De por que ao raposo se lle chama Pedro aos significados de 'María' no cancioneiro. A VIII Xornada de Onomástica Galega explora este sábado dende Pontevedra a relación entre a cultura popular e os nomes propios con relatorios arredor dos cancioneiros ou os contos de tradición oral e os nomes das casas que designan as familias no rural. Pódese seguir a xornada en directo desde este enlace da Real Academia Galega.
Xosé Manuel Soutullo, novo director xeral da Editorial Galaxia. O Consello de Administración nomea o actual director da Fundación Penzol como sucesor de Francisco Castro. Soutullo xa era conselleiro de Galaxia, onde "desenvolveu unha dilatada vida profesional no ámbito da edición e da produción cultural", segundo traslada a editorial nun comunicado.
Suspendida a circulación de trens na liña A Coruña-Ferrol. Renfe informa de que prestará os seus servizos de longa distancia por estrada neste tramo durante toda a fin de semana. As persoas que tiñan billetes para trens de media distancia neste treito tamén serán desprazadas en vehículos por estrada ao longo deste venres e a compañía avaliará se retoma a circulación destes trens o sábado. A primeira hora desta mañá a caída dunha árbore sobre as vías impediu o paso dos trens entre Betanzos e Oza dos Ríos, solucionouse o incidente pero outras árbores volveron interroper a circulación a causa do temporal. [Imaxe de arquivo CC-BY-SA Jon T2008]
Seguimento "masivo" da primeira xornada de folga das traballadoras e traballadores das escolas infantís privadas ou de xestión indirecta –na etapa de 0 a 3 anos– para reclamar un convenio "digno" e uns salarios "xustos". A CIG confirma que de non producirse avances significativos a folga continuará o día 25 e os días 8 e 15 de novembro. A Coruña e Vigo acolleron concentracións de traballadoras para denunciar o "bloqueo patronal á negociación" dun convenio no que as táboas xa quedaron por debaixo do Salario Mínimo Interprofesional. [Fotografía deste xoves en Vigo CC-BY-SA CIG]
A Xunta activa no litoral da Coruña e Lugo a alerta vermella por temporal na costa, con ondas que poden chegar aos 10 metros. No resto do litoral galego a alerta será laranxa. Tamén se activa esta medianoite a alerta laranxa por vento no noroeste da Coruña e na Mariña de Lugo, con refachos que poden chegar aos 100 km/h, segundo as previsións de AEMET.
A Audiencia Provincial de Madrid reabre o Caso Jimmy e sinala a varios ultras do Atlético. O 2014 o seareiro do Deportivo Francisco Javier Romero Taboada, Jimmy, morreu nunha pelexa con afeccionados do equipo madrileño, pero o xulgado de instrución pechou a investigación hai anos sen imputados nin procesados.
José Ramón Gómez Besteiro entregou na sede do PSdeG os avais necesarios para concorrer ao proceso de primarias do partido, despois de recibir o apoio de "case 3.000" militantes da formación.
Aberto o prazo para votar pola candidatura galega no AI Song Contest 2023, a ‘Eurovision’ da Intelixencia Artificial. O público, que supón o 50% do resultado final, pode votar gratuitamente pola proposta de Galicia, que homenaxea a Ana Kiro, do 15 ao 30 de outubro a través de: votaanakiro.gal
Toda a poboación galega que teña entre 65 e 79 anos e que acuda a recibir a vacina fronte a gripe como parte da campaña anual que se porá en marcha nos grandes recintos de vacinación, situados en todas as áreas sanitarias de Galicia, poderá participar no ensaio GALFLU, desenvolvido entre a Consellería de Sanidade e investigadores do Grupo de Xenética, Vacinas e enfermidades infecciosas do Instituto de Investigación Sanitaria de Santiago. O estudo quere comprobar se a versión da vacina de alta carga da gripe –que xa se emprega en maiores de 80 anos– é igualmente beneficiosa neste grupo poboacional.
MeteoGalicia estrea nova web. O departamento meteorolóxico da Xunta, que di rexistrar máis de 7.000 usuarios diarios, mellorou diversos visores da súa páxina.
