Fálase

A Delegación do Goberno en Galicia concede os premios Meninas aos equipos Viogen da Garda Civil, á Marcha Mundial das Mulleres, ao Burela Fútbol Sala, á Asociación de Profesionais dos Centros de Información á Muller ASOCIM e ao Comando Igualdade do IES Alexandre Bóveda de Vigo. O recoñecemento, que chega á súa quinta edición e se entregará o vindeiro 21 de novembro con motivo do 25N (día da eliminación da violencia contra a muller), inclúe tamén unha mención honorífica á xornalista ourensá Cristina Huete

O portugués João Pedro Rodrigues recibe este sábado o Premio Cineuropa. O cineasta lisboeta será homenaxeado no Salón Teatro nunha sesión na que tamén presentará Fogo-Fátuo, o seu último filme, que foi estreado na Quincena de realizadores de Cannes

Pedro Sánchez activa a prometida reforma do delito de sedición, que pasará a denominarse de "desordes públicos agravados". PSOE e Unidas Podemos presentan estes venres os detalles da modificación, avanzada polo presidente do Goberno de España nunha entrevista con laSexta que recolle infoLibre. Nesta ligazón, o texto completo da reforma, segundo a cal o novo tipo penal implicará condenas de prisión de 3 a 5 anos e ata 8 de inhabilitación. A sedición supuña ata 15 anos de cadea.

O Consello da Xunta encarga por 33,8 millóns as obras da primeira fase da ampliación da súa sede central de San Caetano, cuxa remodelación completa superará os cen millóns de euros.

• HEMEROTECA | A Xunta suma outros oito millóns de euros ao custo das obras na súa sede central, que supera xa os cen

Unha testemuña clave de Adif di que o risco de despiste do maquinista de Angrois debía avalialo Renfe: “Que cada pau aguante a súa vela”. O máximo responsable de enxeñaría da empresa pública xestora das liñas exculpa o seu compañeiro responsable da seguridade acusado polo accidente ao mesmo nivel que o condutor.

• AMPLIAMOS 👉 "Que cada pau aguante a súa vela": unha testemuña clave de Adif di que o risco de despiste do maquinista de Angrois debía avalialo Renfe

A Unidade de Delitos Económicos da Policía investiga o director de El Correo Gallego por presunto branqueo de fondos que recibía de entidades públicas como a Xunta, segundo informa este xoves en exclusiva elDiario.es. As pescudas están dirixidas polo xulgado de instrución número 1 de Santiago. O xornal compostelán está actualmente en proceso de ser vendido por orde xudicial tras a quebra da empresa editora.

• HEMEROTECA | O xulgado pon á venda 'El Correo Gallego' tras a quebra da editora e di que hai "máis dunha entidade do sector" interesada nel
• HEMEROTECA | 'El Correo Gallego' pide a súa liquidación tras o que o Colexio de Xornalistas considera unha "nefasta xestión empresarial"

O Parlamento encárgalle un informe sobre a situación da Pediatría na Atención Primaria ao Sergas. Unha petición que forma parte dunha iniciativa defendida polo BNG no pleno da Cámara e que contou co apoio do PP e do PSdeG. No documento que terán que remitir desde Sanidade, nun prazo máximo de tres meses, deberá figurar o número de pediatras que traballan agora no sistema e a súa distribución nos centros de saúde do país, a súa situación laboral e o número de nenos e nenas que atende cada profesional. [Na imaxe CC-BY-SA BNG a deputada Montse Prado]

• REPORTAXE | "Traballamos a mínimos para máximos": Pediatría ao límite no centro de saúde e no hospital

Un xuíz de Barcelona cita como investigado a Pablo Casado por afirmar durante un acto con Feijóo en Abegondo en 2021 [na imaxe] que en Catalunya hai "profesores con instrucións" de impedir que o alumnado vaia ao lavabo se non fala catalán. O ex-líder do PP, denunciado pola Generalitat, terá que declarar o 30 de xaneiro e pode facelo dende a sede do partido se o desexa.

• HEMEROTECA (2021) | Feijóo critica “o peor Goberno da historia de España” e que se faga política “ata coa lingua”

Falece o operario ferido no incendio da antiga fábrica de Pontesa en Ponte Sampaio, nunha nave que segundo o Concello de Pontevedra carece de licenza. Trátase de Benito González, concelleiro do PSdeG en Marín. O secretario xeral do PSdeG, Valentín González Formoso, trasladou xa as súas condolencias á familia do finado, "un gran compañeiro e unha gran persoa". Tamén o lembrou o presidente da Xunta, Alfonso Rueda, no inicio da sesión de control no Parlamento, entre aplausos dos tres grupos en homenaxe ao traballador falecido.

Achados nos xulgados de Lugo, cinco anos despois, os expedientes dos que depende o posible arquivo das últimas acusacións da 'Operación Pulpo' que pesan sobre José Ramón Gómez Besteiro, ex-secretario xeral do PSdeG. Trátase dunha investigación lanzada pola xuíza Pilar de Lara, despois sancionada, referida á súa etapa como presidente da Deputación de Lugo. É unha información do xornal El Progreso. Na imaxe, Besteiro en 2016 [CC BY-SA Praza.gal]

• HEMEROTECA | A Audiencia de Lugo arquiva o caso que empurrou a Besteiro fóra do liderado do PSdeG ao velo baseado en "meras sospeitas"