O Concello da Coruña comparece como parte na causa xudicial aberta contra a Liga e o Club de Fútbol Fuenlabrada polo brote de coronavirus importado á cidade. O goberno local, que xa denunciou o caso á Fiscalía, sinala que esta nova decisión se debe á intención de "actuar coa máxima contundencia" contra quen "movidos por intereses espurios, puxeron en risco á cidade" aínda "sabendo que nas súas filas se detectaran positivos" da COVID-19.
27 persoas illadas entre o persoal do hospital Álvaro Cunqueiro de Vigo tras teren contacto cunha paciente que deu positivo por coronavirus na PCR previa a unha operación cirúrxica, que foi suspendida, informa o Sergas. Recólleo a TVG. Consulta neste espazo de Praza.gal máis información sobre o caso e os datos máis recentes da COVID-19 en Galicia.
A Xunta actualiza os territorios de "obrigado rexistro" para o control de viaxeiros pola COVID-19 antes de que venza o prazo: agora si estará incluído Madrid e fica fóra Portugal. "Continúan na lista Aragón, Cataluña, Navarra e País Vasco", agrega Sanidade, que publicará a resolución nunha edición extraordinaria do DOG, esta tarde. Ampliamos a información neste espazo
O Parlamento instala paneis de seguridade entre os escanos en vésperas da sesión constitutiva da XI Lexislatura, que se celebra este venres, para evitar contaxios do coronavirus. Aínda que o lexislativo galego ten habilitada a votación telemática para algúns supostos, o Regulamento fixa que todos os seus membros estean presentes para prometer ou xurar o cargo e non dispón de ningún recinto maior que o propio hemiciclo para manter maior distancia entre escanos. (Imaxe: Parlamento de Galicia)
Dous incendios forestais queiman unhas 100 hectáreas en dúas parroquias de Viana do Bolo: Pradorramisquedo e Rubiais. Na tarde do mércores tamén se produciu un incendio en Bugallido (Ames), que Medio Rural dá xa por extinguido tras afectar a 21,5 hectáreas. O Goberno galego segue sen informar de todos os incendios forestais que se producen. Na imaxe, da Brif de Laza, o inicio do incendio en Pradorramisquedo.
Feijóo sae na defensa da Monarquía e "do papel do rei Juan Carlos na transición" tras a fuxida do ex-xefe do Estado. O presidente da Xunta en funcións e candidato á reelección polo PP apela á "presunción de inocencia" para o monarca e di ver "moi preocupante" que haxa "membros do Goberno" que queiran "erosionar" a Coroa.
O paro rexistrado descendeu e 9.343 inscricións en Galicia durante o mes de xullo e queda en 175.311, o que supón 24.390 máis que no mesmo mes do ano pasado. Durante o mes de xullo, a afiliación media á Seguridade Social en Galicia aumentou en 19.026 persoas e volve superar o millón, aínda que seguen sendo 31.814 menos que doce meses antes. Ampliamos a información neste espazo de Praza.gal
Juan Carlos de Borbón anuncia que marcha de España en plenas pescudas sobre as súas finanzas "ante a repercusión pública que están xerando certos acontecementos pasados da miña vida privada", indica un comunicado da Casa Real.
Compostela non tivo nada de chuvia en todo o mes de xullo, segundo os datos do Observatorio Astronómico Ramón María Aller da USC. É a primeira vez dende 1981 que a cidade non rexistra precipitacións neste mes. Un recente estudo da USC determinou que os días de verán duplicáronse en Compostela dende 1950.
Investigadores e investigadoras do Laboratorio de Radon de Galicia (USC) veñen de publicar na prestixiosa revista Environmental Research un amplo estudo que revela un aumento do risco de cancro pulmonar asociado á exposición a radon residencial. A exposición prolongada aos niveis de radon habituais nunha parte importante de Galicia é o factor de risco da enfemidade máis importante para persoas non fumadoras. O profesor Alberto Ruano chama a aplicar en España a directiva europea para limitar os efectos do radon.
