Fálase

The Wall Street Journal dedícalle unha reportaxe a San Xoán de Río, como exemplo de localidade en vía de extinción, e destacando que no 2020, primeiro ano da pandemia, o envellecido concello ourensán gañou poboación por vez primeira dende 1950. O alcalde da vila di que "nesta pandemia demostramos que se pode cambiar a tendencia, que hai que atraer o talento o rural e que podemos mudar este sistema que quere concentrar o 80% da nosa poboación no 15% do territorio. Esta reportaxe para nós é un SOS RURAL para os nosos dirixentes".

• Menos poboación nas cidades e máis nas contornas urbanas e no rural: o cambio de tendencia que provocou a pandemia

A conselleira de Medio Ambiente volve protagonizar outra entrega de chaves de vivendas en persoa, desta volta a mozos e mozas en Lugo. Vén sendo habitual que a Xunta divulgue actos nos que o presidente ou membros do Goberno galego protagonizan entregas de chaves ou títulos de propiedade. [Imaxe: Xunta de Galicia]

Aprazada a petición de Estado e Xunta a vista xudicial sobre a propiedade dos bens do Pazo de Meirás prevista para o 13 de xaneiro para teren máis tempo para revisar o informe pericial que a familia Franco presentou aínda o día 4. Polo momento o xulgado non sinalou nova data.

Cidadanía afectada pola nova estrada prevista no plan de urbanismo de Vigo manifestouse este domingo polo centro da cidade.

• O rural vigués, contra a construción dunha vía de alta capacidade cun forte impacto ambiental e que "partirá familias en dous"

A Garda Civil detivo ou investigou 29 persoas como presuntas autoras de incendios forestais en Galicia durante 2021, segundo datos divulgados pola Delegación do Goberno de España. Case a metade (13) foron na provincia de Ourense, seguida por Lugo (7). A Coruña rexistrou 5 destas detencións ou investigacións e Pontevedra, 3. Na imaxe, traballos de extinción nun incendio forestal en Ribas de Sil, en setembro do ano pasado

• +INFO sobre incendios forestais en Praza.gal

A Xunta reactiva o formulario na web do Sergas para comunicar positivos da COVID detectados mediante autotest. Segundo os novos protocolos, estes positivos son validados a todos os efectos como os detectados polos propios servizos sanitarios e implican que a Central de Contactos chamará á persoa que o comunica "nas seguintes 24 horas".

• +INFO 👉 Os cambios nos protocolos de test da COVID mudan o significado dalgúns dos principais indicadores da pandemia

Verónica Boquete ficha pola Fiorentina. A futbolista compostelá continúa así unha traxectoria internacional que xa a levou polas ligas sueca, estadounidense, alemá, francesa e chinesa . Imaxe divulgada pola xogadora nas súas redes sociais.

• HEMEROTECA (2017) | Verónica Boquete, en Praza.gal: "O fútbol feminino avanzou máis en tres anos que nos últimos quince"

O pasado decembro foi o terceiro máis cálido da serie histórica de Meteogalicia, segundo o seu informe climatolóxico para o mes que vén de rematar. As temperaturas estiveron uns 2,1 graos por riba do normal, "o que fai que poida considerarse como un mes moi cálido", conclúe. O documento resalta tamén que o precedente máis próximo da serie (que se remonta a 1981) no mesmo sentido foi decembro de 2015, con temperaturas 2,87 graos por riba do habitual. O anterior fora en 1989 (+2,84 graos). O informe completo pódese consultar aquí. Na imaxe, o mapa de anomalía de temperatura media de decembro de 2021 a respecto do período 1981-2010.

• HEMEROTECA | MeteoGalicia constata que xullo de 2021 foi máis frío e seco do normal
• HEMEROTECA | Un informe da UE advirte de riscos para a agricultura galega polas secas máis "severas" que trae consigo o cambio climático

Tanxugueiras inicia na Coruña o vindeiro 26 de marzo a súa Xira Midas, na que presentarán as cancións do seu novo álbum, que se publicará neste ano 2022. As entradas poranse á venda este mércores ao mediodía. Terra (candidata a participar no Festival de Eurovisión) suma máis de dous millóns de reproducións en Youtube e Spotify e outros temas como Figa superan o millón de escoitas.

• Podes escoitar aquí o último programa do podcast Café Derby 21, dedicado ás Tanxugueiras

Goberno de España e comunidades autónomas confirman que o curso escolar se reiniciará o vindeiro día 10 con clases presenciais. O Sergas retomou hoxe a vacinación pediátrica co grupo das nenas e nenos de 7 a 9 anos.

• HEMEROTECA | O primeiro trimestre do curso remata cuns 3.000 casos da COVID nas aulas e un terzo da infancia de 5 a 11 cunha dose de vacina
• HEMEROTECA | A práctica habitual de non cubrir baixas de profesorado antes do Nadal complica outro outono coa COVID nas aulas