Fálase

Ana Pontón reprocha que Rueda non acudise á apertura do curso universitario na Coruña -na imaxe- por asistir ao encontro de dirixentes autonómicos do PP convocado por Feijóo en Madrid. "Non se pode permitir que atenda a compromisos partidistas en vez de cumprir cos que ten como presidente da Xunta", di a portavoz nacional do BNG, que si estivo no acto solemne, no que o Goberno galego estivo representado polo conselleiro de Educación, Román Rodríguez, e dous delegados territoriais canda outras autoridades como a alcaldesa coruñesa, Inés Rey. No seu discurso o reitor da UDC, Ricardo Cao, reclamou da Xunta maior financiamento estrutural para as universidades públicas. [Imaxe: © UDC]

• HEMEROTECA | Feijóo liga inmigración e delincuencia no acto do PP polo que Rueda faltou ao Consello da Xunta

O PPdeG pregunta cando vai recibir Sánchez a Rueda tras a súa investidura como presidente da Xunta hai cinco meses. Faino o mesmo día en que Feijóo reúne en Madrid os presidentes autonómicos do PP, incluído Rueda, para desbotar negociacións bilaterais con Sánchez do financiamento autonómico. Un encontro no que o PP tentou reproducir a estética dunha Conferencia de Presidentes pero sen respectar a precedencia protocolaria destas.

• HEMEROTECA | Feijóo convoca "en setembro" ao PP ante a "urxencia nacional" que ve en Catalunya tras criticar Tellado as vacacións do Goberno
• HEMEROTECA | Antes un mitin en Cerdedo-Cotobade que salvar España, ou como Feijóo xa esqueceu a 'aldraxe de Soutomaior'

O PP coloca no Consello Consultivo de Galicia o maxistrado Andrés Lago Louro, segundo instrutor da causa penal polo accidente de Angrois, proceso que se estendeu durante case dez anos. Lago Louro propuxo en 2016 xulgar só ao maquinista do Alvia pero a Audiencia da Coruña rectificouno e finalmente a sentenza emitida hai mes e medio condenou tamén a un ex-cargo de Adif. Lago Louro substitúe no Consultivo a José Luis Costa Pillado, recolocado por Feijóo no Consello Xeral do Poder Xudicial.

O PP descualifica o informe do Consello da Cultura Galega sobre Altri. A través dun comunicado dos eurodeputados Francisco Millán Mon e Adrián Vázquez, os populares pregúntanse "que fai un órgano especializado na cultura valorando unha instalación industrial" e reducen os seus autores a "supostos especialistas" que "participaron ao longo deste ano en mesas redondas, colaboracións con medios de comunicación ou mobilizacións "sempre en contra de Altri" e "como parte da órbita do BNG". "O informe do CCG contrasta coa independencia dos funcionarios da Xunta, que seguen analizando a proposta de forma rigorosa e atendendo unicamente a criterios técnicos", din.

• AMPLIAMOS 👉O PP pon no albo o Consello da Cultura polo seu crítico informe sobre Altri
• Menos emprego do prometido, máis eucalipto e riscos: duro informe do Consello da Cultura sobre Altri

Os incendios de Crecente e Entrimo superan xa as 200 hectáreas cada un, o primeiro con risco para vivendas e o segundo no parque do Xurés tras entrar desde Portugal. Na imaxe, de @BrifLaza, o incendio de Entrimo.

• HEMEROTECA | Os incendios queimaron o 12% da Rede Natura e o 25% dos parques naturais na última década

A Xunta mantén que rescatar a AP-9 custaría en torno á metade do estimado polo Goberno de Rajoy e polo ministro Óscar Puente. A Consellería de Planificación de Infraestruturas asegura contar xa cun informe elaborado por "unha empresa experta e independente", a consultora Eptisa, que cifra "en 526 millóns o custo da transferencia" á Xunta e "entre 1.612 e 2.355" un eventual rescate. O Goberno do PP de Rajoy bloqueou o traspaso da autoestrada asegurando mediante un cálculo erróneo que un eventual rescate custaría uns 4.300 millóns e o actual ministro de Transportes cifrouno nuns 4.000 millóns. Polo momento, o Goberno galego non fixo público o devandito informe. Na imaxe, a conselleira María Martínez Allegue presentando as cifras co director da Axencia Galega de Infraestruturas, Francisco Menéndez, e con Marcos Maderuelo, representante de Eptisa.

• Audasa pasa a pagar 7,5 millóns de IBI, o 9% dos seus beneficios, e non pode compensalo con máis peaxes
• HEMEROTECA (XUÑO) | Traspaso ou rescate? Guía para non perderse no votado sobre a AP-9
• HEMEROTECA (2016) | O goberno de Rajoy incha cun cálculo erróneo o custo do eventual rescate da AP-9

Un incendio iniciado en Portugal queima unhas 180 hectáreas no parque natural Baixa Limia-Serra do Xurés, no concello de Entrimo. A parte do incendio en terreo portugués atinxe unhas mil hectáreas. Ademais, a Consellería do Medio Rural informa doutro incendio en Crecente dunhas 100 hectáreas pero que obrigou a decretar a denominada "situación 2" durante a noite pola proximidade do lume a dous núcleos de poboación: Ameixeira e Os Reinaldos. Na imaxe, o incendio de Entrimo [ © Brif Laza]

• HEMEROTECA | Os incendios queimaron o 12% da Rede Natura e o 25% dos parques naturais na última década

A Xunta urxe o Goberno de España a "examinar o  expediente de Altri para que poida obter canto antes fondos europeos". A conselleira de Economía acusa o Executivo central de "discriminar a Galicia" por aprobar este pasado martes unha achega para un proxecto de hidróxeno verde na Comunitat Valenciana e Murcia da compañía Cobra Solutions. Non promover que Altri logre financiamento público, agrega María Jesús Lorenzana, supón unha "discriminación absurda" a Galicia. A compañía portuguesa aspira a 250 millóns públicos para erguer a factoría en Palas en alianza coa Xunta e a enerxética Greenalia.

• HEMEROTECA | A Comisión Europea non recibiu aínda ningunha solicitude de fondos para Altri
• HEMEROTECA | A UE pon o foco nas augas que quere captar Altri e lembra que a Xunta ten pendentes melloras ambientais
• HEMEROTECA | Os fondos públicos que Altri reclama para instalarse en Palas dependen do visto e prace ambiental da UE 

José Luis Escrivá, ata agora ministro de Transformación Dixital, será o novo gobernador do Banco de España. No ministerio será substituído por Óscar López, ata agora xefe de gabinete de Pedro Sánchez. 

• HEMEROTECA | Os días de Pedro Sánchez de 'fontaneiro' na rúa do Pino

O ciclista coruñés Damián Ramos acada unha nova medalla de bronce para Galicia nos Xogos Paralímpicos de París. Ramos foi terceiro na proba contra o reloxo individual C4. É o terceiro metal conseguido polos deportistas galegos, despois do ouro de Susana Rodríguez Gacio e do bronce de Juan Antonio Saavedra.

• A viguesa Susana Rodríguez Gacio acada de novo o ouro paralímpico de triatlón
• O pontevedrés Juan Antonio Saavedra, bronce en tiro, suma a súa terceira medalla na historia dos Xogos Paralímpicos