Fálase

A Xunta establece confinamentos perimetrais en Santiago Ames e Teo; Ferrol, Narón, Fene e Neda; A Coruña e Arteixo; Pontevedra, Poio e Marín; Vigo, Lugo e Vimianzo polo coronavirus. Os confinamentos perimetrais xa vixentes na provincia de Ourense seguirán vixentes. As medidas, que Sanidade espera ter en vigor este mesmo venres ás 3 da tarde, inclúen limitación de reunións só para convivintes, serán revisadas o vindeiro martes.

• INFORMACIÓN EN AMPLIACIÓN 👉 A Xunta estende o confinamento perimetral e o veto ás reunións de non convivintes a toda a Galicia urbana

O Congreso aproba a prórroga ata o 9 de maio do estado de alarma, como solicitara o Goberno central. Obtivo 194 votos a favor, 53 en contra (Vox) e 99 abstencións (PP, Bildu, CUP e UPN).

O poder xudicial renova a presidencia da Audiencia de Ourense malia estar en funcións. O pleno do Consello Xeral do Poder Xudicial, co seu mandato caducado desde hai dous anos, aprobou por 19 votos a favor e dous en branco que Antonio Piña siga á fronte da Audiencia de Ourense, para a que fora elixido en 2014, fronte á candidatura alternativa de Ana María del Carmen Blanco Arce.

Castela e León activa o confinamento perimetral dende o día 30 de outubro polo coronavirus. A medida engádese ao peche xa decidido por Asturias, o que supón que as dúas autonomías lindeiras con Galicia non permiten o acceso ao seu territorio agás nas excepcións contempladas no estado de alarma. Poboación doutros territorios non confinados si pode viaxar a Galicia atravesando Castela ou Asturias. Ata o día 3, ademais, estas restricións engádense ás de Portugal, que impide a circulación entre concellos agás motivos xustificados que non inclúen o turismo. A Xunta, pola súa banda, segue sen contemplar o peche.

• A veciñanza das autonomías non confinadas pode viaxar a Galicia malia aos peches de Asturias e Castela e León

A Xunta publica a súa aplicación PassCovid para móbiles Android. O Goberno galego xa lanzara a súa aplicación para o rastrexo de casos da COVID-19 hai dúas semanas, pero unicamente para dispositivos Apple. Passcovid pódese descargar para Android nesta ligazón e para móbiles Apple, nestoutra.

• DATOS | Os casos novos da COVID marcan máximos en Galicia, pero a taxa de probas positivas é un terzo da de marzo

O Ministerio de Consumo comunica a 25 clubs de fútbol que teñen ata final de tempada para extinguir os seus contratos publicitarios con casas de apostas. Nunha misiva asinada polo ministro Garzón, o Goberno de España anuncia de que aprobará "nos vindeiros días" o decreto que regulará este veto.

• HEMEROTECA | Mozo, con estudos, traballo fixo e 24.000 euros de débeda: así é o perfil da ludomanía en Galicia

A Xunta mantén o horario do confinamento nocturno das 11 da noite ás 6 da mañá. Así o vén de confirmar o conselleiro de Sanidade tras a xuntanza do Comité Clínico. Avanza Julio García Comesaña que polo momento, a Xunta non vai adoptar restricións adicionais. Ampliamos a información neste espazo

• O 8% das probas PCR teñen un resultado positivo, o peor dato dende o 12 de abril en Galicia, que empeora todos os seus indicadores

O Sergas abre o prazo dun mes ao ano no que permite á poboación da área de Vigo mudar Povisa polo Álvaro Cunqueiro como hospital de referencia. Desde hai un ano o centro privado vigués, que atende 134.000 pacientes, é propiedade de Ribera Salud, da estadounidense Centene Corporation.

EPA | As persoas con emprego en Galicia aumentaron nunhas 32.200 no terceiro trimestre de 2020, segundo a Enquisa de Poboación Activa, que sitúa o total da poboación ocupada en 1,08 millóns, unhas 23.000 persoas menos que hai un ano. Mentres, a poboación en paro aumentou en 2.300 no mesmo trimestre e sitúase nunhas 144.800, segundo o mesmo estudo, o que supón unhas 1.300 máis que un ano antes. Ampliamos a información neste espazo

Pedro Sánchez e Pablo Iglesias presentan este martes as liñas xerais do proxecto de Orzamentos Xerais do Estado para 2021 tras pecharen PSOE e Unidas Podemos acordos políticos ligados ás contas, como os relativos a unha maior regulación dos prezos do alugueiro de vivenda ou axilización dos trámites do ingreso mínimo vital. Detalles do orzamento como o investimento territorializado coñeceranse no momento en que sexa entregado ao Congreso para principiar a súa tramitación.