gobernos da Xunta pasa á actividade privada. Nas últimas eleccións municipais, mantivo o PP como primeira forza na Coruña pero a esquerda foi moi maioritaria na cidade.
O pleno de Santiago aproba a suspensión da apertura de novos apartamentos turísticos cos votos a prol de PSdeG, Compostela Aberta e BNG. O PP optou pola abstención.
Uns 9.500 fogares están sen luz en Galicia por mor dos efectos do temporal. Segundo Naturgy -antiga Fenosa- a maior parte das avarías concéntranse no sur do país. As incidencias tamén están a ser numerosas pola caída de pólas nos tendidos telefónicos. (Mapa: Naturgy)
A plataforma Queremos Galego maniféstase este serán nas sete principais cidades para reclamar o cumprimento das "demandas do Consello de Europa" para a lingua galega no seu recente informe, que inclúe reclamacións como a fin das "limitacións" á docencia en galego. Consulta aquí as horas e lugares das mobilizacións
O Tribunal de Xustiza da Unión Europea resolve que Oriol Junqueras, líder de ERC, tiña inmunidade como eurodeputado cando estaba en prisión provisional e tiña dereito a asumir a súa condición plena de membro do Parlamento Europeo. Consulta aquí a información e a sentenza íntegra.
Montse Dopico recolleu este mércores o premio Alfredo Vicenti de Xornalismo Cívico, concedido polo Ateneo de Santiago por unha entrevista publicada en Praza.gal á profesora e investigadora da UDC Belén Fernández Suárez a respecto dos seus estudos sobre migracións. O traballo de Montse Dopico tamén foi distinguido recentemente cun dos premios Comunicar en Igualdade, que galardoaron dúas reportaxes publicadas en Praza.gal. (Imaxe: Ateneo de Santiago)
O forte temporal deixa case 400 incidencias ata media tarde por toda Galicia. Caídas de árbores e pólas ou asolagamentos de estradas e vivendas están a ser as máis frecuentes, segundo o 112, que advirte tamén do risco de desbordamentos de varios ríos. Na imaxe, unha rúa asolagada no Concello de Bergondo, esta tarde.
A 'Palabra do Ano' decidirase entre seis termos: ecocidio, feminicidio, narcosubmarino, negociación, quecemento global e sentidiño. Pódese votar ata o 25 de nadal a través do Portal das Palabras da Real Academia Galega e a Fundación Barrié. Os dous últimos anos as palabras máis votadas foron deseucaliptización e afouteza.
Arquivada a causa contra os tres deputados de Unidas Podemos por altercados nunha mobilización por Alcoa. O procedemento segue aberto contra dous dos traballadores que participaron na protesta.
O persoal de Albada suspende a folga de recollida do lixo que comezaran hai dez días na Coruña, despois do anuncio do Concello de que procederá a intervir a concesión da planta de Nostián. A intervención, motivada polos graves incumprimentos da concesionaria, implica a retirada do ERTE presentado pola empresa, que afectaba a 39 traballadores
