A Xunta prevé pedir á xustiza que a autorice a esixir o certificado COVID tamén en ximnasios ou outros “lugares pechados” nos que haxa “reunións privadas”, segundo avanzou este xoves o presidente Feijóo. O titular do Goberno galego tamén espera comezar a vacinar á rapazada de entre 5 e 12 anos a partir do 14 de decembro.
O bispo de Mondoñedo-Ferrol, Fernando García, visita o persoal de Alcoa e Jofrasa (que realiza o servizo de limpeza na factoría metalúrxica mariñá), ambos en folga indefinida. A diocese mindoniense, que xa amosara o seu apoio ao persoal mobilizado na folga xeral da Mariña o pasado 17 de novembro, explica que a visita se debe a que "o emprego de centos de familias corre un grave perigo".
As inscricións nas oficinas de emprego descenderon en 1.284 persoas en Galicia durante o mes de novembro (-0,84%, fronte ao -2,24% da media estatal) e quedan en 152.747, isto é, 34.725 menos que un ano antes (-18,52%, lixeiramente por riba do -17,36% estatal). No mesmo mes, as afiliacións medias á Seguridade Social aumentaron un 0,28% (no total estatal, un 0,31%) e situáronse en 1,035 millóns de persoas (+2.487), o que supón 25.614 máis que no mesmo mes de 2020. O crecemento interanual da afiliación en Galicia é do 2,54% e na media estatal, do 3,84%.
A presidenta da Comisión Europea, Ursula von der Leyen, abre a porta ao "debate" da vacinación obrigatoria contra a COVID e lembra que "hai un terzo da poboación" da UE que non se vacina malia "termos vacinas que salvan vidas". Nunha comparecencia ante a prensa en Bruxelas, Von der Leyen confirmou ademais que as vacinas para a infancia de entre 5 e 11 anos estarán dispoñibles dende o 13 de decembro. [Imaxe: © Comisión Europea]
Un xulgado do mercantil da Coruña declara Alu Ibérica en concurso de acredores tras considerar acreditado o seu estado de insolvencia. Segundo informa o TSXG, a maxistrada non resolveu sobre a solicitude de apertura de liquidación da empresa e dá cinco días ao administrador xudicial para acreditar que está autorizado para reclamala.
Adiado o Gran Premio de Atletismo do Eixo Atlántico que se ía celebrar o vindeiro 5 de decembro en Maia como pórtico dos Xogos do Eixo Atlántico 2022. A entidade que agrupa concellos galegos e do Norte de Portugal sinala que o adiamento se debe ás "novas medidas de control de accesos e realización de eventos" aprobadas polo Goberno portugués. Celebrarase "en canto a situación o permita", agregan.
A Comisión Europea desbota unha guía interna de linguaxe inclusiva tras protestas do Vaticano e da extrema dereita. A guía fora promovida pola comisaria de Igualdade, Helena Dalli, e pode consultarse nesta información de eldiario.es
O Concello de Lugo entregou este martes as súas Medallas de Ouro de 2020 e 2021 "aos sectores que coidaron á veciñanza nos momentos máis duros da pandemia". Recibíronas o persoal de servizos esenciais do propio Concello e mais representantes do persoal sanitario, farmacias, o transporte, os servizos de limpeza, servizos sociais, bombeiros, Protección Civil e forzas de seguridade.
Marta Ortega será presidenta de Inditex dende o 1 de abril de 2022 en substitución de Pablo Isla. Segundo vén de comunicar á CNMV, o consello de administración da multinacional "aceptou a renuncia" de Isla na súa xuntanza deste luns, 29 de novembro, "no contexto da súa desvinculación de mutuo acordo de Inditex". A empresa destaca de Marta Ortega, filla do fundador do grupo, Amancio Ortega, que "desenvolveu a súa actividade" na compañía dende hai 15 anos. A operación inclúe tamén a remuda do conselleiro delegado, posto que pasa a exercer Óscar García Maceiras, avogado do Estado e executivo que antes de incorporarse a Inditex exerceu en bancos como o Pastor, o Popular, o Santander ou a Sareb (o banco malo). [Imaxes: © Inditex]
A galega Marta Pazos (Marta Boiro) fai historia na Copa inglesa de fútbol ao clasificarse para a terceira rolda co Clapton, primeiro equipo da sétima categoría en chegar a esa rolda da FA Cup. A xogadora galega marcou un dos penaltis decisivos dun equipo coñecido pola súa ideoloxía antifascistas e por lucir as cores da bandeira republicana española na súa camisola.
