Fálase

O Goberno de España suprimirá o IVE do aceite de oliva dende o 1 de xullo e aprobará deixalo co tipo súper reducido (do 4%) xunto a outros alimentos básicos cando deixen de estar en vigor as medidas contra a inflación, na liña do pactado con Junts a comezos de ano. Adiantouno esta mañá a Cadena SER. A espiral inflacionista xeral, unida ás malas colleitas de oliva por mor da seca, contribuíu a disparar os prezos do aceite. Actualmente, o IPC para o aceite medra en Galicia por riba do 40% interanual. [Imaxe: CC-BY Villa Vyctor]

• Os prezos dispáranse en Galicia ao maior ritmo do Estado coa inflación máis elevada do último ano

Pontón anuncia que o BNG solicitará unha comisión de investigación no Parlamento "sobre a privatización e a ampliación da concesión da AP9". Tras advertir a Comisión Europea -como avanzaron Faro de Vigo e a Cadena SER- que o Goberno de Aznar "planificaba dende 1999 a privatización de Audasa" e que a prórroga do ano 2000 foi "un mecanismo para aumentar o seu valor de mercado", a líder do Bloque cre preciso aclarar na Cámara todas esas "zonas de sombra".

• Traspaso ou rescate? Guía para non perderse no votado sobre a AP-9
• A prórroga de Aznar á AP-9 sen concurso público segue sen convencer á UE, que pide máis explicacións a España
• HEMEROTECA | Esta fin de semana remataría a peaxe da AP-9 se Aznar non a prorrogase ata 2048
• HEMEROTECA | A ilegalidade que a UE detecta na prórroga de Aznar a Audasa ata 2048 fai revivir a súa controvertida privatización
• HEMEROTECA | De Ence á AP-9: os fíos que unen as privatizacións estrela de Aznar en Galicia e as súas concesións prorrogadas

A xuíza instrutora do Tribunal Supremo envía a xuízo a José Manuel Baltar, na actualidade senador do PP, por un delicto contra a seguridade viaria por presuntamente conducir un coche a 215 km/h na autovía A-52.

• HEMEROTECA | A maxistrada do Supremo que investiga a Baltar por ir a 215 por hora nun coche oficial pide quitarlle a inmunidade
• HEMEROTECA | Baltar nega ante o Supremo que conducise a 215 km/h e atribúe as acusacións a unha "campaña"

Alcaldesas e alcaldes de Galicia e Portugal inauguran en Lugo a praza do Eixo Atlántico, a primeira dedicada nunha localidade galega á entidade que agrupa gobernos locais da Eurorrexión. Esta praza, no barrio lucense da Piringalla, súmase ás que o Eixo Atlántico ten dedicadas en Bragança, Matosinhos, Braga, Vila Nova de Gaia e Viana do Castelo. Cadrando cos actos reuniuse en Lugo a Comisión Executiva do Eixo, con acordos comoa  celebración en Sarria da VIII Expocidades en 2025. Na imaxe, a rexedora de Lugo amosa a escultura conmemorativa da nova praza aos seus homólogos de Santiago e Pontevedra en presenza de Luís Nobre, alcalde de Viana do Castelo e actual presidente do Eixo Atlántico. [Imaxe: © Concello de Lugo]

• O Eixo Atlántico propón unha folla de ruta de políticas sociais para reducir o 25% de persoas excluídas na Eurorrexión
• Rachar coa mirada "fatalista" do rural despoboado para poñer as persoas no centro: o Eixo Atlántico propón estratexias de Lugo a Mirandela

O Ministerio de Cultura inicia os trámites para extinguir a Fundación Francisco Franco ao abeiro da Lei de Memoria Democrática. Así o vén de anunciar o ministro, Ernest Urtasun. A entidade, dedicada a exaltar o ditador, xestionou durante anos as visitas ao Pazo de Meirás, nas que aproveitaba a obriga legal de apertura para divulgar a súa propaganda -na imaxe, unha mostra-. A súa actividade no recinto cesou coa recuperación de Meirás para o patrimonio público en 2020.

• HEMEROTECA | As visitas a Meirás manteñen a apoloxía do fascismo e cargan contra a exhumación de Franco
• HEMEROTECA | De visita no Pazo de Meirás: unha oda ao ditador Franco
• HEMEROTECA | A Fundación Franco asume que utilizará o Pazo de Meirás para facer apoloxía da ditadura

O DOG publica a suspensión cautelar de licenzas de negocios ligados ao turismo no casco histórico de Santiago, que entrará en vigor este xoves. A medida decidida polo Concello pode durar ata un ano, período durante o cal o goberno local prevé reformar o Plan Especial que rexe o urbanismo no relativo a usos comerciais nesta contorna para "fomentar o comercio de proximidade", subliñan.

• O goberno de Santiago frea as tendas de recordos para dar aire ao comercio tradicional

Bankinter absorbe a que fora rede exterior de Novagalicia Banco, a entidade resultante da fracasada fusión de Caixa Galicia e Caixanova. Evo Banco, que foi vendido en 2014 a un fondo de investimento estadounidense por orde do Estado no marco do rescate a Novagalicia, era dende 2019 unha filial de Bankinter, que di pretender con esta operación "potenciar a transformación dixital do grupo". Na imaxe, unha oficina de Evo no inicio da súa actividade [© Evo Banco]

• HEMEROTECA (2023) | Da fracasada fusión a Abanca: dez anos da compra dos restos das caixas galegas
• HEMEROTECA (2022) | Novacaixagalicia, caso pechado
• HEMEROTECA (2013) | A oposición en pleno pide explicacións pola venda de Evo Banco
• HEMEROTECA (2012)| Novagalicia Banco operará no exterior baixo a marca Evo Bank

A Executiva Nacional do PSdeG confirma que non autorizou o pacto do alcalde socialista do Carballiño para gobernar a vila en coalición co PP. "En coordinación" coa Executiva provincial ourensá, a dirección que encabeza José Ramón Gómez Besteiro advirte de que, se o pacto chega a "materializarse", tomará "todas as medidas previstas" nas súas normas internas contra os edís.

Noam Chomsky non faleceu. Hai uns minutos cometemos un erro ao publicar un fálase dando conta de maneira apresurada da morte do lingüísta, seguindo as informacións que estaban a difundir medios de todo o planeta, algúns moi próximos ao activista e ante a imposibilidade de confirmalo de forma directa. En calquera caso, isto non xustifica o erro cometido. Pedimos desculpas á nosa audiencia.

O eurodeputado do PP Millán Mon propón que sexa ilegal cubrir o escano dun membro do Parlamento Europeo se dimite para dar paso ao seguinte integrante a candidatura.  Así o afirmou nunha entrevista na Radio Galega no marco dunha crítica ao BNG polos acordos da coalición Agora Repúblicas, que inclúen a entrada na Eurocámara dos seus membros en función dos resultados en cadansúas circunscricións. Na imaxe, Millán Mon nun mitin con Rueda durante a campaña das recentes eleccións europeas.

• CRÓNICA | Que non volva medrar a herba
• O PP gaña pero Feijóo non esmaga, o PSOE resiste, o BNG sorrí
• O BNG impera na esquerda alén PSdeG dez anos despois de xermolar as mareas