Fálase

Mobilizacións en 19 localidades arredor do país "a prol das montañas e do rural galego e en contra da actual invasión eólica que ameaza o noso territorio". A coordinadora 'Eólica Así Non' convocou este domingo a "máis de 3.000 persoas" con motivo do Día mundial das montañas e "co gallo de reivindicar diante das administracións públicas a preservación destes ecosistemas fundamentais para a vida fronte ao actual espolio eólico, baixo o lema 'Na defensa das montañas. Eólica Así Non. Temos alternativa". [Na imaxe, a acción que tivo lugar en Becerreá]

• HEMEROTECA | Alcoa como comodín: os dous cambios legais cos que a Xunta autoriza eólicos en sitios non previstos e os acelera discrecionalmente 
• HEMEROTECA | Rueda prioriza outros 8 parques eólicos fóra do plan galego para o sector e xa son 13, todos os que pediron as empresas 

Feijóo pide eleccións anticipadas no Estado. O presidente do Partido Popular afirma nunha entrevista publicada polo xornal El Mundo este domingo que "chegou o momento" de que se convoquen uns comicios porque "o plan de Sánchez non ten lexitimidade". Para Alberto Núñez Feijóo, senador a proposta do Parlamento de Galicia, as eleccións deberan celebrarse "inmediatamente". [Na imaxe, Feijóo e Rueda o pasado venres na presentación en Santiago do libro de Xosé Luís Barreiro Rivas sobre o ex-presidente da Xunta]

• CRÓNICA POLÍTICA | Escóitano? É o silencio
• CRÓNICA POLÍTICA | Todo é gravísimo (agás algunha cousa)
• HEMEROTECA | Feijóo formulou catro iniciativas en medio ano como senador polo Parlamento, ningunha sobre Galicia 

A matemática María Elena Vázquez Cendón, premio María Josefa Wonenburguer. A Unidade Muller e Ciencia da Xunta outorga o galardón deste ano á ourensá, doutora en Ciencias Matemáticas, profesora de Matemática Aplicada e decana da Facultade de Matemáticas da Universidade de Santiago desde 2017. 

O Goberno galego destaca da carreira investigadora de Vázquez Cendón "as súas contribucións ao estudo das leis de balance hiperbólicas coa metodoloxía de volumes finitos que teñen como ámbitos de aplicación a análise do movemento da auga en ríos, escalas de peixes ou zonas costeiras e tamén do fluxo do gas, do sangue e o deseño industrial".

A presidenta do Parlamento Europeo, Roberta Metsola, informa de que a Eurocámara ten "cooperado plenamente" coas autoridades na investigación a unha das vicepresidentas da institución, Eva Kaili, por posibles subornos por parte de Qatar. "A Eurocámara mantense firme diante da corrupción", afirma Metsola na súa conta de Twitter despois dos rexistros na vivenda da vicepresidenta por orde da Fiscalía belga. 

"O Parlamento de Galicia acorda como resolución apoiar as demandas dos colectivos sociais e dos organismos internacionais para que se axilice e impulse a tramitación e aprobación polo Congreso dos Deputados da Proposición de lei de bebés roubados no Estado español". Unanimidade na Comisión 1ª, Institucional, de Administración Xeral, Xustiza e Interior da Cámara galega para trasladar ao Congreso este texto a partir dunha iniciativa do BNG apoiada por PP e PSdeG.

• "A túa nena morreu, xa nos encargamos nós": o roubo de bebés durante a ditadura en Lugo, nos actos da Deputación polo 25N

Este venres chega ás salas de cinema O corpo aberto, a primeira longametraxe de ficción de Ángeles Huerta. É un dos poucos filmes de terror da cinematografía galega, baseado no relato Lobosandaus de Arraianos, de Xosé Luís Méndez Ferrín, e con Tamar Novás, Victória Guerra e María Vázquez en papeis protagonistas. Nesta entrevista falamos coa súa directora e en VINTE, sabemos máis da película da man de María Yáñez.

• ENTREVISTA | Ángeles Huerta: "Ancorarse ao concreto é a maneira de facer universal calquera proposta artística"
• EN VINTE | O corpo aberto. Okupas de corpos na Raia Seca

Vox anuncia a presentación dunha segunda moción de censura contra o Goberno do PSOE e Unidas Podemos. A formación de extrema dereita presentara a primeira en 2020 e acabou sendo a menos apoiada de todas as formuladas dende a Constitución de 1978 con 298 votos en contra e só 52 a prol, os do propio partido que formulou. Daquela o PP aínda estaba liderado por Pablo Casado e agora, din, buscan "retratar" a todos os membros do Congreso, cos que anuncian "conversas" para buscar un "candidato neutral" para a operación, que non contará con votos dabondo para saír adiante [Imaxe: ©Congreso]

Veciñanza de Corrubedo (Ribeira) volveuse manifestar este xoves para reclamar a cobertura a tempo completo da praza médica do centro de saúde da parroquia. A mobilización veciñal, co impulso da Plataforma pola Defensa da Sanidade Pública do Barbanza, contou co apoio de forzas políticas coma o BNG, que durante a manifestación subliñou que "en Corrubedo falta médico" e na capitalidade do concello, Ribeira, "faltan 7 profesionais dos 14 que debería ter o centro de saúde".

• REPORTAXE | A formación da medicina de familia do futuro atranca na escasa planificación do Sergas e na saturación dos centros
• O PP censura no hospital de Verín que BNG e PSdeG non apoien a súa política sanitaria aos tres anos da crise do paridoiro

O PP redeseña a súa imaxe corporativa por décima vez dende a súa fundación. A formación agora liderada por Alberto Núñez Feijóo retoca o logotipo e imaxe de marca estreada na etapa de Pablo Casado, cando mudara elementos como a tipografía e incorporara as cores da bandeira de España nalgunha das súas aplicacións, e fai predominar as cores branca e azul. Prescinde, ademais, do uso corporativo da denominación populares, cuxo uso estenderan dende 2015. En Galicia, o partido aplicou tamén diversas mudanzas nos últimos anos non sempre concordando coa liña da dirección estatal para, por exemplo, facer destacar por riba das siglas palabras como Feijóo ou Galicia cunha tipografía semellante á marca turística da Xunta.

• HEMEROTECA | A Xunta legaliza a súa nova imaxe ano e medio despois de comezar a substituír a adoptada por Fraga tras o Prestige
• HEMEROTECA | Feijóo fai ver que non se presenta ás eleccións por "un partido", senón pola Xunta

O grupo de extrema dereita desarticulado en Alemaña, os Reichsbürger, pretendía asaltar o Parlamento (na imaxe) como parte dunha operación para dar un golpe de Estado. Deutsche Welle traza nesta información un perfil da organización, das súas pretensións e das operacións nese país para tentar frear o terrorismo ultradereitista. Nesta ligazón é posible ler unha tradución automática ao galego da información divulgada pola Fiscalía alemá sobre os detidos e os seus plans golpistas. Deles destacan, entre outros aspectos, que "seguen un conglomerado de teorías da conspiración das "denominadas ideoloxías Reichsbürger e QAnon" e "están firmemente convencidos de que Alemaña está gobernada actualmente por membros do chamado "Estado profundo".