Fálase

A Indicación Xeográfica Protexida Vaca e Boi de Galicia/Vaca y Buey de Galicia pasa a denominarse oficialmente só en castelán: Vaca Gallega-Buey Gallego. A Consellería de Medio Rural completou a pasada semana a mudanza coa publicación da correspondente orde no DOG, onde indica que "no proceso de tramitación" desta IXP ante a Comisión Europea "houbo dificultades técnicas para que a denominación a inscribir fose Vaca e Boi de Galicia/Vaca y Buey de Galicia", vixente dende 2017, polo que durante o proceso "houbo que cambiala" pola definitiva só en castelán. A nova IXP está promovida polo Consello Regulador Ternera Gallega, que tamén se identifica unicamente en castelán. O BNG, a través do seu deputado Secundino Fernández, cualifica a remuda como "vergoñenta". Na imaxe, o logotipo orixinal da IXP e o novo, segundo foron publicados no DOG -no caso do novo, con fonte de letra diferente á que vén empregando a propia IXP-.

Falece José María Caneda, histórico ex-presidente da SD Compostela, aos 77 anos por mor do cancro que padecía. Caneda encabezou o club compostelán dende finais dos anos 80 do século pasado e liderouno na súa época de maior éxito, co ascenso á Primeira División na temporada 1993-94 e a permanencia nesta categoría durante catro campañas. A actual dirección do club despídeo agradecéndolle "facer realidade o soño da nosa cidade". "Sempre estarás nos nosos corazóns", engaden. Na imaxe, Caneda durante un acto institucional en 2009.

Xa se coñece o cartel da manifestación do vindeiro domingo 30 que chama a "arrodear a Xunta ao berro de Altri Non", convocada pola Plataforma Ulloa Viva e a Plataforma en Defensa da Ría de Arousa. A cita é ás 12 horas no Complexo de San Caetano.

• Ulloa Viva e a Plataforma en Defensa da Ría de Arousa chaman a "arrodear San Caetano" para protestar contra Altri

Morre o sindicalista ourensán Xosé Gómez, un dos fundadores do sindicato de Comisións Obreiras en Galicia. Foi delegado no I Congreso Nacional de CCOO de Galicia, celebrado en 1978 e entre 2002 e 2008 foi secretario xeral das CCOO de Ourense. Amelia Pérez -secretaria xeral de CCOO-Galicia- destacou que Gómez "participou en todos os conflitos e mobilizacións da provincia de Ourense no último medio século"

O modelo turístico "desexable" é o que se desenvolve "dende a preservación do comercio tradicional e as súas relacións coa poboación local", conclúe a Rede Galabra da USC nun informe presentado este venres. Os comerciantes composteláns aseguran que a súa clientela segue a ser maioritariamente local e é esta tamén a clientela máis desexable. A presentación deste informe produciuse nunha semana na que o Goberno local de Santiago anunciou a limitación da apertura de tendas de souvenirs para "protexer e fomentar o comercio de proximidade", nunha medida apoiada por unha boa parte do comercio da zona vella.

• Corenta comercios da zona histórica compostelá saen na defensa do freo ao monocultivo turístico
• O goberno de Santiago frea as tendas de recordos para dar aire ao comercio tradicional

Marilar Aleixandre, distinguida co Premio Luís Porteiro Garea "polo seu compromiso coa lingua galega no ensino das ciencias". A escritora e catedrática de Didáctica das Ciencias Experimentais e profesora ad Honorem da Facultade de Ciencias da Universidade de Santiago recibe o premio, organizado pola USC, con "enorme alegría" porque implica recoñecer que "a lingua galega pode e debe ser utilizada no ensino das ciencias, e empregala supón establecer un modelo para o alumnado que conformará as vindeiras xeracións de docentes". [Imaxe: © Santi Alvite / USC]

• HEMEROTECA | 'As malas mulleres' de Marilar Aleixandre gañan un Premio Nacional de Narrativa ata agora inzado de homes
• HEMEROTECA | Marilar Aleixandre ingresa na RAG cun chamado a "termar da paisaxe"
• HEMEROTECA | "É moi importante que haxa máis mulleres nas institucións, mais tamén que haxa mulleres feministas"
• HEMEROTECA | Un texto de Marilar Aleixandre e Ánxela Bugallo, o artigo de investigación educativa máis citado da última década

O Goberno de España pacta con EH-Bildu prorrogar a prohibición dos cortes de subministros básicos (luz, auga e gas) e o mantemento da tarifa rebaixada para caldeiras comunitarias ata xaneiro de 2025. A formación soberanista vasca garante con este acordo o seu voto favorable ao decreto polo que se prorrogarán as medidas do Executivo do PSOE e Sumar fronte á crise de prezos, que o Consello de Ministros aprobará proximamente.

• Os prezos dispáranse en Galicia ao maior ritmo do Estado coa inflación máis elevada do último ano
• HEMEROTECA | A poboación galega que non pode pagar por ter a casa á temperatura axeitada é a maior en quince anos
• HEMEROTECA | O Goberno de España mantén os descontos en transporte e alimentos e o imposto á banca

A Xunta dá permiso ambiental para un parque eólico de 11 aeroxeradores entre Barreiros e Ribadeo e rexeita outro polo seu impacto sobre a praia das Catedrais.

• HEMEROTECA | Cos eólicos que hai entre Muras e Ourol as aves xa teñen "permanentemente un elevado risco de colisión", admite a Xunta

O Goberno de España suprimirá o IVE do aceite de oliva dende o 1 de xullo e aprobará deixalo co tipo súper reducido (do 4%) xunto a outros alimentos básicos cando deixen de estar en vigor as medidas contra a inflación, na liña do pactado con Junts a comezos de ano. Adiantouno esta mañá a Cadena SER. A espiral inflacionista xeral, unida ás malas colleitas de oliva por mor da seca, contribuíu a disparar os prezos do aceite. Actualmente, o IPC para o aceite medra en Galicia por riba do 40% interanual. [Imaxe: CC-BY Villa Vyctor]

• Os prezos dispáranse en Galicia ao maior ritmo do Estado coa inflación máis elevada do último ano

Pontón anuncia que o BNG solicitará unha comisión de investigación no Parlamento "sobre a privatización e a ampliación da concesión da AP9". Tras advertir a Comisión Europea -como avanzaron Faro de Vigo e a Cadena SER- que o Goberno de Aznar "planificaba dende 1999 a privatización de Audasa" e que a prórroga do ano 2000 foi "un mecanismo para aumentar o seu valor de mercado", a líder do Bloque cre preciso aclarar na Cámara todas esas "zonas de sombra".

• Traspaso ou rescate? Guía para non perderse no votado sobre a AP-9
• A prórroga de Aznar á AP-9 sen concurso público segue sen convencer á UE, que pide máis explicacións a España
• HEMEROTECA | Esta fin de semana remataría a peaxe da AP-9 se Aznar non a prorrogase ata 2048
• HEMEROTECA | A ilegalidade que a UE detecta na prórroga de Aznar a Audasa ata 2048 fai revivir a súa controvertida privatización
• HEMEROTECA | De Ence á AP-9: os fíos que unen as privatizacións estrela de Aznar en Galicia e as súas concesións prorrogadas