Fálase

A Audiencia Provincial de Pontevedra ordena indemnizar con 15.000 euros a Laureano Oubiña por vulnerar o seu dereito á intimidade nunha escena sexual da serie 'Fariña', baseada no libro de Nacho Carretero sobre o narcotráfico en Galicia e producida por Bambú e Atresmedia e Netflix. A xustiza entende que esa escena coa súa falecida segunda esposa non está xustificada "pola liberdade creativa innegable dos creadores e produtores" e falla a favor de eliminar esas imanes das plataformas nas que aínda se pode ver a serie. Os maxistrados non estiman o resto das peticións de Oubiña contra a serie na súa sentenza, contra a que cabe interpoñer recurso. [Na imaxe © Netflix, Carlos Blanco interpretando a Oubiña en 'Fariña' e Javier Rey como Sito Miñanco]

• HEMEROTECA | O éxito de 'Fariña', desacougo polo regreso do pasado incómodo de Galicia

Vinte en Vilalba. «Aquí ves futuro porque o hai». A capital da Terra Chá é a primeira parada de Vinte na vila, o novo espazo de VINTE concibido para contarnos máis e mellor a nós mesmas e entre nós

Acordo PSOE-PP para renovar o Consello Xeral do Poder Xudicial tras máis de cinco anos de bloqueo. Ambas formacións pechan o pacto coa intermediación da Comisión Europea, que vén urxindo o desbloqueo, e acordan tamén tramitar unha reforma legal no Congreso en materia de "independencia" xudicial, así como nomear un novo membro do Constitucional a proposta dos populares. Entre as incorporacións ao órgano de goberno da xudicatura estará José Luis Costa Pillado, presidente do Consello Consultivo de Galicia a proposta do PP dende 2014. Na imaxe, sede do Consello do Poder Xudicial, que agora é renovado

• AMPLIAMOS | PSOE e PP pactan a renovación do Poder Xudicial tras cinco anos e medio caducado
• HEMEROTECA | Feijóo quere colocar no Constitucional o seu maxistrado de referencia do órgano que avala decisións da Xunta
• HEMEROTECA | Feijóo rompe a última hora: do Estatuto e o decreto do galego ao Poder Xudicial

Bichara Khader, profesor e experto en relacións euro-árabes, é recibido polo Concello de Santiago e presenta o seu libro Palestina, a traxedia permanente ás 18 horas deste martes na Facultade de Xeografía e Historia. O libro foi editado en galego polo Igadi, organizador de varios actos con Khader en Santiago en colaboración coa USC e a Fundación Araguaney.

O pleno do Concello de Santiago aproba a ordenanza que completa a limitación de pisos turísticos cos votos en contra do PP. O grupo municipal socialista no Concello anunciou no pleno que votaría a favor, en contra da dirección marcada polo partido en Compostela, e uniuse á proposta de BNG e Compostela Aberta. “Hoxe decidimos ser leais e consecuentes. Leais coa cidade, cos veciños, co que defende o PSOE en España e en Galicia e co que defendemos sempre estes concelleiros. Debemos ser consecuentes co que fixemos e coherentes co que dicimos”, defendeu a concelleira socialista Mercedes Rosón. 

• AMPLIAMOS 👉 A norma que completa o freo a pisos turísticos en Santiago, aprobada co PSdeG malia á orde da dirección do partido
• ENTREVISTA | Iago Lestegás: "Queremos xente vivindo na cidade histórica e sen comercio de proximidade non hai residentes"
• O goberno de Santiago frea as tendas de recordos para dar aire ao comercio tradicional

A Indicación Xeográfica Protexida Vaca e Boi de Galicia/Vaca y Buey de Galicia pasa a denominarse oficialmente só en castelán: Vaca Gallega-Buey Gallego. A Consellería de Medio Rural completou a pasada semana a mudanza coa publicación da correspondente orde no DOG, onde indica que "no proceso de tramitación" desta IXP ante a Comisión Europea "houbo dificultades técnicas para que a denominación a inscribir fose Vaca e Boi de Galicia/Vaca y Buey de Galicia", vixente dende 2017, polo que durante o proceso "houbo que cambiala" pola definitiva só en castelán. A nova IXP está promovida polo Consello Regulador Ternera Gallega, que tamén se identifica unicamente en castelán. O BNG, a través do seu deputado Secundino Fernández, cualifica a remuda como "vergoñenta". Na imaxe, o logotipo orixinal da IXP e o novo, segundo foron publicados no DOG -no caso do novo, con fonte de letra diferente á que vén empregando a propia IXP-.

Falece José María Caneda, histórico ex-presidente da SD Compostela, aos 77 anos por mor do cancro que padecía. Caneda encabezou o club compostelán dende finais dos anos 80 do século pasado e liderouno na súa época de maior éxito, co ascenso á Primeira División na temporada 1993-94 e a permanencia nesta categoría durante catro campañas. A actual dirección do club despídeo agradecéndolle "facer realidade o soño da nosa cidade". "Sempre estarás nos nosos corazóns", engaden. Na imaxe, Caneda durante un acto institucional en 2009.

Xa se coñece o cartel da manifestación do vindeiro domingo 30 que chama a "arrodear a Xunta ao berro de Altri Non", convocada pola Plataforma Ulloa Viva e a Plataforma en Defensa da Ría de Arousa. A cita é ás 12 horas no Complexo de San Caetano.

• Ulloa Viva e a Plataforma en Defensa da Ría de Arousa chaman a "arrodear San Caetano" para protestar contra Altri

Morre o sindicalista ourensán Xosé Gómez, un dos fundadores do sindicato de Comisións Obreiras en Galicia. Foi delegado no I Congreso Nacional de CCOO de Galicia, celebrado en 1978 e entre 2002 e 2008 foi secretario xeral das CCOO de Ourense. Amelia Pérez -secretaria xeral de CCOO-Galicia- destacou que Gómez "participou en todos os conflitos e mobilizacións da provincia de Ourense no último medio século"

O modelo turístico "desexable" é o que se desenvolve "dende a preservación do comercio tradicional e as súas relacións coa poboación local", conclúe a Rede Galabra da USC nun informe presentado este venres. Os comerciantes composteláns aseguran que a súa clientela segue a ser maioritariamente local e é esta tamén a clientela máis desexable. A presentación deste informe produciuse nunha semana na que o Goberno local de Santiago anunciou a limitación da apertura de tendas de souvenirs para "protexer e fomentar o comercio de proximidade", nunha medida apoiada por unha boa parte do comercio da zona vella.

• Corenta comercios da zona histórica compostelá saen na defensa do freo ao monocultivo turístico
• O goberno de Santiago frea as tendas de recordos para dar aire ao comercio tradicional