A Casa-Museo Emilia Pardo Bazán celebra o 173 aniversario da escritora, nada o 16 de setembro de 1851, coa estrea de Contos escollidos. Emilia Pardo Bazán dende hoxe, unha serie de vídeos de curta duración nos que as voces convidadas len e comentan fragmentos do relato da homenaxeada que elixiron. A escritora viguesa Ledicia Costas protagoniza a primeira peza, na que comparte un anaco do relato Las medias rojas, unha desgarradora narración que conta a historia de Ildara, unha moza vítima da violencia sexista. Tamén participarán actriz María Vázquez, a poeta Lúa Mosquetera e o poeta Mario Obrero.
Fálase
Adiada a folga indefinida nas ITV galegas que ía comezar o día 16. CIG, UGT, CC.OO. e CSI-F aceptan paralizala para "dar marxe" ao persoal para analizar a proposta de acordo presentada pola empresa concesionaria no marco da mediación que desenvolve o Consello Galego de Relacións Laborais. Se finalmente non houbese acordo, o paro indefinido principiaría o día 23.
Dimite en pleno o goberno municipal de Mondariz. Os cinco membros da formación independente Alternativa por Mondariz, candidatura máis votada nas municipais de 2023, gobernaban en minoría co alcalde Xoán Carlos Montes -na imaxe- á fronte e aseguran marchar polo "bloqueo absoluto dos tres grupos municipais da oposición", PP (3 edís), BNG (2) e PSdeG (1). "A irresponsabilidade é tan grande que nin sequera renunciando nós a todas as nosas propostas queren sentar a negociar. A intervención do Estado é inmediata e afogarán a economía do Concello e a das veciñas e veciños", afirman. O vindeiro grupo de goberno, agregan, terá "ata finais de setembro para aprobar uns orzamentos e un plan de axuste que salven a Mondariz da parálise"
Rueda promete amortecer parte da suba do recibo do lixo provocado pola incineración en Sogama. O presidente anuncia que a Xunta "transferirá o 60% do incremento aos concellos" para que a cidadanía só teña que pagar o 40% dun tarifazo do que Rueda culpa exclusivamente a Pedro Sánchez. [📸Camión de refugallos no complexo de Sogama en Cerceda, durante unha visita da conselleira de Medio Ambiente, nunha imaxe de arquivo CC-BY-SA Xunta]
As Neves, de Sonia Méndez, chega á plataforma HBO MAX e sitúase entre as películas máis vistas. O filme estreouse a pasada primavera e foi o resultado de cinco anos de traballo dende a produtora Cósmica, que a realizadora dirixe xunto a Nati Juncal. A historia céntrase nas relacións entre un grupo de adolescentes nunha vila galega na que viven transitando a fronteira entre a hiperconectividade e o illamento.
- ENTREVISTA | Sonia Méndez: "As Neves' é unha película de xente boa facendo cousas malas sen querer"
- EN VINTE | Andrea Varela. O talento de Foz que protagoniza ‘As Neves’
A alcaldesa do Valadouro renuncia e entregará ao PP a alcaldía que logrou cos votos de PSdeG e BNG. María José Fernández é a única concelleira do partido independente Udival e, tras as eleccións municipais de 2023, ergueu o bastón de mando cos votos a prol de socialistas e nacionalistas, con cadanseus dous edís, aos que vén de destituír do goberno local. O vindeiro rexedor será José Manuel Lamela, líder local do PP, que ten 4 concelleiros.
Rueda admite que non leu o informe do Consello da Cultura crítico con Altri pero dise sorprendido de que "teña tanta importancia como para presentalo en rolda de prensa". O presidente da Xunta tamén asegura que nel "hai conclusións que desmontan" algunhas das críticas que se veñen facendo ao proxecto industrial.
A directora xeral nomeada por Rueda para litigar co Goberno de España asegura que recorrer a Lei de Amnistía dende a Xunta non é unha "decisión política". En entrevista co Faro de Vigo, Isabel Concheiro xustifica como responsable de Asuntos Constitucionais do Goberno galego que o recurso se basea en que a norma "afecta a Galicia"
A Xunta dá por extinguido o incendio de Entrimo que afectou ao parque do Xurés tras queimar 223 hectáreas. Nas últimas horas tamén quedaron extinguidos o incendio de Crecente que obrigara a desaloxar vivendas e outro en Oímbra que sumaron 267 e 27 hectáreas respectivamente. Na imaxe, de @BrifLaza, o incendio de Entrimo.
O incendio de Crecente que obrigou a desaloxar vivendas xa está extinguido tras queimar 267 hectáreas mentres que o de Entrimo, con máis de 200 hectáreas no parque do Xurés, está controlado. Nas últimas horas tamén quedou extinguido outro incendio en Oímbra de 26,98 hectáreas. Na imaxe, de @BrifLaza, o incendio de Entrimo.
