Fálase

O Parlamento encárgalle un informe sobre a situación da Pediatría na Atención Primaria ao Sergas. Unha petición que forma parte dunha iniciativa defendida polo BNG no pleno da Cámara e que contou co apoio do PP e do PSdeG. No documento que terán que remitir desde Sanidade, nun prazo máximo de tres meses, deberá figurar o número de pediatras que traballan agora no sistema e a súa distribución nos centros de saúde do país, a súa situación laboral e o número de nenos e nenas que atende cada profesional. [Na imaxe CC-BY-SA BNG a deputada Montse Prado]

• REPORTAXE | "Traballamos a mínimos para máximos": Pediatría ao límite no centro de saúde e no hospital

Un xuíz de Barcelona cita como investigado a Pablo Casado por afirmar durante un acto con Feijóo en Abegondo en 2021 [na imaxe] que en Catalunya hai "profesores con instrucións" de impedir que o alumnado vaia ao lavabo se non fala catalán. O ex-líder do PP, denunciado pola Generalitat, terá que declarar o 30 de xaneiro e pode facelo dende a sede do partido se o desexa.

• HEMEROTECA (2021) | Feijóo critica “o peor Goberno da historia de España” e que se faga política “ata coa lingua”

Falece o operario ferido no incendio da antiga fábrica de Pontesa en Ponte Sampaio, nunha nave que segundo o Concello de Pontevedra carece de licenza. Trátase de Benito González, concelleiro do PSdeG en Marín. O secretario xeral do PSdeG, Valentín González Formoso, trasladou xa as súas condolencias á familia do finado, "un gran compañeiro e unha gran persoa". Tamén o lembrou o presidente da Xunta, Alfonso Rueda, no inicio da sesión de control no Parlamento, entre aplausos dos tres grupos en homenaxe ao traballador falecido.

Achados nos xulgados de Lugo, cinco anos despois, os expedientes dos que depende o posible arquivo das últimas acusacións da 'Operación Pulpo' que pesan sobre José Ramón Gómez Besteiro, ex-secretario xeral do PSdeG. Trátase dunha investigación lanzada pola xuíza Pilar de Lara, despois sancionada, referida á súa etapa como presidente da Deputación de Lugo. É unha información do xornal El Progreso. Na imaxe, Besteiro en 2016 [CC BY-SA Praza.gal]

• HEMEROTECA | A Audiencia de Lugo arquiva o caso que empurrou a Besteiro fóra do liderado do PSdeG ao velo baseado en "meras sospeitas"

A conselleira de Medio Ambiente reivindica a caza do lobo en León xunto á voceira do PP, Concepción Cuca Gamarra e outros membros da directiva de Feijóo. Tras varios reveses xudiciais sufridos polo Goberno galego e outros executivos dos populares fronte á orde estatal que aumenta a protección desta especie, os populares aseguran que a medida só obedece a unha "política errónea e ideolóxica de persecución ao gandeiro". Ángeles Vázquez acudiu á visita a Burón (León) na súa calidade de membro da xunta directiva estatal do PP. [Imaxe: © PP]

• HEMEROTECA | A Audiencia volve rexeitar o recurso da Xunta contra a orde estatal que aumenta a protección do lobo
• HEMEROTECA | A Xunta mantén a súa defensa da caza do lobo malia que dende 2013 non se abateu ningún de forma legal en Galicia

A plataforma de empresarios do transporte por estrada que impulsou o paro do sector a pasada primavera convoca outro a partir do vindeiro día 14. Na imaxe, escolta policial para un convoi de camións durante a devandita mobilización, en marzo deste ano.

• HEMEROTECA | O heteroxéneo paro no transporte recrúa: das peticións de axuda á esixencia de dimisión de Sánchez con raíces en Galicia
• HEMEROTECA | "A suba do gasóleo non é só un problema do transporte, senón de todos os sectores. Necesitamos medidas de fondo"

O DOG publica os dous días festivos que terá en 2023 cada concello galego a maiores dos doce que haberá en todo o país.

Morre aos 83 anos Vicente Couce, un dos curas ‘vermellos’ de Ferrol, encarcerado pola ditadura. Couce foi xulgado polo Tribunal de Orden Público (TOP) por asistir a "reuniones de una organización laboral declarada ilegal", solicitar fondos na misa para apoiar aos obreiros que foran detidos e por realizar "propaganda ilegal" ao editar "300 ejemplares a multicopista de un folleto de carácter extremista”.

• HEMEROTECA | Os curas do cinto vermello de Ferrol, contra Franco
• HEMEROTECA | Unha ducia de cregos cos pés na terra

Traballadoras dos servizos de axuda no fogar, en folga indefinida, maniféstanse en Santiago en reclamación dun “convenio digno”. A CIG asegura que os paros están a ter un seguimento do 80% nas súas primeiras xornadas.

• Folga indefinida na axuda no fogar: "Abocan as traballadoras á pobreza"

Gonzalo Navaza ingresou este sábado na Real Academia Galega cun discurso sobre os nomes de persoa na toponimia do seu Lalín natal. O escritor e tradutor ocupa a vacante producida pola morte o pasado ano do historiador Xosé Ramón Barreiro, presidente da RAG durante case unha década.

• HEMEROTECA (2021) | A RAG elixe novo académico a Gonzalo Navaza e incorpora a Celia Pereira e Ramón Nicolás como correspondentes