Fálase

Dimite en pleno o goberno municipal de Mondariz. Os cinco membros da formación independente Alternativa por Mondariz, candidatura máis votada nas municipais de 2023, gobernaban en minoría co alcalde Xoán Carlos Montes -na imaxe- á fronte e aseguran marchar polo "bloqueo absoluto dos tres grupos municipais da oposición", PP (3 edís), BNG (2) e PSdeG (1). "A irresponsabilidade é tan grande que nin sequera renunciando nós a todas as nosas propostas queren sentar a negociar. A intervención do Estado é inmediata e afogarán a economía do Concello e a das veciñas e veciños", afirman. O vindeiro grupo de goberno, agregan, terá "ata finais de setembro para aprobar uns orzamentos e un plan de axuste que salven a Mondariz da parálise"

Rueda promete amortecer parte da suba do recibo do lixo provocado pola incineración en Sogama. O presidente anuncia que a Xunta "transferirá o 60% do incremento aos concellos" para que a cidadanía só teña que pagar o 40% dun tarifazo do que Rueda culpa exclusivamente a Pedro Sánchez. [📸Camión de refugallos no complexo de Sogama en Cerceda, durante unha visita da conselleira de Medio Ambiente, nunha imaxe de arquivo CC-BY-SA Xunta]

• +INFO 👉🏻 Queimar o lixo sae caro: claves do novo tarifazo de Sogama
• HEMEROTECA | Tarifazo en Sogama: claves da suba do recibo do lixo que vén 
• Setenta puntos sospeitosos de 'contaminantes eternos' en Galicia, sinalados nunha investigación internacional

As Neves, de Sonia Méndez, chega á plataforma HBO MAX e sitúase entre as películas máis vistas. O filme estreouse a pasada primavera e foi o resultado de cinco anos de traballo dende a produtora Cósmica, que a realizadora dirixe xunto a Nati Juncal. A historia céntrase nas relacións entre un grupo de adolescentes nunha vila galega na que viven transitando a fronteira entre a hiperconectividade e o illamento. 

• ENTREVISTA | Sonia Méndez: "As Neves' é unha película de xente boa facendo cousas malas sen querer"
• EN VINTE | Andrea Varela. O talento de Foz que protagoniza ‘As Neves’

A alcaldesa do Valadouro renuncia e entregará ao PP a alcaldía que logrou cos votos de PSdeG e BNG. María José Fernández é a única concelleira do partido independente Udival e, tras as eleccións municipais de 2023, ergueu o bastón de mando cos votos a prol de socialistas e nacionalistas, con cadanseus dous edís, aos que vén de destituír do goberno local. O vindeiro rexedor será José Manuel Lamela, líder local do PP, que ten 4 concelleiros.

• HEMEROTECA | O 28M, concello a concello: do dominio do PP en 191 municipios aos feudos da esquerda 

Rueda admite que non leu o informe do Consello da Cultura crítico con Altri pero dise sorprendido de que "teña tanta importancia como para presentalo en rolda de prensa". O presidente da Xunta tamén asegura que nel "hai conclusións que desmontan" algunhas das críticas que se veñen facendo ao proxecto industrial.

• Menos emprego do prometido, máis eucalipto e riscos: duro informe do Consello da Cultura sobre Altri
• O PP pon no albo o Consello da Cultura polo seu crítico informe sobre Altri

A directora xeral nomeada por Rueda para litigar co Goberno de España asegura que recorrer a Lei de Amnistía dende a Xunta non é unha "decisión política". En entrevista co Faro de Vigo, Isabel Concheiro xustifica como responsable de Asuntos Constitucionais do Goberno galego que o recurso se basea en que a norma "afecta a Galicia"

• Feijóo garante que Rueda non negociará o financiamento de Galicia de xeito bilateral co Estado
• HEMEROTECA | Rueda promete máis "sentidiño" fronte ao Estado e recoloca competencias económicas da Xunta

A Xunta dá por extinguido o incendio de Entrimo que afectou ao parque do Xurés tras queimar 223 hectáreas. Nas últimas horas tamén quedaron extinguidos o incendio de Crecente que obrigara a desaloxar vivendas e outro en Oímbra que sumaron 267 e 27 hectáreas respectivamente. Na imaxe, de @BrifLaza, o incendio de Entrimo.

• A meteoroloxía axuda cos incendios de Crecente e Entrimo, que suman 500 hectáreas, case como no que ía de ano

O incendio de Crecente que obrigou a desaloxar vivendas xa está extinguido tras queimar 267 hectáreas mentres que o de Entrimo, con máis de 200 hectáreas no parque do Xurés, está controlado. Nas últimas horas tamén quedou extinguido outro incendio en Oímbra de 26,98 hectáreas. Na imaxe, de @BrifLaza, o incendio de Entrimo.

• A meteoroloxía axuda cos incendios de Crecente e Entrimo, que suman 500 hectáreas, case como no que ía de ano

O vigués Martín de la Puente gaña xunto con Daniel Caverzaschi a medalla de bronce en dobres de tenis en cadeira de rodas nos Xogos Paralímpicos de París. É o quinto metal conseguido polos deportistas galegos, despois do ouro de Susana Rodríguez Gacio en triatlón e dos bronces de Juan Antonio Saavedra en tiro,  Damián Ramos en ciclismo e Judith Rodríguez en esgrima.

• A viguesa Susana Rodríguez Gacio acada de novo o ouro paralímpico de triatlón
• O pontevedrés Juan Antonio Saavedra, bronce en tiro, suma a súa terceira medalla na historia dos Xogos Paralímpicos

Ana Pontón reprocha que Rueda non acudise á apertura do curso universitario na Coruña -na imaxe- por asistir ao encontro de dirixentes autonómicos do PP convocado por Feijóo en Madrid. "Non se pode permitir que atenda a compromisos partidistas en vez de cumprir cos que ten como presidente da Xunta", di a portavoz nacional do BNG, que si estivo no acto solemne, no que o Goberno galego estivo representado polo conselleiro de Educación, Román Rodríguez, e dous delegados territoriais canda outras autoridades como a alcaldesa coruñesa, Inés Rey. No seu discurso o reitor da UDC, Ricardo Cao, reclamou da Xunta maior financiamento estrutural para as universidades públicas. [Imaxe: © UDC]

• HEMEROTECA | Feijóo liga inmigración e delincuencia no acto do PP polo que Rueda faltou ao Consello da Xunta