Fálase

Vox anuncia a presentación dunha segunda moción de censura contra o Goberno do PSOE e Unidas Podemos. A formación de extrema dereita presentara a primeira en 2020 e acabou sendo a menos apoiada de todas as formuladas dende a Constitución de 1978 con 298 votos en contra e só 52 a prol, os do propio partido que formulou. Daquela o PP aínda estaba liderado por Pablo Casado e agora, din, buscan "retratar" a todos os membros do Congreso, cos que anuncian "conversas" para buscar un "candidato neutral" para a operación, que non contará con votos dabondo para saír adiante [Imaxe: ©Congreso]

Veciñanza de Corrubedo (Ribeira) volveuse manifestar este xoves para reclamar a cobertura a tempo completo da praza médica do centro de saúde da parroquia. A mobilización veciñal, co impulso da Plataforma pola Defensa da Sanidade Pública do Barbanza, contou co apoio de forzas políticas coma o BNG, que durante a manifestación subliñou que "en Corrubedo falta médico" e na capitalidade do concello, Ribeira, "faltan 7 profesionais dos 14 que debería ter o centro de saúde".

• REPORTAXE | A formación da medicina de familia do futuro atranca na escasa planificación do Sergas e na saturación dos centros
• O PP censura no hospital de Verín que BNG e PSdeG non apoien a súa política sanitaria aos tres anos da crise do paridoiro

O PP redeseña a súa imaxe corporativa por décima vez dende a súa fundación. A formación agora liderada por Alberto Núñez Feijóo retoca o logotipo e imaxe de marca estreada na etapa de Pablo Casado, cando mudara elementos como a tipografía e incorporara as cores da bandeira de España nalgunha das súas aplicacións, e fai predominar as cores branca e azul. Prescinde, ademais, do uso corporativo da denominación populares, cuxo uso estenderan dende 2015. En Galicia, o partido aplicou tamén diversas mudanzas nos últimos anos non sempre concordando coa liña da dirección estatal para, por exemplo, facer destacar por riba das siglas palabras como Feijóo ou Galicia cunha tipografía semellante á marca turística da Xunta.

• HEMEROTECA | A Xunta legaliza a súa nova imaxe ano e medio despois de comezar a substituír a adoptada por Fraga tras o Prestige
• HEMEROTECA | Feijóo fai ver que non se presenta ás eleccións por "un partido", senón pola Xunta

O grupo de extrema dereita desarticulado en Alemaña, os Reichsbürger, pretendía asaltar o Parlamento (na imaxe) como parte dunha operación para dar un golpe de Estado. Deutsche Welle traza nesta información un perfil da organización, das súas pretensións e das operacións nese país para tentar frear o terrorismo ultradereitista. Nesta ligazón é posible ler unha tradución automática ao galego da información divulgada pola Fiscalía alemá sobre os detidos e os seus plans golpistas. Deles destacan, entre outros aspectos, que "seguen un conglomerado de teorías da conspiración das "denominadas ideoloxías Reichsbürger e QAnon" e "están firmemente convencidos de que Alemaña está gobernada actualmente por membros do chamado "Estado profundo".

Pedro Castillo, destituído como presidente do Perú e detido tras anunciar a disolución do Congreso e a formación dun Goberno de excepción. Dina Boluarte (na imaxe), ata agora vicepresidenta, substitúe xa a Castillo na xefatura do Estado.

A catedrática de Filoloxía Románica da Universidade da Coruña María Dolores Sánchez Palomino ingresará o sábado 17 de decembro na Real Academia Galega como membro de número. Recoñecida internacionalmente como lexicógrafa, dirixe a revisión do 'Dicionario bilingüe castelán-galego' da Academia –que estará dispoñible proximamente en liña– e mais a Rede de Lexicografía RELEX, na que participan máis dun cento de investigadores de distintos países. Sánchez Palomino é académica correspondente dende 2004 e participa de maneira continuada na revisión e actualización do dicionario da RAG. 

• HEMEROTECA | Todos os libros editados pola RAG dende 1906, dispoñibles xa na rede: 37 mil páxinas encabezadas polo seu primeiro dicionario 

A Audiencia Provincial da Coruña desestima os recursos de apelación da Fundación Francisco Franco e a familia do ditador contra a decisión do Xulgado de Betanzos de arquivar a causa aberta contra as persoas que ocuparon simbolicamente o Pazo de Meirás no ano 2017, os autodenominados '19 de Meirás', maioritariamente militantes do BNG. A Audiencia destaca que non pode haber 'delito de odio' polo feito de "empolicarse a unha das soberbias torres do Pazo de Meirás e exhibir unha pancarta reivindicativa da titularidade pública dese Ben de Interese Cultural nun converxente contexto social de reclamación por parte da cidadanía". Tamén descarta o delito de violación de morada, xa que o inmoble estaba en horas de apertura a visitas guiadas

A actual vicepresidenta e ex-presidenta arxentina Cristina Fernández de Kirchner é condenada a seis anos de cadea por administración fraudulenta en obras públicas. A política peronista tamén é inhabilitada a perpetuidade para cargo público pero poderá recorrer. O fallo absólvea do cargo de asociación ilícita polo que tamén era acusada. [Imaxe: Casa Rosada]

O Goberno de Isabel Díaz Ayuso critica que coa elección de “La Coruña” como sede da Axencia de Intelixencia Artificial Pedro Sánchez “volveu traizoar a Madrid”. O vicepresidente e portavoz da Comunidad de Madrid, Enrique Ossorio, considera que coa designación da Coruña e Sevilla para as dúas novas axencias inténtase “cortar o crecemento” da capital do Estado.

• Parabéns de Rueda, Pontón e Formoso á Coruña por lograr a sede da AESIA para Galicia

#AESIA A Axencia Española de Intelixencia Artificial estará na Coruña. Así o vén de aprobar o Consello de Ministros

• AMPLIAMOS 👉 A Coruña consegue para Galicia a sede da Axencia Estatal de Intelixencia artificial
• HEMEROTECA | A Xunta elixe A Coruña como candidata á sede da Axencia de Intelixencia Artificial